JINI libro chaʼan Biblia ñumen on bʌ an i chaʼan chʼujul bʌ cʼayʌl tac tsaʼ bʌ ujti ti mil jabil. Iliyobi tsiʼ tsʼijbuyob chuqui tsiʼ ñopoyob ti Dios yicʼot maʼanic yambʌ utsʼatax bʌ bajcheʼ tsiʼ yʌlʌyob. Yicʼot jaʼel cabʌl miʼ pʌsob bajcheʼ yubil tsaʼ yubiyob, ñuc tac bʌ tijicñʌyel, cʼux bʌ, yicʼot chʼijiyemlel, cheʼ tsiʼ cʌyʌyob i mul yicʼot bajcheʼ tsiʼ chʼujutesayob Jehová yicʼot bajcheʼ tsiʼ subeyob wocolix i yʌlʌ. Ti pejtelelob tsiʼ cʼuxbiyob Dios yicʼot wen lʌcʼʌl tsaʼ ajñiyob tsaʼ yubi yicʼot Dios. Laʼ laj qʼuel lamital chuqui muʼ bʌ yʌl jini libro chaʼan Salmos.

Jehová, jini am bʌ tiʼ wenta chaʼan Cojach yom miʼ chaʼlen Yumʌntel, cojach yom mi lac cʌqʼuen i ñuclel yicʼot i chʼujutesʌntel. Salmo 83:18 jamʌl bajcheʼ mi yʌl: «Laʼ i ñopob a cʼabaʼ Jehová come jatet jach jini Cʼax ñuquet bʌ ti pejtelel pañimil» (NM). An cabʌl Salmos baqui miʼ ñuqʼuesʌben i cʼabaʼ Jehová chaʼan tsiʼ mele jini panchan, ecʼ tac, jini cuxul tac bʌ ti Pañimil yicʼot utsʼatax bʌ laj cuctal (Salmos 8, 19, 139 yicʼot 148). Yonlel majqui miʼ chʼujutesañob chaʼan yujil coltʌntel yicʼot miʼ cʌntan i chaʼañob tojoʼ bʌ (Salmos 18, 97 yicʼot 138). Yañoʼ bʌ miʼ cʼʌyiñob come jiñʌch juntiquil Dios toj bʌ chuqui miʼ mel yicʼot miʼ coltan mach bʌ añobic i mul yicʼot miʼ yʌqʼuen i toj i mul jini xjontolilob (Salmos 11, 68 yicʼot 146).

Jehová miʼ coltan yicʼot mi yʌqʼuen i ñʌchʼtilel i pusicʼal jini muʼ bʌ i cʼuxbiñob. Mi mejlel la cʌl chaʼan jini salmo ñumen cʌmbil bʌ jiñʌch número 23, baʼ miʼ lajin David jini lac Tat am bʌ ti panchan bajcheʼ juntiquil uts bʌ xcʌnta tiñʌmeʼ muʼ bʌ i cʌntan yicʼot miʼ tojʼesan majlel i tiñʌmeʼ. Ti Salmo 65:2 miʼ cʼajtesʌbeñonla chaʼan Jehová jiñʌch muʼ bʌ i «Ñichʼtʌbeñob i yoración». Yicʼot jini am bʌ melbilob i chaʼan chuqui mach wenic an tajbil i chaʼañob i ñʌchʼtilel i pusicʼal yaʼ ti Salmos 39 yicʼot 51. Yaʼ baqui miʼ pʌs, chaʼan David tsaʼʌch i sutqʼui i bʌ cheʼ tsiʼ chaʼle tsʌts bʌ mulil yicʼot yujil chaʼan Dios miʼ ñusʌben i mul. Yaʼ ti Salmo 55:22 miʼ pʼʌtʼesañonla chaʼan mi la cʌcʼ lac bʌ ti Jehová yicʼot mi la cʌqʼuen chaʼan mi coltañonla tiʼ cuchol wocol.

Jehová mi caj i cʼʌn i Yumʌntel jini Mesías chaʼan miʼ chʼʌm tilel tsijiʼ bʌ pañimil. Cabʌl mi lac taj yaʼ ti Salmos baʼ mi yʌl chaʼan Mesías, jini Rey albil bʌ. Cheʼ bajcheʼ mi yʌl, jini Salmo 2 ili Yumʌl mi caj i jisan jini tejclum mach bʌ añic miʼ qʼuel ti ñuc. Jini Salmo 72 mi pʌsbeñonla chaʼan mi caj i luʼ jisan wiʼñal, ticʼlʌntel yicʼot mach bʌ tojic miʼ mejlel. Yicʼot cheʼ bajcheʼ mi yʌl Salmo 46: 9, Dios mi caj i yujtesan guerra yicʼot mi caj i luʼ bicʼti jisan jini juloñib tac cheʼ miʼ cʼʌn i Yumʌntel jini Mesías. Yicʼot ti Salmo 37 mi lac pejcan chaʼan yaʼ ti tsijiʼ bʌ pañimil maʼanix mi cajel jontoloʼ bʌ winicob xʼixicob yicʼot muchʼul mi caj i chumtʌlob tiʼ ñʌchʼtilel i pusicʼal jini utsoʼ bʌ tiʼ pejtelel ora.

(Loqʼuem ti libro chaʼan Salmos.)