CHEʼ bajcheʼ tsaʼ pʼojli majlel jini winicob xʼixicob ti pañimil, jini jontolil yicʼot mulil tsaʼ pujqui majlel jaʼel. Cheʼ bʌ ora jini tajol cojach jini Enoc ti Pañimil tsiʼ melbe i yeʼtel Dios, tsiʼ subu chaʼan Jehová mi caj i jisan jini xjontolilob. Pero maʼanic majqui tsiʼ ñichʼtʌbe i tʼan, tsaʼ ñumen pʼojli majlel jontolil. Añob ángelob tsaʼ bʌ i chanʼesayob i bʌ ti tojlel Jehová, tsiʼ cʌyʌyob i yajñib ti panchan, tsiʼ meleyob i bʌ ti winic yicʼot tsiʼ pʌyʌyob i yijñam ti cabʌl. Cheʼ tsiʼ piʼleyob xʼixic mach bʌ i tilelic ti melol tsiʼ yila pañimil colem winicob tac bʌ i yalobilob yicʼot wen pʼʌtʌloʼ bʌ i cʼabaʼob jiñʌch nefilim, jiñʌch tsaʼ bʌ i pʼoloyob jontolil ila ti Pañimil. ¿Muʼ ba i mejlel lac ñaʼtan bajcheʼ yubil i cʼuxel tsaʼ yubi Dios cheʼ tsiʼ qʼuele an ti wocol i melbal?

Cheʼ tsaʼ chʌmi Enoc tsaʼ tili yambʌ winic wem bʌ i melbal: Noé. Cheʼ bajcheʼ Noé yicʼot i chaʼañoʼ bʌ tsiʼ chaʼleyob wersa chaʼan miʼ melob chuqui utsʼat ti wut Dios. Jumpʼejl bʌ qʼuin, Jehová tsiʼ ñaʼta chaʼan miʼ chʼʌm tilel butʼjaʼ chaʼan miʼ jisan jini xjontolilob. Pero, mach yomic chaʼan miʼ chʌmel jini añimal tac mi jinic to yom cheʼ miʼ chʌmel jini Noé. Jini chaʼan tsiʼ sube Noé chaʼan miʼ mel jumpʼejl arca o colem bʌ caja. Yaʼʌch baqui tsaʼ coltʌnti Noé yicʼot i chaʼañoʼ bʌ yicʼot tsaʼ ochiyob yonlel añimal tac. Noé tsiʼ jacʼbe i tʼan Dios i tsaʼ ñumi chaʼcʼal (40) jab o lujumpʼejl yuxcʼal (50) jab tsiʼ mele jini arca. Cheʼ bʌ ora jini, Noé jiñʌch «tsaʼ bʌ i subu i sujmlel ili tʼan ti toj» (2 Pedro 2:5). Tsiʼ sube jini winicob xʼixicob chaʼan tal Butʼjaʼ, pero maʼanic mach tsiʼ jacʼbe. Tsaʼ cʼoti i yorajlel chaʼan jini Noé yicʼot i chaʼañoʼ bʌ mi yochelob ti arca yicʼot jini añimal tac. Cheʼ jini, Dios tsiʼ mʌcbe i tiʼ jini arca, i tsaʼ caji jaʼal.

Jini tsʌts bʌ jaʼal, tsaʼ jalʼa chaʼcʼal (40) qʼuin yicʼot chaʼcʼal (40) acʼʌlel, i tsaʼ pajmi ti jaʼ jini Pañimil. Tsaʼ laj chʌmiyob jini xjontolilob. Tsaʼ ñumi cabʌl qʼuin, jini jaʼ tsaʼ caji ti jubel majlel jini arca tsaʼ cʼʌcle ti pam wits. Ñumenix jumpʼejl jab, cheʼ baʼ ora Noé yicʼot i chaʼañoʼ bʌ tsaʼ loqʼuiyob ti jini arca. Noé tsiʼ sube wocolix yʌlʌ Jehová, jini chaʼan tsiʼ yʌqʼue jumpʼejl majtañʌl. Dios tsiʼ yʌcʼʌ i tʼan chaʼan maʼanic baʼ ora mi caj i chʌn choc tilel butʼjaʼ chaʼan miʼ jisan jini cuxul tac bʌ ti Pañimil. Jehová tsiʼ yʌcʼʌ tʼox jaʼ, chaʼan miʼ waʼchocon i tʼan. Majqui jach miʼ qʼuel, mi caj i cʼajtesʌbeñob i tʼan jini tsaʼ bʌ i Meleyonla.

Cheʼ bʌ tsaʼ ñumi jini Butʼjaʼ, Dios tsiʼ yʌcʼʌ yambʌ mandar tac. Tsiʼ yʌlʌ chaʼan miʼ cʼuxtʌl weʼelʌl, pero tsiʼ tiqʼui chaʼan maʼanic miʼ cʼuxtʌl jini chʼichʼ. Yicʼot jaʼel tsiʼ yʌlʌ chaʼan miʼ pujquelob majlel jini winicob xʼixicob ti Pañimil. Pero, yonlel tsiʼ tempayob i bʌ ti jumpʼejl tejclum i tsaʼ caji i melob colem tsʼajc cheʼ bajcheʼ tsiʼ yʌlʌ Nemrod. Pero Dios tsiʼ jembeyob cheʼ bajcheʼ tsiʼ ñaʼtayob i mel. ¿Bajcheʼ? Tsiʼ yʌmbeyob i tʼan, i tsaʼ cajiyob ti tʼan tiʼ chajp tiʼ chajp yaʼ bʌ chumulob ti jini tejclum —tsaʼ bʌ i yotsʌbeyob i cʼabaʼ Babel, ti wiʼil Babilonia—. Come maʼanix miʼ chʌn ñaʼtʌbeñob i bʌ i tʼan tsiʼ cʌyʌyob i mel jini eʼtel i tsaʼ pam pujquiyob.

(Loqʼuem yaʼ ti capítulo 6 cʼʌlʌl ti 11 chaʼan Génesis yicʼot Judas 14, 15.)