¿CHUCOCH tsaʼ tili Jesús ti Pañimil? Chaʼ jin jach tsaʼ yʌlʌ: «Wersa mic sub jini wen tʼan chaʼan i yumʌntel Dios, come jini chaʼan chocbilon tilel» (Lucas 4:43). Laʼ laj qʼuel chʌnchajp tsaʼ bʌ i yʌlʌ Jesús chaʼan ili i Yumʌntel Dios, jini tsaʼ bʌ i ñumen alʌ tiʼ subtʼan.

1. Jesús jiñʌch jini Rey. Chaʼ jin jach tsaʼ yʌcʼʌ i bʌ ti cʌjñel chaʼan jiñʌch jini Mesías (Juan 4:25, 26). Yicʼot, tsaʼ yʌlʌ chaʼan jiñʌch jini Rey tsaʼ bʌ pʌsbenti jini xʼaltʼan Daniel. Tsiʼ subeyob jini apóstolob i chaʼan (jini xcʌntʼan i chaʼan wen lʌcʼʌl bʌ an yicʼotob) chaʼan jumpʼejl bʌ qʼuin mi caj i «buchtʌl ti yumʌntel ti ñuclel» yicʼot tsiʼ subeyob chaʼan jiñobʌch junmojt winicob xʼixicob tsicbilob jach bʌ mi caj i chaʼleñob yumʌntel yicʼot (Mateo 19:28). Ili junmojt winicob xʼixicob tsiʼ sube «mach bʌ cabʌleticla». Yicʼot jaʼel tsiʼ yʌlʌ an to «yambʌ c tiñʌmeʼ» mach bʌ yaʼic ochemob yaʼ ti yambʌ junmojt (Lucas 12:32; Juan 10:16).

2. Jini i Yumʌntel Dios jiñʌch muʼ bʌ caj i chʼʌm tilel isujm bʌ i tojel. Jesús tsiʼ pʌsʌ chaʼan jini i Yumʌntel Dios jiñʌch muʼ bʌ caj i luʼ tojʼesan mach bʌ tojic: jini tsaʼ bʌ i mele Satanás tiʼ contra i cʼabaʼ Dios. ¿Bajcheʼ mi caj i mel? Jiñʌch cheʼ mi caj i sʌqʼuesan i cʼabaʼ Dios chaʼan maʼanix miʼ chʌn wajlentel cʼʌlʌl cheʼ tsaʼ ñusʌnti tʼan ti Edén (Mateo 6:9, 10). Cheʼ jaʼel, Cristo tsiʼ pʌsʌ cheʼ mi caj i chaʼlen Yumʌntel maʼanix mach jelchojc mi cajel, come tsiʼ cʌntesa winicob xʼixicob, pʼumpʼuñoʼ bʌ yicʼot wen cabʌloʼ bʌ i taqʼuin, chaʼan mach jelchojquic miʼ qʼuelob i bʌ. Anquese chocbil tilel chaʼan mi suben wen tʼan jini israelob, tsiʼ colta jini samaritanojob yicʼot gentilob. Wen yʌñʌl cheʼ bajcheʼ jini ñaxam bʌ mi yʌcʼob i bʌ ti jini ñopbalʌl chaʼan judíojob, yajlemoʼ bʌ ti wocol cheʼ jelchojc mi qʼuelob winicob xʼixicob cheʼ an jach muʼ bʌ i cʼuxbiñob.

3. Jini i Yumʌntel Dios mach i chaʼanic pañimil ili am bʌ ti pʼʌtʌlel Satanás. Jesús tsaʼ chumle ti yorajlel judíojob cheʼ an ti wocol jini Israel am bʌ ti cʼʌb yambʌ lum. Pero maʼanic baʼ ora tsiʼ yʌcʼʌ i bʌ chaʼan miʼ chʼicob ti wocol (Juan 6:14, 15). Tsiʼ chaʼle tʼan yicʼot juntiquil yumʌl, tsaʼ yʌlʌ: «Mach wʌʼic chʼoyol c yumʌntel ti pañimil» (Juan 18:36). Jesús tsiʼ subeyob jini xcʌntʼañob i chaʼan: « Mach i chaʼañeticla pañimil» (Juan 15:19). Yicʼot jaʼel maʼanic tsiʼ pijta chaʼan miʼ botsʼob i machit, mi jinicto chaʼan miʼ coltañob (Mateo 26:51, 52).

4. Cristo mi caj i chaʼlen yumʌntel yicʼot cʼuxbiya. Jesús tsiʼ yʌcʼʌ i tʼan chaʼan miʼ sejbʼesaben i cuch jini xcʌntʼañob i chaʼan (Mateo 11:28-30). Cheʼʌch tsiʼ mele. Tsiʼ yʌqʼueyob wen tac bʌ ticʼojel chaʼan maʼanic mi melob i pusicʼal, chaʼan chubʌʼañʌl, chaʼan bajcheʼ yom mi yajñel yicʼot i piʼʌlob yicʼot chaʼan yom tijicñayob (Mateo, capítulo 5 cʼʌlʌl ti 7). Jiñʌch juntiquil winic uts bʌ, jini chaʼan tsiʼ lʌcʼtesayob i bʌ tiʼ tojlel. Majquiyic jach, jini ñumen pʼumpʼuñoʼ bʌ, tsaʼ yubiyob i tijicñʌyel chaʼan mi lʌcʼtesañob i bʌ baʼan ,come yujilob chaʼan wen mi caj i chʼʌjmelob yicʼot ñuc mi caj i qʼuejlelob. ¿Majqui to mach yom ti yum cheʼ bʌ bajcheʼ jini?

Cheʼ bʌ Jesús tsiʼ mele milagro tac, tsiʼ wʌn pʌsʌ chuqui mi caj i mel jini i Yumʌntel Dios. ¿Chuqui tsiʼ taja cheʼ jini? Laʼ laj qʼuel.

(Loqʼuem yaʼ ti libro chaʼan Mateo, Marcos, Lucas yicʼot Juan.)