CHEʼ tsaʼ wen pʼojli i chubʌʼan jini añoʼ bʌ ti Egipto, jini israelob tsaʼix wen pʼojliyob. Tsaʼ ochi ti yeʼtel yambʌ faraón jiñʌch juntiquil wen jontol bʌ mach bʌ i cʌñʌyic José. Come tsiʼ qʼuele chaʼan tsaʼix wen pʼojliyob jini israelob, tsiʼ yʌcʼʌ mandar chaʼan miʼ chaʼleñob majtan eʼtel yicʼot chaʼan miʼ tsʌnsañob jini alʌlob yaʼ ti colem jaʼ i cʼabaʼ Nilo. Juntiquil chʼejl bʌ xʼixic ti Israel tsiʼ yotsa i yalobil tiʼ mal chiquib i tsiʼ mucu ti yojlil jamil am bʌ tiʼ i tiʼ jaʼ. Jini i yixicʼal faraón tsaʼ cʼoti i taj jini alʌl, tsiʼ yotsʌbe i cʼabaʼ ti Moisés i tsiʼ cosa tiʼ yotot.

Cheʼ anix 40 i jabilel, Moisés tsiʼ taja i mul chaʼan ti caj tsiʼ colta juntiquil chʼoyol bʌ ti Israel ti cʼʌb juntiquil xyaj cʌnta eʼtel ti Egipto, jini chaʼan tsaʼ putsʼi majlel ti ñajt bʌ lum. Cheʼ anix 80 i jabilel, Dios tsiʼ sube chaʼan miʼ chaʼ sujtel ti Egipto chaʼan mi suben faraón miʼ choc loqʼuel jini israelob.

Come maʼanic tsiʼ jacʼʌ jini faraón, Dios tsiʼ choco majlel lujunchajp wocol yaʼ ti tejclum. Moisés ñaxan miʼ suben jini faraón cheʼ maxto i choco majlel Jehová jini wocol tac. Pero tsiʼ chʌn chañʼesa i bʌ i maʼanic tsiʼ ñichʼtʌbe i tʼan Moisés yicʼot Jehová. Jini cojix bʌ i lujunchajplel wocol, Dios tsiʼ choco majlel juntiquil ángel chaʼan mi luʼ jisan jini ñaxam bʌ i yalobilob yaʼ ti tejclum. Cojach jini tsaʼ bʌ i jacʼbeyob i tʼan Jehová, yicʼot tsaʼ bʌ i boñoyob i tiʼ yotot tiʼ chʼichʼel tiñʌmeʼ maʼanic tsaʼ jisʌntiyob. Chaʼan miʼ cʼajtesañob chuqui tsaʼ bʌ ujti, jini israelob tsaʼ cajiʼ melob qʼuiñijel ti jujumpʼejl jab i cʼabaʼ Pascua.

Cheʼ bʌ tsaʼ chʌmi jini ñaxam bʌ yalobil faraón, tsiʼ sube Moisés chaʼan miʼ pʌy loqʼuel jini israelob yaʼ ti Egipto. Ti ora jach tsaʼ caji i chajpañob i bʌ chaʼan miʼ loqʼuelob majlel o yom yʌl jaʼel éxodo. Cheʼ jini, faraón tsaʼ qʼuextʌyi i pensar i tsaʼ majli i yajñesañob yicʼot i carreta tac chaʼan i soldadojob chaʼan bʌ guerra. Cheʼ tsaʼ cʼotiyob yaʼ tiʼ tiʼ Chʌchʌc bʌ ñajb, maʼañobic i putsʼib yilal jini israelob. Pero Jehová tsiʼ tʼoxo jini colem ñajb, i tsaʼ cʼaxiyob ti tiquin bʌ lum ti yojlil ñajb. Cheʼ baʼ ora jini egiptojob tsaʼ ochiyob majlel, Dios tsiʼ chaʼ ñupʼu jini ñajb i tsaʼ chʌmi faraón ti jaʼ yicʼot i soldadojob.

Ti wiʼil, jini israelob tsaʼ ajñiyob yaʼ tiʼ tʼejl wits Sinaí, yaʼi Jehová tsiʼ mele jumpʼejl trato yicʼotob. Tsiʼ cʼʌñʌ Moisés bajcheʼ i yaj ñusa tʼan, tsaʼ aqʼuentiyob mandar chaʼan miʼ tojʼesañob majlel yicʼot chaʼan miʼ cʌntañob i bʌ ti baqui jach bʌ wocol. Mi chʌn xucʼul mi yajñelob yicʼot mi xjacʼtʼañobʌch, Dios mi caj i yajñelob tiʼ tojlel yicʼot mi caj i cʼʌñob chaʼan miʼ tajob bendición yambʌ tejclumob.

Pero, cheʼ jini yonlel maʼanic tsiʼ ñopbeyob i tʼan Dios. Chaʼan ti caj i ñusa tʼañob, Dios tsiʼ yʌcʼʌyob ti xʌmbal ñumel chaʼcʼal (40) jab yaʼ ti i tiquiñal lum. Cheʼ jini Moisés tsiʼ waʼchoco tiʼ qʼuexol juntiquil xucʼul bʌ ti Israel i cʼabaʼ Josué. Tsaʼ cʼoti i yorajlel chaʼan mi yochelob jini Israel yaʼ ti lum tsaʼ bʌ i wʌn sube Dios jini Abraham.

(Loqʼuem ti Éxodo, Levítico, Números, Deuteronomio, Salmo 136:10-15 yicʼot Hechos 7:17-36.)