¿MUʼ BA i mejlel ti ajñelob ti xucʼul jini i winicob Dios ti eʼtel cheʼ an tsʌts tac bʌ wocol, anquese mach cʼʌjñibʌyic yilal cheʼ mi lac mel bajcheʼ jini? Juntiquil winic i cʼabaʼ Job tsiʼ ñusa ili wocol. Laʼ laj qʼuel bajcheʼ tsaʼ ujti.

Job i piʼʌlob i bʌ yicʼot Abraham, i cʼabaʼ baʼ tsaʼ chumle wʌle mi subentel Arabia cheʼ chumulobto jini israelob yaʼ ti Egipto. Jumpʼejl bʌ qʼuin Jehová cheʼ tsiʼ mele tempa bʌ yicʼot jini ángelob yaʼ ti panchan tsaʼ caji i yʌlob jini Job. Yaʼan jaʼel jini Satanás. Tsaʼ yubiyob tiʼ pejtelel, cheʼ tsaʼ caji yʌl Jehová chaʼan maʼanic yambʌ bajcheʼ Job, Jehová tsiʼ yʌcʼʌ ti cʌjñel chaʼan wen ñopol i chaʼan. Pero Satanás tsiʼ yʌlʌ chaʼan Job woliʼ melben i yeʼtel Dios chaʼan jach an chuqui woli i yʌqʼuen yicʼot chaʼan miʼ cʌntan. Tsaʼ yʌlʌ mi tsiʼ laj sʌtʌ i chubʌʼan, mi caj i cʌy Jehová.

Dios maʼanic tsiʼ tiqʼui jini Diablo chaʼan miʼ chilben i chubʌʼan Job, tsiʼ sʌtʌ i yalobilob yicʼot tsiʼ sʌtʌ i cʼocʼlel. Come mach yujilic Job mi Satanás woliʼ mel pejtelel jini, maʼanic miʼ ñaʼtan chucoch mach mi ticʼ Dios jini wocol. Pero Job maʼanic baʼ ora tsiʼ cʌyʌ Jehová.

Cheʼ jini tsaʼ tili i julaʼtañob Job uxtiquil poj i yamigojoʼ bʌ mi yʌlob yicʼot tsaʼ cajiʼ subeñob. Jini i cʌntesajob tsʼijbubil yaʼ ti libro chaʼan Job, cheʼ tsiʼ ñopoyob i yʌqʼuen i ñaʼtan Job chaʼan Dios woliʼ yʌqʼuen i toj i mul mucul bʌ. ¡Mach isujmic chuqui tsaʼ bʌ i yʌlʌyob! Yicʼot tsaʼ yʌlʌyob chaʼan Dios mach i wentajic i winicob yicʼot mi muqʼuicto i ñopbeñob chaʼan miʼ melob chuqui wen. Pero Job maʼanic tsiʼ ñopo chuqui tsaʼ bʌ i yʌlʌyob, tsaʼ yʌlʌ chaʼan chʌn xucʼul mi caj i yajñel ti Dios cʼʌlʌl jinto miʼ chʌmel.

Job tsiʼ taja i sajtemal cheʼ tsiʼ cʌlʌx ñaʼta chaʼan maʼanic i mul. Eliú juntiquil chʼiton winic tsiʼ laj ubi chuqui woliʼ yʌjlel, tsiʼ tiqʼui Job chaʼan tsiʼ ñumen acʼʌ ti pusicʼal miʼ coltan i bʌ i mach jinic ti ñaxan i yumʌntel Jehová. Yicʼot jaʼel tsiʼ tiqʼuiyob jini xlot bʌ i yamigojob jini Job.

Ti wiʼil Jehová tsiʼ tojʼesa Job. Tsiʼ sube jini utsʼatax bʌ i melbal tac, yicʼot tsiʼ pʌsbe chaʼan jini winic cʼax chʼoʼchʼoc jax bajcheʼ i ñuclel Dios. Job tsiʼ peqʼuesa i bʌ yicʼot tsiʼ chʼʌmʌ i ticʼol. Jehová, «uts i pusicʼal yicʼot wen yujil pʼuntaya», tsiʼ chaʼ aqʼue i cʼocʼlel yicʼot tsiʼ chaʼ aqʼue i chubʌʼan chaʼ yajl to i yonlel bajcheʼ ti ñaxan tsaʼ bʌ i sʌtʌ yicʼot yambʌ lujuntiquil i yalobil (Santiago 5:11). I xucʼtilel jini Job tsaʼ yʌqʼue i jacʼbal tsaʼ bʌ yʌlʌ Satanás yicʼot tsiʼ pʌsʌ chaʼan jini winicob xʼixicob ti pañimil mucʼʌch i mejlelob ti ajñel ti xucʼul tiʼ tojlel Dios cheʼ an tsʌts tac bʌ wocol.

(Loqʼuem ti libro chaʼan Job.)