CHEʼ ti i yorajlel jini reyob ti Israel yicʼot Judá tsaʼ wen cʌjñiyob junmojt winicob: jiñobʌch xʼaltʼañob. Tiʼ pejtelelob yom añob i chʼejlel yicʼot xucʼul yom miʼ yajñelob ti ñopbal chaʼan miʼ subob jini tʼan chaʼan Dios. Jin tac lamital tsaʼ bʌ i yʌlʌ ili xʼaltʼañob:

1. Cheʼ tsaʼ jisʌnti Jerusalén. Jini xʼaltʼañob i chaʼan Dios —muʼ bʌ i ñumen ajlelob jiñʌch Isaías yicʼot Jeremías— tsiʼ wʌn alʌyob cheʼ jalto mi caj i yujtel chaʼan Jerusalén mi caj i jisʌntel yicʼot jochol mi caj i cʌytʌl. Yicʼot jaʼel wen tsiquil bajcheʼ tsiʼ pʌsʌyob jini tejclum chucoch tsiʼ techbeyob i michʼajel Dios. Tsaʼ yʌlʌyob chaʼan woli i yʌcʼob ti cʌjñel Jehová, pero jini mach bʌ utsʼatobic i melbal tiʼ ñopbalob, tsaʼ wen cʌjñiyob chaʼan mach tojic chuqui woliʼ melob yicʼot mach utsobic (2 Reyes 21:10-15; Isaías 3:1-8, 16-26; Jeremías 2:1–3:13).

2. Cheʼ tsiʼ chaʼ techeyob isujm bʌ chʼujutesaya. Cheʼ miʼ cʼotel jini lujumpʼejl i chʌncʼal (70) jab yaʼ ti Babilonia, jini i tejclum Dios mi caj i chaʼ sujtel tiʼ i lumal chaʼan miʼ chaʼ melob jini templo yaʼ ti Jerusalén yicʼot chaʼan miʼ chaʼ techob isujm bʌ chʼujutesaya (Jeremías 46:27; Amós 9:13-15). Lʌcʼʌl lujuncʼal (200) jab cheʼ maxto anic ujtem, Isaías tsi wʌn alʌ chaʼan juntiquil winic i cʼabaʼ Ciro mi caj i chʼʌm Babilonia yicʼot mi caj i locʼsan jini tejclum. I tsaʼ to cʼoti yʌl bajcheʼ mi caj i contrajin Babilonia (Isaías 44:24–45:3).

3. Cheʼ tsaʼ juli jini Mesías yicʼot chuqui tsiʼ chaʼle. Jini Mesías mi caj i yilan pañimil yaʼ ti tejclum i cʼabaʼ Belén (Miqueas 5:2). Jiñʌch juntiquil uts bʌ, cʼʌchʌl bʌ mi caj i yochel majlel yaʼ ti Jerusalén ti juncojt burro (Zacarías 9:9). Anquese tsiʼ wen cʼuxbi jini winicob xʼixicob, pero yonlel mach bʌ yomobic i qʼuel (Isaías 42:1-3; 53:1, 3). Mi caj i yubin tsʌts bʌ wocol cheʼ mi caj i chʌmel. ¿Yom ba i yʌl chaʼan tsaʼix jili jini Mesías? Maʼanic, come mi caj i chaʼ tejchel chʼojyel chaʼan miʼ pʌs jini majtañʌl tsaʼ bʌ i yʌcʼʌ yicʼot chaʼan miʼ ñusʌbentelob i mul pejtelel winicob xʼixicob (Isaías 53:4, 5, 9-12).

4. Jini i yumʌntel Mesías. Jini xmuliloʼ bʌ winicob xʼixicob mach chajpʌbilobic chaʼan miʼ chaʼleñob yumʌntel, pero jini Rey Mesías mucʼʌch i mejlel. Cheʼ jaʼel mi suben Xlajmesa Leto muʼ bʌ i chaʼlen yumʌl (Isaías 9:6, 7; Jeremías 10:23). Cheʼ miʼ caj ti yumʌntel ila ti Pañimil, ñʌchʼʌl mi caj i yajñel pañimil, jini winic temel mi caj i chumtʌl yicʼot jini añimil tac (Isaías 11:3-7). Mi caj i luʼ jilel cʼamʌjel tac (Isaías 33:24). Maʼanix miʼ chʌn cajel chʌmel (Isaías 25:8). Yicʼot, bajcʼʌl winicob xʼixicob miʼ caj i chaʼ cuxtiyelob (Daniel 12:13).

(Loqʼuem yaʼ ti libro chaʼan Isaías, Jeremías, Daniel, Amós, Miqueas yicʼot Zacarías.)