Ñaʼtancu iliyi: Alex maʼañix miʼ ñaʼtan baqui bʌ yom miʼ ñop. Yujil chaʼan jiñʌch Dios tsiʼ mele panchan yicʼot Lum. Pero i maestro chaʼan Biología miʼ yʌl chaʼan isujmʌch jiñi evolución come albilix i chaʼan jiñi científicojob. Alex mach yom wajlentel i miʼ ñaʼtan: «Tiʼ sujm, mi jiñi científicojob miʼ yʌlob chaʼan isujmʌch jiñi evolución, ¿majquiyon mi tsaʼ cʌlʌ chaʼan mach isujmic?».

Cheʼ jatetic, anquese isujmʌch yilal, ¿muʼ ba caj a ñop jiñi evolución chaʼan jach miʼ yʌl jiñi libro tac?

An ora jach bʌ miʼ ñop chaʼan jiñi evolución o chaʼan an majqui tsiʼ meleyonla, pero maʼan miʼ mejlel i tsictesañob chucoch miʼ ñopob.

• An muʼ bʌ i ñopob chaʼan añʌch majqui tsiʼ mele chuqui tac an come cheʼʌch tsaʼ pʌsbentiyob yaʼ tiʼ ñopbalob.

• An yambʌ muʼ bʌ i ñopob chaʼan jiñi evolución come cheʼʌch tsaʼ pʌsbentiyob yaʼ ti escuela.

Hebreos 3:4 miʼ yʌl: «Ti jujumpʼejl otot añʌch majqui tsiʼ mele. Pero jini tsaʼ bʌ i mele pejtelel chuqui tac an, jiñʌch Dios». ¿Am ba i sujmlel maʼ qʼuel muʼ bʌ i yʌl jiñi Biblia?

MUʼ BΛ I YΛJLEL: Tiʼ pejtelel chuqui an ti panchan yicʼot ti Lum tsaʼ tejchi come an chuqui tsaʼ tojmi cʌmbil bʌ bajcheʼ Big Bang.

MUʼ BΛ I YΛJLEL: Tsaʼ tiliyonla ti añimal tac.

MUʼ BΛ I YΛJLEL: Jiñi evolución tsaʼix wen qʼuejli chaʼan isujmʌch.

«Ñaʼtancu chaʼan woliyet ti xʌmbal ti jumpʼejl ñojteʼel i maʼ taj wen utsʼatax bʌ otot melbil bʌ ti teʼ. Maʼañic mi caj a ñaʼtan: ‹¡Tsiʼ bajñel mele i bʌ! Ilayi tsaʼ bujchi cabʌl teʼ i tsiʼ mele i bʌ ili otot›. Jiñi maʼañic i sujmlel. Jin chaʼan, ¿chucoch yom to mi lac ñop chaʼan tsaʼ jach sʌc tili panchan yicʼot Lum?», cheʼ miʼ yʌl Julia.

«Cheʼ añic majqui miʼ subeñet chaʼan tsaʼ bejqʼui cabʌl tinta ti jumpʼejl imprenta i chaʼan tsaʼ loqʼui jumpʼejl diccionario yaʼi, ¿muʼ ba caj a ñop?», cheʼ miʼ yʌl Gwen.

Jiñi Biblia miʼ subeñet chaʼan maʼ cʼʌn a ñaʼtʌbal (1 Tesalonicenses 5:21). Ili yom i yʌl chaʼan jiñi a chʼujbiya mach yaʼ jach chucul ti:

• CHUQUI MAʼ ÑAʼTAN: «Mi cʌl an majqui ñumen an i pʼʌtʌlel».

• MUʼ BΛ I ÑOP YAÑOʼ BΛ: «Jiñi j cʌñʌyoʼ bʌ miʼ ñopob Dios».

• JIÑI MUʼ BΛ I SUBEÑET CHUQUI YOM MAʼ ÑOP: «Yaʼ ti cotot mic subentel chaʼan yom mic ñop Dios».

Yom a wujil chuqui maʼ ñop chaʼan mach cojach maʼ jacʼ muʼ bʌ i ñop yambʌlob.

«Cheʼ bʌ jiñi maestro miʼ tsictesan bajcheʼ mucʼ ti troñel jiñi lac bʌcʼtal, miʼ ñumen aqʼueñon c ñaʼtan chaʼan añʌch Dios. Jujunchajp am bʌ ti lac bʌcʼtal, anquese mach wen colemic, añʌch i cʼʌjñibal. Mach la cujil chuqui miʼ yujtel ti lac malil. ¡Wen ñucʌch jiñi!», cheʼ miʼ yʌl Teresa.

«Cheʼ bʌ mij qʼuel jiñi wen chan bʌ otot, jiñi barco o jiñi carro, mij cʼajtiben c bʌ, ‹¿majqui tsiʼ mele?›. Jumpʼej ejemplo, yom an juntiquil wen am bʌ i ñaʼtʌbal chaʼan miʼ mel juncojt carro come cabʌl chuqui an i chaʼan i tiʼ pejtelel yom wen miʼ cʌytʌl. Mi añʌch majqui tsiʼ mele jiñi carro, añʌch majqui tsiʼ meleyonla jaʼel», cheʼ miʼ yʌl Richard.

«Cheʼ bʌ tsaʼ c ñumen cʌñʌ chaʼan jiñi ciencia, maʼañix tsaʼ caji c ñumen ñop chaʼan jiñi evolución. [...] Ñumen anto yom chuqui mi laj qʼuel chaʼan mi la ñop jiñi evolución, pero mach cabʌlic chuqui yom mi lac pʌsbentel chaʼan mi lac ñop Dios», cheʼ miʼ yʌl Anthony.

Jiñi científicojob añix ora i cajel i sʌclañob i sujmlel chaʼan jiñi evolución, pero maxto lajalic bajcheʼ miʼ ñaʼtañob. Maʼañic miʼ mejlel i lajob i tʼan i jin tsaʼ poj añoʼ bʌ i ñaʼtʌbal wentʌlel, ¿am ba i wocolel mi maʼañic maʼ ñopbeñob i tʼan?