Ñaʼtancu iliyi: Brian an chuqui miʼ yubin tiʼ ñʌcʼ cheʼ miʼ qʼuel i piʼʌlob ti escuela come woli (choncol) i lʌcʼtesañob i bʌ tiʼ tojlel. Ti ili semana chaʼsujtel tiʼ subeyob chaʼan miʼ ñucʼ cʼujts. I yuxyajlelix iliyi.

Juntiquil tiʼ sube:

Miʼ locʼsan jiñi cʼujts, miʼ cʼʌn jumpʼejl i wut chaʼan miʼ mutsʼ wutin i miʼ pʌsben.

Brian miʼ qʼuel jiñi cʼujts i ñumen lecoj to miʼ yubin tiʼ ñʌcʼ.

Cheʼ jatetic, ¿chuqui maʼ mel?

Jiñi i piʼʌlob Brian, ¿yujiloʼ ba maʼ wʌl chuqui woli (yʌquel) i melob? ¿I bajñel ba tsiʼ ñaʼtayob maʼ wʌl jiñi woli bʌ i melob? Tajol maʼan. Tajol miʼ melob jiñi come miʼ qʼuelob chaʼan cheʼ miʼ melob jaʼel jiñi yañoʼ bʌ. Yom miʼ qʼuejlelob ti ñuc, jin chaʼan miʼ jacʼbeñob i tʼan.

Cheʼ jatetic, ¿muʼ baʼ mulan chaʼan yʌñʌl chuqui maʼ mel yicʼot chaʼan maʼ ñusan jiñi a xicʼol tiʼ melol mach bʌ weñic?

1. CHAJPAN A BΛ

   Jiñi Biblia miʼ yʌl: «Jini cʌntesʌbil bʌ miʼ wʌn ñaʼtan chuqui bʌbʌqʼuen miʼ yujtel. [...] Jini tonto bʌ maʼanic miʼ yotsan tiʼ pusicʼal. Muqʼuix i toj» (Proverbios 22:3).

   Tsiquil cheʼ mi caj la cochel ti wocol. Ñaʼtancu chaʼan woli a chaʼlen xʌmbal i maʼ taj a qʼuel junmojt xcolelob woli bʌ i ñucʼob cʼujts. Mi tsaʼix a ñaʼta baqui bʌ wocol miʼ mejlel a taj, chajpʌbiletix cheʼ bʌ miʼ cʼotel ti a tojlel.

2. ÑAʼTAN

   Jiñi Biblia miʼ yʌl: «Ajñenla ti utsʼat [...] ti laʼ pusicʼal [o conciencia]» (1 Pedro 3:16).

   Cʼajtiben a bʌ: «¿Bajcheʼ yubil mi caj cubin mi tsaʼ caji c mel bajcheʼ yañoʼ bʌ?». Tajol mi caj i qʼueletob ti ñuc, anquese mach jalic. Pero ¿bajcheʼ yubil mi caj a wubin? ¿Muʼ ba caj a yʌn a bʌ chaʼan maʼ chʼʌjmel ti a piʼʌlob? (Éxodo 23:2).

3. MELE CHUQUI TSAʼ ÑAʼTA

   Jiñi Biblia miʼ yʌl: «Jini wen bʌ i pusicʼal miʼ bʌcʼñan mulil. Miʼ tʌtsʼ i bʌ» (Proverbios 14:16).

   Ti jumpʼejl bʌ qʼuin, mi caj lac ñaʼtan chuqui la com yicʼot mi caj lac toj chuqui mi lac mel. Jiñi Biblia miʼ taj ti tʼan tsaʼ bʌ i meleyob chuqui wen, cheʼ bajcheʼ José, Job yicʼot Jesús. Miʼ taj ti tʼan jaʼel tsaʼ bʌ i meleyob mach bʌ weñic, cheʼ bajcheʼ Caín, Esaú yicʼot Judas. ¿Chuqui mi caj a mel?

Jiñi Biblia miʼ yʌl chaʼan yom «xucʼul» mi la cajñel (Salmo 37:3). Mi tsaʼix a ñaʼta chuqui miʼ mejlel ti ujtel ti a tojlel yicʼot chuqui mi caj a mel, mi caj i coltañet cheʼ maʼ wʌl chuqui maʼ ñaʼtan. Cheʼ jaʼel, wen ñucʌch i cʼʌjñibal.

Mach a pensalin, mach cʼʌñʌl cabʌl chuqui mi caj a subeñob. Cojach yom maʼ wʌl maʼañic. Miʼ mejlel a subeñob jaʼel chaʼan maʼañic baqui ora mi caj a qʼuextan a pensar cheʼ bʌ maʼ wʌl:

• «Joñon mach a wotsañon».

• «Joñon maʼañic mic mel jiñi».

• «A wujilix chuqui mic ñaʼtan».

Yom maʼ jacʼ ti ora yicʼot ti tsʌts bʌ tʼan. Tajol mi caj i toj sajtel a pusicʼal cheʼ bʌ maʼ qʼuel chaʼan maʼañix mi caj i chʌn ticʼlañet.

Tajol jiñi a piʼʌlob miʼ yʌqʼuetob ti quisin. Tajol miʼ subeñetob: «¿Chuqui maʼ chaʼlen? ¡Mach yom xbʌqʼueñet!». Ili ñʌmʌl ti alol cheʼ bʌ juntiquil choncol i xijqʼuel tiʼ melol mach bʌ weñic. ¿Chuqui miʼ mejlel a mel? An chaʼchajp:

• Jacʼben: «Isujmʌch, mic bʌcʼñan». Tsʼitaʼ tsictesʌben chucoch.

• Qʼuextan ti ñumen wem bʌ. Tsictesan chucoch i suben: «Jiñi am bʌ i ñaʼtʌbal bajcheʼ jatet maʼañic miʼ ñucʼ cʼujts».

Mi choncol i bej techbeñetob, putsʼen. Mi maʼañic, mi caj a ñumen techbentel. Cheʼ maʼ putsʼel, woli a pʌs chaʼan jatetʌch maʼ ñaʼtan chuqui a wom a mel.

Laʼ lac chʼʌmben isujm: Mach mejlic lac putsʼtan jiñi lac xicʼol tiʼ melol mach bʌ weñic. Pero mucʼʌch i mejlel a mel chuqui a wom, a tsictesan chuqui maʼ ñaʼtan yicʼot a tojʼesan jiñi wocol. Jatet a wujil chuqui mi caj a mel (Josué 24:15).