CʼAJTIYA 3
¿Bajcheʼ yom mic pejcan jiñi c tat yicʼot c ñaʼ?
¿CHUQUI MAʼ MEL JATETIC?
Ñaʼtancu iliyi: Jumpʼejl miércoles cheʼ ti ochʼajel qʼuin, Geoff am bʌ 17 i jabilel, tsaʼix ujti i mel i tarea yicʼot i yorajlelix chaʼan miʼ tsʼitaʼ cʼaj i yo. Miʼ tsʼʌb i tele i miʼ chʼʌm i buchlib muʼ bʌ i wen mulan.
Cheʼ jiñi, michʼicña miʼ cʼotel i tat.
«¡Geoffrey! ¿Chucoch woli a sʌt qʼuin ti qʼuel tele? ¿Mach ba i wentʌlel choncol a coltan i mel i tarea a wijtsʼin? ¡Maʼañic baʼ ora maʼ mel chuqui maʼ subentel!».
«Yaʼix a chaʼ quejel», cheʼ miʼ mucu al Geoff.
I tat miʼ lʌcʼtesan i bʌ i miʼ cʼajtiben: «¿Chuqui bi tsaʼ wʌlʌ?».
«Maʼan chuqui, papá», Geoff tam miʼ jap icʼ i michʼicña.
I tat wen michʼix i miʼ yʌl: «¡Joñon mach cheʼic mi caj a pejcañon bajcheʼ jiñi!».
Cheʼ jatetic, ¿chuqui tsaʼ mele chaʼan mach cheʼic maʼ wujtel bajcheʼ jiñi?
WAʼLEN A ÑAʼTAN
Mi woli (choncol) a ñijcan majlel juncojt carro i mi mʌcʌl tsaʼ taja jiñi carretera, mi caj a sʌclan yambʌ bij. Cheʼ lajal ti a tojlel jaʼel, miʼ mejlel a sʌclan yambʌ bajcheʼ miʼ mejlel a pejcan a tat a ñaʼ.
JUMPʼEJL EJEMPLO:
Leah miʼ yʌl: «Tsʌts jax mi cubin chaʼan mic pejcan c tat. An qʼuiñil, cheʼ sajmʌx cajel c pejcan, miʼ cʼajtibeñon: ‹Ñusʌbeñon, ¿an chuqui yʌquel a subeñon?›».
LEAH UXCHAJP CHUQUI MIʼ MEJLEL I MEL
-
Miʼ pejcan ti tsʌts bʌ tʼan.
Tsʌts miʼ pejcan i tat: «¡Ñʌchʼtañon! ¡An i cʼʌjñibal!».
-
Maʼañix chuqui miʼ yʌl.
Maʼañix miʼ bej suben i tat jiñi i wocol.
-
Ti yan to bʌ ora miʼ pejcan.
Wiʼil to miʼ pejcan i tat o miʼ tsʼijbuben jumpʼejl jun chaʼan miʼ suben i wocol.
¿Baqui bʌ maʼ suben chaʼan miʼ mel Leah?
ÑAʼTAN ILIYI: Yambʌ chuqui woliʼ ñaʼtan i tat Leah i maʼañic chuqui wis qʼuelbil i chaʼan. Mi tsiʼ yajca jiñi opción A i miʼ tsiʼ chanʼesa i tʼan tiʼ tojlel i tat maʼan mi caj i ñaʼtan chucoch cheʼ miʼ chaʼlen bajcheʼ jiñi. Tajol maʼañic chuqui mi caj i mel chaʼan miʼ ñʌchʼtʌntel i maʼañic mi caj i qʼuel ti ñuc i tat (Efesios 6:2). Tiʼ melol iliyi maʼañic mi caj i coltan Leah mi jiñic to i tat.
Anquese an wocol tac yaʼ ti bij, miʼ mejlel a sʌclan jaʼel bajcheʼ miʼ mejlel a pejcan a tat a ñaʼ.
Jiñi opción B mach wocolic, pero mach jiñic ñumen wem bʌ. ¿Chucoch? Come mi yom i tojʼesan i wocol, yom miʼ chaʼlen tʼan yicʼot i tat. Chaʼan miʼ coltan yom miʼ ñaʼtan chuqui miʼ chaʼlen Leah. Mi maʼan chuqui miʼ suben i tat, maʼan mi caj i mejlel i tojʼesan i wocol.
Yaʼ ti opción C, Leah maʼañic miʼ yʌcʼ chaʼan chuqui jach miʼ mʌctañob tiʼ tʼan. Miʼ mejlel i sʌclan jala miʼ mejlelob ti tʼan. Mi tiʼ tsʼijbube jumpʼejl jun i tat, tajol ñumen tijicña mi caj i yubin.
Cheʼ miʼ tsʼijbuben jumpʼejl jun miʼ mejlel i coltan chaʼan miʼ tsictesʌben chuqui yom i suben. Cheʼ bʌ i tat Leah miʼ pejcan jiñi jun, mi caj i ñumen chʼʌmben isujm. Jiñi opción C jiñʌch wem bʌ chaʼan Leah yicʼot i tat. Mi tiʼ tsʼijbube jumpʼejl jun o mi tiʼ lajal pejcayob i bʌ, woliʼ jacʼ jiñi ticʼojel am bʌ ti Biblia chaʼan yom miʼ ‹ñaʼtañob chuqui tac yom chaʼan ñʌchʼʌl miʼ yajñelob› (Romanos 14:19).
¿Chuqui yambʌ miʼ mejlel i mel Leah?
Ñaʼtan mi a wujil yambʌ yicʼot chuqui miʼ mejlel a taj cheʼ bʌ maʼ mel jiñi.
YOM TSIQUIL MUʼ BΛ A WΛL
Cʼajtesan: Jiñi muʼ bʌ a wʌl mach tiʼ pejtelel ora mi caj i ñaʼtan jiñi a tat a ñaʼ chaʼan jiñʌch tsaʼ bʌ a wʌlʌ.
JUMPʼEJL EJEMPLO:
A tat a ñaʼ miʼ cʼajtibeñetob chucoch michʼet. Maʼ jacʼbeñob: «Mach com cʌl chaʼan jiñi».
Tajol miʼ ñaʼtañob chaʼan woli a wʌl: «Maʼañic mic chʼujbibeñob i tʼan, cojach camigojob mi caj c suben c wocol.
Ñaʼtancu chaʼan maʼ taj jumpʼejl tsʌts bʌ wocol i a tat o a ña yom i coltañet, pero maʼ wʌl: «Mach a cʼojoʼtan, muʼto c bajñel tojʼesan».
-
¿Chuqui miʼ mejlel i ñaʼtañob a tat a ñaʼ chaʼan iliyi?
-
¿Chuqui ñumen wem bʌ miʼ mejlel a wʌl?
Miʼ mejlel a qʼuel jaʼel iliyi
CUXUL BɅ DIBUJO TAC
¿Bajcheʼ yom maʼ pejcan a tat a ñaʼ?
¿Wocol ba maʼ wubin chaʼan maʼ chaʼlen tʼan a wicʼot a papá a mamá? ¿Bajcheʼ miʼ mejlel a subeñob bajcheʼ maʼ wubin a bʌ?
