Cheʼ bʌ mach yʌxʌlic i yo jiñi Annette, tsaʼ tili juntiquil wiñic i tʌcʼlan i tsiʼ choco jubel ti lum. Annette miʼ yʌl: «Tsaʼ c wersa tujcʼa c bʌ. Tsaʼ c ñopo weʼecñiyel, pero maʼañic tsaʼ mejliyon. Tsaʼ c choco loqʼuel tic tojlel, tsaʼ c tontonteʼqʼue (boboteʼqʼue), tsaʼ c jatsʼʌ yicʼot tsaʼ c lajchi... pero tsiʼ lowoyon ti cuchillo. Ti jiñi bʌ ora, maʼañix tsaʼ c ñaʼta chuqui yom mic mel».

Cheʼ jatetic, ¿chuqui maʼ mel?

Anquese maʼ cʌntan a bʌ, tajol cheʼ bʌ maʼ loqʼuel ti acʼʌlel, an chuqui miʼ mejlel a chaʼlen. Jiñi Biblia miʼ yʌl chaʼan jiñi wen yujiloʼ bʌ ajñel mach tiʼ pejtelel ora miʼ jotob, i jiñi wen añoʼ bʌ i ñaʼtʌbal mach tiʼ pejtelel ora wen miʼ loqʼuel chuqui miʼ melob, «maʼanic majqui yujil baqui ora mi caj i chujquel ti wocol» (Eclesiastés 9:11, 12).

Jiñi tsaʼ bʌ i ticʼla Annette mach i cʌñʌyic. An i tajol jiñi xticʼlaya jiñʌch juntiquil laj cʌñʌ bʌ o lac familiajob. Natalie an jaxto 10 i jabilel cheʼ bʌ tsaʼ ticʼlʌnti ti juntiquil chʼiton yaʼ jach bʌ chumul tiʼ tʼejl. «Tsaʼ ochi c bʌqʼuen yicʼot j quisin, ti ñaxan maʼañic majqui tsaʼ c sube», cheʼ miʼ yʌl Natalie.

Annette woli (choncol) to i chʌn ñaʼtan chaʼan i mul jiñi tsaʼ bʌ ujti. Miʼ yʌl: «Muʼto c chʌn ñaʼtan jiñi tsaʼ bʌ ujti ti jiñi acʼʌlel i mic ñaʼtan chaʼan an bajcheʼ tsaʼ c ñumen colta c bʌ i wentʌlel. Isujmʌch chaʼan wen an c bʌqʼuen tsaʼ cʌyleyon cheʼ bʌ tsaʼ jejqʼuiyon ti cuchillo, pero choncol to c chʌn ñaʼtan chaʼan an chuqui tsaʼ c mele i wentʌlel».

Natalie wocol miʼ ñusan qʼuin jaʼel come an i mul miʼ yubin. Miʼ yʌl: «Tsaʼ c wen cʌnta c bʌ i wentʌlel. C tat c ñaʼ cojach miʼ yʌcʼon ti alas tiʼ pat otot mi yaʼʌch an quijtsʼin, pero maʼañic tsaʼ c jacʼʌ. Tsaʼ jach cʌqʼue c bʌ yubil jiñi tsaʼ bʌ i tʌcʼlayon. Tsiʼ wen ila wocol c familia yicʼot c mul mi cubin. Ili jiñʌch muʼ bʌ i ñumen aqʼueñon c chʼijiyemlel».

Mi cheʼ maʼ wubin bajcheʼ Annette yicʼot Natalie, mach a mulic. An maʼañic bʌ miʼ qʼuelob ti ñuc ili tsʌts bʌ wocol i miʼ yʌlob chaʼan i mulʌch jiñi tsaʼ bʌ ticʼlʌnti. Pero maʼañic majqui yom miʼ ñusan ili tsʌts bʌ wocol. Mi tsaʼ wersa piʼlentiyet, mach a mulic.

Mach wocol ti alol, pero wocolʌch cheʼ bʌ joñonla mi la cujtel bajcheʼ jiñi. An tsaʼix bʌ ticʼlʌntiyob, pero maʼañic miʼ subob. I bajñel jach miʼ cuchob i wocol yicʼot miʼ tilelob tiʼ pensar mach tac bʌ weñic. Pero ¿majqui miʼ taj i coltʌntel cheʼ maʼañic chuqui miʼ yʌl? ¿Jatet o jiñi xticʼlaya? ¿Mach ba ñumen weñic cheʼ maʼ cʼajtin a coltʌntel?

Jiñi Biblia miʼ tsictesan chaʼan cheʼ bʌ woliʼ ñusan tsʌts bʌ wocol jiñi Job, juntiquil toj bʌ wiñic, tsiʼ yʌlʌ: «Mux caj c sub pejtel c wocol yicʼot jini chʼaj bʌ muʼ bʌ cubin» (Job 10:1). Tajol jiñʌch yom bʌ maʼ mel jaʼel. Cheʼ maʼ suben chuqui tsaʼ chaʼle jiñi wen ñʌmʌl bʌ a wicʼot miʼ mejlel i coltañet a taj a tijicñʌyel.

Annette cheʼ tsiʼ mele bajcheʼ jiñi i tsiʼ taja i tijicñʌyel. Miʼ yʌl: «Tsaʼ c pejca juntiquil wem bʌ camiga i tsiʼ subeyon chaʼan mic pejcan chaʼtiquil ancianojob yaʼ ti congregación. Tijicña mi cubin cheʼ tsaʼʌch c jacʼʌ. Mach junsujtel jach tsiʼ pejcayoñob i tiʼ subeyoñob: Mach a mul jiñi tsaʼ bʌ ujti».

Natalie tsiʼ sube i tat i ñaʼ chuqui tsaʼ melbenti. Miʼ yʌl: «Tsiʼ wen coltayoñob. Tsiʼ subeyoñob chaʼan mi cʌl chuqui tsaʼ bʌ ujti i jiñi tsiʼ coltayon chaʼan maʼañix mi cubin c michʼajel yicʼot c chʼijiyemlel».

Tsiʼ colta jaʼel jiñi oración. Natalie miʼ tsictesan: «I pejcʌntel Dios tsiʼ wen coltayon, ñumen to cheʼ bʌ tsaʼ cubi chaʼan maʼañic majqui miʼ mejlel c suben jiñi tsaʼ bʌ ujti. Cheʼ mic mel oración, miʼ mejlel c suben Dios tiʼ pejtelel am bʌ tic pusicʼal i mi yʌqʼueñon c ñʌchʼtʌlel».

Jatet jaʼel mi caj a qʼuel chaʼan ‹añʌch i yorajlel chaʼan mi lac lajmesan› lac wocol (Eclesiastés 3:3). Cʌntan a bʌcʼtal yicʼot bajcheʼ yubil maʼ wubin i yom maʼ wen cʼaj a wo. Pero ñumen ñuc bʌ i cʼʌjñibal jiñʌch cheʼ maʼ sʌclan Jehová, jiñi Dios muʼ bʌ i ñuqʼuesan lac pusicʼal (2 Corintios 1:3, 4).

Mi jiñi a novio miʼ xiqʼuet a mel mach bʌ weñic, suben ti tsʌts bʌ tʼan: «¡Mach a mel jiñi!» o «¡Locʼsan a cʼʌb yaʼi!». Subu i mach a bʌcʼñan i cʌyet. Mi tsiʼ cʌyʌyet yom i yʌl chaʼan mach a chaʼañic. Miʼ mejlel a taj ñumen wem bʌ: Juntiquil muʼ bʌ i qʼuelet ti ñuc yicʼot chuqui ñopol a chaʼan.

«Cheʼ bʌ an jaxto 13 o 14 c jabilel, jiñi chʼitoñob yaʼ ti escuela tsiʼ tujcʼayob jiñi c brasier tic pat i tiʼ subeyon bibiʼ bʌ tʼan: ‹Mi caj a ñaʼtan chaʼan wen utsʼatax cheʼ bʌ mi caj lac mel›», cheʼ miʼ yʌl Coretta.

¿Woliyoʼ ba maʼ wʌl ili chʼitoñob...

1. ... ti alas tʼan?

2. ... i pʌsbeñob chaʼan miʼ mulañob?

3. ... i melob ticʼlaya chaʼan piʼleya?

«Yaʼ ti autobús, juntiquil chʼiton tsaʼ caji i subeñon mach tac bʌ weñic yicʼot i tʌlon. Tsaʼ c jatsʼbe i cʼʌb i tsaʼ c sube chaʼan miʼ loqʼuel. Tsiʼ qʼueleyon i sojquemon tsiʼ mele», cheʼ miʼ yʌl Candice.

¿Woli ba maʼ wʌl ili chʼiton...

1. ... ti alas tʼan?

2. ... i pʌs chaʼan miʼ mulan?

3. ... i mel ticʼlaya chaʼan piʼleya?

«An juntiquil chʼiton jumpʼejl bʌ jab tsiʼ subeyon chaʼan miʼ mulañon yicʼot chaʼan yom loqʼuel quicʼot. Tsaʼ c sube chaʼan maʼan. An i tajol miʼ wen jaxubeñon tiʼ bʌntʌlel j cʼʌb. Tsaʼ c sube chaʼan maʼan miʼ mel jiñi, pero maʼan tsiʼ jacʼʌ. Ti jumpʼejl bʌ qʼuin, cheʼ bʌ woli j cʌch c zapato, tsiʼ jatsʼbeñon c chojʼit (ñuchil)», cheʼ miʼ yʌl Bethany.

¿Woli ba maʼ wʌl ili chʼiton...

1. ... ti alas tʼan?

2. ... i pʌs chaʼan miʼ mulan?

3. ... i mel ticʼlaya chaʼan piʼleya?

I jacʼbal tiʼ yuxpʼejlel jiñʌch jiñi letra C.

¿Chucoch mach lajal jiñi ticʼlaya chaʼan piʼleya yicʼot jiñi alas

Mach tijicñayic jiñi muʼ bʌ i ñusan ticʼlʌntel chaʼan piʼleya. Jiñi wocol miʼ bej cajel cheʼ bʌ jiñi woli bʌ i ticʼlʌntel miʼ yʌl chaʼan mach yomix ticʼlʌntel.

Jiñi ticʼlʌntel wen an i wocolel: Miʼ mejlel ti ujtel bajcheʼ piʼleya yicʼotix bʌ jatsʼ.