DIOS tsiʼ yʌqʼue i pʼʌtʌlel i Yalobil chaʼan miʼ mel cabʌl milagro tac mach bʌ anic miʼ mejlel i mel juntiquil winic, i yonlel winicob xʼixicob tsiʼ qʼueleyob ili milagro tac. Ili milagro tac tsiʼ pʌsʌ chaʼan Jesús an i pʼʌtʌlel chaʼan jini laj contra mach bʌ anic miʼ mejlel i jisan winicob xʼixicob. Wʌʼan lamital jini wocol.

Jesús tsiʼ yʌcʼʌ chuqui tac miʼ cʼuxtʌl yicʼot chuqui tac miʼ jajpel. Jini ñaxam bʌ milagro tsiʼ mele Jesús —jiñʌch cheʼ tsiʼ sujtesa jini jaʼ ti vino— tsiʼ pʌsʌ chaʼan jini jach muʼ bʌ i mejlel i yʌcʼ chuqui mi lac jap yicʼot chuqui mi laj cʼux. Ti yambʌ chaʼyajl tsiʼ pʼojlesa jini mach bʌ oñic caxlan waj yicʼot chʌy chaʼan miʼ weʼsan yonlel bʌ mil winicob xʼixicob. Tsaʼ to colobaji jini bʌlñʌcʼʌl tac.

Jesús tsiʼ lajmesa cʼamʌjel. Cristo «tsiʼ luʼ lajmesa pejtelel cʼamʌjel tac yicʼot chʌmel tsaʼ bʌ i yubiyob winicob xʼixicob» (Mateo 4:23). Tsiʼ jambe i wut xpotsʼob, xcojcob, mach bʌ weñobic i yoc, añoʼ bʌ leco bʌ i tsoy yicʼot juquin chʌmel. Mach pʼisbilic jach i pʼʌtʌlel chaʼan mi chaʼlen lajmesaya.

Jesús tsiʼ tiqʼui tsʌts tac bʌ icʼ yicʼot jaʼal. An junyajl cheʼ ti acʼʌlel, cheʼ tsaʼ cʼaxiyob majlel Jesús yicʼot xcʌntʼañob i chaʼan ti junwejl ñajb ti Galilea, tsaʼ tejchi wen pʼʌtʌl bʌ icʼ jaʼal. Jini xcʌntʼañob tsaʼ cajiyob ti wen bʌqʼuen, pero Jesús tsaʼ jach i letsaʼ i wut ti panchan i tsaʼ yʌlʌ ti cʼam bʌ tʼan: «Ñʌjchʼen, Lajmen». Ti ora jach, tsaʼ lajmi jini icʼ (Marcos 4:37-39). Ti yambʌ ora tsiʼ chaʼle xʌmbal tiʼ pam jaʼ cheʼ woli bʌbʌqʼuen bʌ sutut icʼ (Mateo 14:24-33).

Jini jontoloʼ bʌ espíritu. Ili espíritujob, muʼ bʌ i subentelob xibajob, ñumen pʼʌtʌloʼ bʌ bajcheʼonla. Yicʼot, wen yonlel ticʼlʌbilob i chaʼan winicob xʼixicob, i yonlel maʼanic mi mejlel i chilob loqʼuel tiʼ tojlel. Pero Jesús, maʼanic tsiʼ bʌcʼña jini xibajob. Mach cheʼiqui, jini xibajob tsiʼ chaʼleyob bʌqʼuen cheʼ tsiʼ qʼueleyob Jesús yicʼot ti ora jach mi jacʼob cheʼ mi suben chaʼan mi cʌy jini woli bʌ i ticʼlan.

Jini chʌmel. Ili laj contra, jini muʼ bʌ i suben Biblia «jini cojix bʌ laj contra» mach la cujilic jala miʼ ticʼlañonla, mi juntiquil winic miʼ mejlel i mʌlben (1 Corintios 15:26). Pero, mi jinic jax chaʼan jini chʌmel, wocol tsaʼ yubi Cristo chaʼan miʼ chaʼlen lajmesaya, come tsiʼ chaʼ aqʼue i cuxtʌlel i yalobil jini mebaʼ xʼixic yicʼot juntiquil xchʼoc. Pero jini ñumen ñuc bʌ tsaʼ ujti jiñʌch tiʼ tojlel i yamigo Lázaro, anix bʌ chʌmpʼejl qʼuin i chʌmel cheʼ bʌ Jesús tsiʼ chaʼ teche chʼojyel, tsiʼ qʼuele bajcʼʌl winicob xʼixicob. Jiñob to jaʼel ñumen ñuc bʌ i contra tsiʼ cʌñʌyob jini i pʼʌtʌlel am bʌ yicʼot Jesús (Juan 11:38-48; 12:9-11).

Ti wiʼil, jini winicob xʼixicob tsaʼ bʌ i colta Jesús, tsaʼ cʼamʼayob i tsaʼ chʌmiyob. Cheʼ jini, ¿chuqui i cʼʌjñibal tiʼ pejtelel jini milagro tsaʼ bʌ i mele? Tsaʼ wen cʼʌjñibʌyi, come tsaʼ yʌcʼʌ ti cʌjñel chaʼan jini wen tijicña bʌ i Yumʌntel jini Mesías añʌch baʼ chucbil. Jini Rey waʼchocobil bʌ i chaʼan Dios melelʌch mi caj i jisan jini wiʼñal, cʼamʌjel tac, tsʌts tac bʌ icʼ yicʼot jaʼal jini xibajob yicʼot jini chʌmel. Wen tsiquil chaʼan Jehová aqʼuebil i chaʼan i pʼʌtʌlel chaʼan miʼ mel.

(Loqʼuem yaʼ ti libro chaʼan Mateo, Marcos, Lucas yicʼot Juan.)