DANIEL jiñʌch juntiquil xucʼul bʌ tsaʼ ajni chʼoyol bʌ ti Israel tsaʼ bʌ cʌjchi majlel ti Babilonia cheʼ chʼiton jax to, cheʼ maxto anic cʼotem i jisʌntel Jerusalén. Jini Daniel yicʼot i colobal jini judíojob tsaʼ mejli i melob chuqui tac yomob anquese tsaʼ cʌjchiyob majlel. Jini jabil tac tsaʼ bʌ ñumi cheʼ yaʼ chumul Daniel yaʼ ti tejclum, Dios tsaʼ chʌn ajni yicʼot. Yicʼot tsiʼ colta chaʼan maʼanic miʼ chʌmel yaʼ baʼ otsʌbil tac i chaʼañob bajlum ti tocol bʌ i mal lum yicʼot tsiʼ yʌqʼue i qʼuel jalto bʌ miʼ caj ti ujtel. Jini ñumen am bʌ i cʼʌjñibal tsaʼ bʌ i yʌlʌ Daniel jiñʌch chaʼan bʌ jini Mesías yicʼot i Yumʌntel.

Daniel tsiʼ cʌñʌ baʼ ora tsaʼ juli jini Mesías. ¿Jala yom miʼ pijtan jini i tejclum Dios cheʼ miʼ tilel jini «Mesías jini Yumʌl»? Jini Daniel tsaʼ tsictesʌbenti chaʼan mi caj i ñumel 69 semana jab cheʼ mi yʌjqʼuel mandar chaʼan miʼ chaʼ mejlel jini tsʼajc yaʼ ti Jerusalén. Come jumpʼejl semana an i chaʼan wucpʼejl qʼuin, jumpʼejl semana jab an i chaʼan wucpʼejl jab. Jini mandar tsaʼ bʌ ajqʼui chaʼan mi chaʼ waʼchocontel Jerusalén tsaʼ ajqʼui cheʼ ti 455 cheʼ maxto anic jini jabil 1, cabʌl to qʼuin tsaʼ ñumi cheʼ mach cuxulix jini Daniel. Cheʼ yaʼ mi lac tech lac tsic jini 69 «semana» —yom yʌl, 483 jabil—, mi pʌyonla majlel ti jabil 29. ¿Chuqui tsaʼ ujti cheʼ jini? Muʼ to caj laj qʼuel majlel. Jini Daniel tsaʼ pʌsbenti jaʼel chaʼan jini Mesías mi caj i «tsʌnsʌntel», chaʼan miʼ tojben i mul winicob xʼixicob (Daniel 9:24-26).

Jini Mesías jiñʌch Rey yaʼ ti panchan. Daniel tsaʼ toj sajti i pusicʼal, cheʼ tsiʼ qʼuele woli tilel «juntiquil cheʼ bajcheʼ i yalobil winic» —jiñʌch jini Mesías— tsiʼ lʌcʼtesa i bʌ baʼan i buchlib Dios. Cheʼ jini Jehová tsaʼ caji i yʌqʼuen i «pʼʌtʌlel, yicʼot i ñuclel yicʼot i yumʌntel», juntiquil yumʌl muʼ bʌ caj i yajñel tiʼ pejtelel ora. Ti wiʼil jini Daniel tsaʼ cʼoti i ñaʼtan yambʌ utsʼatax bʌ chaʼan i Yumʌntel jini Mesías: jini Rey mi caj i chaʼlen yumʌntel yicʼot junmojt winicob xʼixicob tsaʼ bʌ subentiyob «i chaʼañoʼ bʌ Dios am bʌ ti panchan» (Daniel 7:13, 14, 27).

Jini Yumʌl mi caj i luʼ jisan jini yumʌlob ti pañimil. Dios tsiʼ yʌqʼue Daniel chaʼan miʼ tsictesʌben i sujmlel i ñajal, mach bʌ anic woli i ñaʼtan chuqui i sujmlel jini Nabucodonosor, rey bʌ ti Babilonia. Tsiʼ qʼuele melbil bʌ i yejtal winic melbil ti puro oro i jol, melbil ti puro plata i tajn yicʼot i cʼʌb, melbil ti bronce i ñʌcʼ yicʼot i jol i yaʼ, melbil ti tsucu taqʼuin i yaʼ cʼʌlʌl tiʼ tun oc, i yoc xʌbʌl yicʼot tsucu taqʼuin yicʼot ocʼol. Cheʼ jini tsaʼ cʼojli ti wits colem xajlel yicʼot tsiʼ jatsʼbe i yoc i yejtal jini winic, tsaʼ laj jejmi jopol tsaʼ cʌle. Daniel tsiʼ tsictesʌbe i sujmlel jini rey, i jol melbil bʌ ti oro yom yʌl jini Babilonia, jini yan tac bʌ parte, jiñʌch yambʌ yumʌlob pʼʌtʌloʼ bʌ ti yan tac bʌ lum wiʼilix bʌ tsaʼ tiliyob. Jini i Yumʌntel Dios mi caj i tech i chaʼlen yumʌntel cheʼ ti i yorajlel jini cojix bʌ yumʌl —jini i yoc melbil bʌ ti tsucu taqʼuin yicʼot ocʼol— mi caj i luʼ jisan pejtelel jini yumʌlob ti pañimil. Ti wiʼil mi caj i chaʼlen yumʌntel tiʼ pejtelel ora ti pañimil (Daniel, capítulo 2).

Daniel tsiʼ laj qʼuele cheʼ tsaʼ jisʌnti Babilonia. Cheʼʌch bajcheʼ tsaʼ wʌn ajli, jini rey Ciro tsiʼ chʼʌmʌ jini tejclum. Cheʼ tsaʼ tsʼʌctiyi jini lujumpʼejl i chʌncʼal (70) jab tsaʼ chojquiyob loqʼuel tiʼ lumal, jini judíojob tsaʼ chaʼ sujtiyob majlel. Ti cʼʌb cabʌl yumʌlob, motomajob yicʼot xʼaltʼañob xucʼuloʼ bʌ tsiʼ chaʼ waʼchocoyob Jerusalén yicʼot i templo Jehová. Pero ¿chuqui tsaʼ ujti cheʼ tsaʼ ñumi jini 483 jabil albil bʌ?

(Loqʼuem yaʼ ti libro chaʼan Daniel.)