SANTIAGO yicʼot Judas i majan yerañob i bʌ yicʼot Jesús, jini Pedro yicʼot Juan jiñʌch apóstolob i chaʼan. Ti chʌnticlelob yicʼot i yespíritu Dios tsiʼ tsʼijbuyob wucchajp carta tac chaʼan bʌ i Tsʼijbujel Griego, ti jujunchajp miʼ chʼʌmben i cʼabaʼ jini tsaʼ bʌ i tsʼijbuyob. Yomob chaʼan miʼ coltañob jini xñoptʼan chaʼan chʌn xucʼul mi yajñelob yicʼot chaʼan miʼ chʌn ñaʼtañob jini i Yumʌntel Dios.

Tiʼ pʌsol chuqui ñopol lac chaʼan. Mach jasʌlic jach yom miʼ la cʌl chaʼan ñopol lac chaʼan; yom mi lac pʌs yicʼot chuqui mi lac mel. Cheʼ bajcheʼ mi yʌl Santiago: «Cheʼ jaʼel mi toʼol tʼan jach woli lac ñop Dios cheʼ maʼanic wen bʌ lac melbal, chʌmeñonixla yubil» (Santiago 2:26). Jini muʼ bʌ i cuch wocol chaʼan chuqui ñopol i chaʼan miʼ ñumen pʼʌtʼan. Cheʼ jaʼel miʼ mejlel i cʼajtiben i ñaʼtʌbal Dios, yicʼot miʼ ñop chaʼan melelʌch mi caj i yʌqʼuentel. Mi chʌn xucʼul mi yajñel ti Jehová, mi caj i qʼuejlel ti wen ti wut Dios (Santiago 1:2-6, 12). Dios miʼ chʌn coltan jini tsʼʌcʌl bʌ i xucʼtilel mi yajñel tiʼ tojlel. Jini chaʼan, jini Santiago tsiʼ yʌlʌ: «Lʌcʼtesan laʼ bʌ baʼan Dios. Cheʼ jini mi caj i lʌcʼtesan i bʌ baʼ añetla» (Santiago 4:8).

Jini xñoptʼañob yom miʼ pʼʌtʼesañob chuqui ñopolob i chaʼan ti Dios, chaʼan maʼanic miʼ yajlelob ti mulil chaʼan chuqui mach wen. Judas, chumul bʌ baqui butʼulob ti i tsʼiʼlel winicob xʼixicob, jini chaʼan tsiʼ chʌn sube xñoptʼañob «come yom mi laʼ chaʼlen wersa chaʼan jini isujm bʌ tʼan tsaʼ bʌ junyajlel aqʼuentiyob i chaʼañoʼ bʌ Dios chaʼan miʼ ñopob» (Judas 3).

Yom chʌn sʌc lac melbal. Jehová yom chaʼan chʼujul mi yajñelob jini i winicob yicʼot sʌc cheʼ tiʼ pejtelel. Pedro tsiʼ tsʼijbu: «Jini chaʼan yom chʼujuletla jaʼel [...] ti pejtelel laʼ melbal. Come tsʼijbubil: ‹Ajñenla ti chʼujul, come chʼujulon cheʼen [Jehová]›» (1 Pedro 1:15, 16). Jini chaʼan yom mi lac lajin i melbal Cristo, cheʼ bajcheʼ tsiʼ yʌlʌ jini apóstol Pedro: «Tsiʼ pʌsbeyonla bajcheʼ yom mi lac mel. Tsajcanla majlel» (1 Pedro 2:21). Anquese mach cʼuñic ti jacʼol jini i tʼan Dios, pero ñumen am bʌ i cʼʌjñibal jiñʌch cheʼ miʼ yajñelob «ti utsʼat chaʼan maʼanic miʼ tejchel tʼan ti laʼ pusicʼal» (1 Pedro 3:16, 17). Pedro tsiʼ chaʼ alʌ chaʼan yom sʌc lac melbal yicʼot mi lac pʌs ti lac melbal chaʼan mi laj cʼuxbin yicʼot mi laj qʼuel ti ñuc jini Dios cheʼ woli to lac pijtan jini Qʼuin chaʼan Meloñel yicʼot jini tsijiʼ bʌ pañimil albil bʌ, «baʼ miʼ mejlel chuqui toj» (2 Pedro 3:11-13).

Cheʼ mi lac pʌs laj cʼuxbiya. «Dios xcʼuxbiyajʌch», cheʼ miʼ yʌl Juan. Jehová tsiʼ pʌsʌ bajcheʼ cʼamel miʼ cʼuxbiñonla cheʼ tsiʼ choco tilel i Yalobil chaʼan mi yʌcʼ i cuxtʌlel «chaʼan [...] miʼ toj lac mul». ¿Chuqui mi ñijcan lac pusicʼal chaʼan mi lac mel cheʼ miʼ cʼuxbiñonla Jehová? Juan tsiʼ tsictesa: «Cʼuxbibilet bʌ la, mi cheʼʌch tsiʼ cʼuxbiyonla Dios, cheʼ yom mi laj cʼuxbin lac bʌ ti lac pejtelel» (1 Juan 4:8-11). Junchajp bajcheʼ mi laj cʼuxbin la quermanojob jiñʌch cheʼ mi lac pʌyob ochel ti lac cotot (3 Juan 5-8).

¿Bajcheʼ miʼ pʌsob jini xñoptʼañob chaʼan mi cʼuxbiñob Jehová? Juan mi yʌqʼuen i jacʼbal: «Come i cʼuxbintel Dios jiñʌch i chʼujbibentel i mandar. Mach wocolic i mandar» (1 Juan 5:3; 2 Juan 6). Jini muʼ bʌ i jacʼbeñob i tʼan Dios yujilob chaʼan miʼ chʌn ubiñob i tijicñiyel Tiʼ cʼuxbiya yicʼot chaʼan miʼ chʌn pijtañob i «cuxtʌlel mach bʌ anic miʼ jilel» (Judas 21).

(Loqʼuem yaʼ ti Santiago, 1 Pedro, 2 Pedro, 1 Juan, 2 Juan, 3 Juan, yicʼot Judas.)