CHEʼ bʌ tsaʼ chumle Sansón, an juntiquil juez o xʼaltʼan tsaʼ bʌ chumle ti Israel i cʼabaʼ Samuel. Jini israelob lajal tsaʼ caji i melob bajcheʼ yambʌ tejclum tac tsiʼ yʌlʌyob chaʼan yomob juntiquil rey. Jehová mach tijicñayic tsaʼ yubi chaʼan chuqui tsiʼ cʼajtiyob, pero tsiʼ jacʼʌ yicʼot tsiʼ sube Samuel chaʼan mi waʼchocon ti rey jini Saúl. Uts i pusicʼal ili winic, pero ti wiʼil chan tsiʼ qʼuele i bʌ yicʼot tsiʼ ñusʌbe i tʼan Dios. Jini chaʼan Jehová maʼanix tsiʼ chʌn mula ti rey, tsiʼ sube Samuel chaʼan mi waʼchocon ti qʼuexol chʼiton winic i cʼabaʼ David. Pero tsaʼ ñumi jabil chaʼan miʼ waʼtʌl tiʼ yumʌntel.

Jumpʼejl bʌ qʼuin jini David, tsaʼ majli i julaʼtan i yerañob, yaʼ baqui añob ti guerra come i soldadojob Saúl. Cheʼ tsaʼ cʼoti, tsiʼ qʼuele tsiltsilñayob ti bʌqʼuen jini soldadojob. ¿Chuqui woli i yujtel? Juntiquil ñuc bʌ filisteo wen yujil bʌ guerra i cʼabaʼ Goliat woliʼ pʼaj ti leco bʌ tʼan jini i soldado israelob yicʼot Dios. David tsaʼ wen michʼa i tsaʼ majli ti guerra yicʼot, anquese chʼiton winic jax to. Tsiʼ chʼʌmʌ majlel pʌrʌntun yicʼot chaʼpʼejl uxpʼejl xajlel, David tsaʼ caji ti xʌmbal majlel chaʼan miʼ taj jini colem bʌ winic lʌcʼʌl uxpʼejl bʌ metro i chanlel. Goliat tsaʼ caji i pʼaj, pero David tsiʼ sube chaʼan mi caj i mʌjlel i chaʼan, come woli i majlel yicʼot i cʼabaʼ Jehová. Tsaʼ jach i cʼʌmbe jumpʼejl xajlel chaʼan miʼ yʌsan. Cheʼ jini tsiʼ jʌm botsʼbe loqʼuel i yespada yicʼot tsiʼ setʼ tʼojbe i bicʼ. Cheʼ bʌ tsiʼ qʼuele jini yambʌ soldado filisteojob, tsaʼ putsʼiyob majlel ti bʌqʼuen.

Tsaʼ toj sajti i pusicʼal jini rey Saúl chaʼan i chʼejlel David i tsiʼ yʌqʼue ñuc bʌ i yeʼtel ti soldado. Pero chaʼan tsaʼ mʌjli i chaʼan cabʌl guerra jini David, Saúl tsaʼ caji i tsʼaʼlen chaʼan miʼ tsʌnsan. Chaʼan miʼ coltan i bʌ, tsaʼ putsʼi David. Cabʌl jabil tsaʼ putsʼi ñumel, pero chʌn xucʼul tiʼ tojlel Saúl. ¿Chucoch? Come yujil chaʼan Jehová Dios tsiʼ waʼchoco tiʼ yumʌntel jini Saúl. Ti wiʼil tsaʼ chʌmi Saúl ti guerra. Cheʼ jini, David tsaʼ ochi ti rey, cheʼʌch bajcheʼ tsiʼ wʌn sube Jehová.

David yom i melben i templo Jehová. Pero Dios tsi sube chaʼan mach jinic mi caj i mel, juntiquilʌch i pʼolbal muʼ bʌ caj i mel. Iliyi jiñʌch i yalobil Salomón. Pero Jehová tsiʼ yʌqʼue ñumen ñuc bʌ i majtan: tsiʼ mele jumpʼejl trato yicʼot David, chaʼan jiñʌch ñaxam bʌ rey tiʼ tojlel junmojt reyob ñucoʼ bʌ. Yaʼʌch baqui tsaʼ tili jini Xcoltaya tsaʼ bʌ wʌn ajli, jini Pʼolbalʌl tsaʼ bʌ yʌlʌ Dios yaʼ ti Edén. Jiñʌch Mesías, yom yʌl jini Yajcʌbil bʌ, tsaʼ bʌ i yajca Jehová chaʼan mi yochel ti Rey tiʼ Yumʌntel, juntiquil yumʌl muʼ bʌ caj i yajñel tiʼ pejtelel ora.

Wen tijicña tsaʼ yubi David, jini chaʼan tsiʼ tempa oro, plata chaʼan miʼ cʼʌjñel ti mejlel jini templo. Yicʼot chʼujul bʌ i yEspíritu Dios, tsiʼ mele cabʌl cʼayʌl tac, muʼ bʌ i ñuqʼuesan Jehová. Cheʼ lʌcʼʌlix miʼ chʌmel David, tsiʼ sube i ñuclel Dios cheʼ tsaʼ yʌlʌ: «Jini Chʼujul bʌ i Chʼujlel [‹yespíritu›, NM] lac Yum tsaʼix i chaʼle tʼan tic tojlel. Anix i tʼan ti quej» (2 Samuel 23:2).

(Loqʼuem ti 1 Samuel, 2 Samuel, 1 Crónicas, Isaías 9:7, Mateo 21:9, Lucas 1:32 yicʼot Juan 7:42.)