CHEʼ anix uxpʼejl qʼuin i chʌmel Cristo, an cabʌl xʼixicob xcʌntʼañoʼ bʌ i chaʼan, tsaʼ majliyob yaʼ ti mucoñibʌl i jamʌl tsaʼ cʼoti i tajob. An majqui tsiʼ tʌtsʼʌ loqʼuel jini xajlel mʌctʌbil bʌ i chaʼan i tiʼ jini mucoñibʌl, jochol jini mucoñibʌl.

Cheʼ jini, yaʼan chaʼtiquil ángelob. Juntiquil tsaʼ yʌlʌ: «Woli laʼ sajcan Jesús chʼoyol bʌ ti Nazaret [...]. Tsaʼix chʼojyi» (Marcos 16:6). Ti orajach, jini xʼixicob tsaʼ majliyob chaʼan miʼ subeñob jini apóstolob. Yaʼ ti bij tsiʼ tajayob Jesús, i tsaʼ yʌlʌ: «Mach mi laʼ chaʼlen bʌqʼuen. Cucula. Subenla quermanojob chaʼan miʼ majlelob ti Galilea. Yaʼ mi caj i qʼueloñob» (Mateo 28:10).

Ti wiʼil, cheʼ woliʼ loqʼuelob majlel ti Jerusalén jini chaʼtiquil xcʌntʼañob chaʼan miʼ majlelob yaʼ ti Emaús, tsiʼ lʌcʼtesa i bʌ juntiquil mach bʌ i cʌñʌyobic i tsiʼ cʼajtibeyob chuqui woli i yʌlob. Jiñʌch jini Jesús, pero maʼanic tsiʼ cʌñʌyob come tsaʼix yʌjñi cheʼ bajcheʼ ti ñaxan. Tsiʼ jacʼʌyob yicʼot i chʼijiyemlel i pusicʼal chaʼan woli i yʌlob jini Xcʌntesa i chaʼañob, jini winic tsaʼ caji i luʼ tsictesʌben muʼ bʌ i yʌl i Tsʼijbujel Dios chaʼan jini Mesías. Tiʼ isujm, tsaʼ luʼ tsʼʌctiyi tiʼ tojlel Jesús jini tsaʼ bʌ i yʌlʌyob jini xʼaltʼan chaʼan Mesías. * Cheʼ bʌ tsiʼ cʌñʌyob chaʼan tsiʼ pejcayob Cristo, wʌle espíritujʌch, cheʼ yaʼ to an yicʼotob tsaʼ sʌc sajti.

Jini chaʼtiquil xcʌntʼañob tsaʼ chaʼ sujtiyob majlel yaʼ ti Jerusalén chaʼan tsaʼ majli i qʼuelob jini apóstolob, baʼ tempʌbilob ti jumpʼejl otot tsaʼ cʼoti i tajob. Cheʼ woli to i yʌlob chuqui tsaʼ ujti, pejtelel jini yaʼ bʌ tempʌbilob tsaʼ toj sajtiyob i pusicʼal cheʼ tsiʼ chaʼ pʌsʌ i bʌ Jesús. «¿Chucoch woli ti tʼan laʼ pusicʼal?», tsiʼ cʼajtibeyob. Tsiʼ subeyob: «Wersa mi yubin wocol jini Cristo. Wersa miʼ chaʼ chʼojyel baʼan chʌmeñoʼ bʌ ti yuxpʼejlel qʼuin cheʼ bajcheʼ tsʼijbubil» (Lucas 24:38, 46).

Cheʼ bʌ an chaʼcʼal (40) qʼuin, cabʌl to qʼuin tsiʼ qʼueleyob Jesús. An junyajl, tsiʼ qʼueleyob ñumen ti joʼcʼal i chaʼbajcʼ (500) winicob. Tajol ti jimbʌ ora tsaʼ yʌqʼueyob ili ñuc bʌ mandar jini xcʌntʼañob i chaʼan: «Cucula [...] sutqʼuiñob ti xcʌntʼañob winicob xʼixicob ti pejtelel pañimil, [...] cʌntesanla chaʼan miʼ laj chʼujbiñob pejtelel chuqui tac tsac subeyetla. Awilan, añon quicʼotetla ti pejtelel ora cʼʌlʌl tiʼ jilibal pañimil» (Mateo 28:19, 20).

Jini cojix bʌ tempa bʌ tsiʼ mele yicʼot jini junlujuntiquil xucʼuloʼ bʌ apóstolob i chaʼan tsiʼ wʌn subeyob: «Pero mi caj laʼ wʌʼqʼuentel laʼ pʼʌtʌlel cheʼ miʼ yochel jini Chʼujul bʌ Espíritu ti laʼ pusicʼal. [...] cʼʌlʌl ti ñajt bʌ pañimil mi caj laʼ sub chuqui tsaʼ laʼ qʼuele» (Hechos 1:8). Cheʼ jini tsaʼ caji ti letsel majlel ti panchan, tsaʼ tili tocal chaʼan miʼ mos i maʼanix tsiʼ chʌn qʼueleyob.

(Loqʼuem yaʼ ti capítulo 28 chaʼan Mateo, yicʼot capítulo 16 chaʼan Marcos, yicʼot capítulo 24 chaʼan Lucas, jini capítulo 20 yicʼot 21 chaʼan Juan yicʼot 1 Corintios 15:5, 6.)