Wocolix a wʌlʌ tsaʼ wʌqʼue i yorajlel a pejcan ili folleto, chaʼan maʼ ñumen cʌn chuqui miʼ melob i testigojob Jehová yicʼot chaʼan maʼ cʌn bajcheʼ miʼ chaʼleñob eʼtel. Mic pijtan lojon chaʼan tsaʼʌch i coltayet, chaʼan maʼ ñaʼtan woliyʌch c mel lojon chuqui yom Jehová ti ili ora. Mic poj subeñet lojon chaʼan maʼ ñumen cʌn Dios, cheʼ maʼ suben a familia yicʼot a wamigojob chuqui woli bʌ a ñop yicʼot mach a cʌy a tempan a bʌ yaʼ tic tempa bʌ lojon (Hebreos 10:23-25).

Cheʼ maʼ ñumen ñop chaʼan bʌ Jehová, mi caʼ ñumen qʼuel bajcheʼ miʼ cʼuxbiñet tiʼ sujmlel. Cheʼ jini miʼ caj i ñijcan a pusicʼal chaʼan maʼ pʌs chaʼan mucʼʌch a cʼuxbin Jehová jaʼel (1 Juan 4:8-10, 19). ¿Bajcheʼ miʼ mejlel a pʌs ti a cuxtʌlel chaʼan mucʼʌch a cʼuxbin Dios? Cheʼ bʌ maʼ mel chuqui miʼ cʼajtin Dios, ¿bajcheʼ maʼ ñaʼtan chaʼan woliyʌch a taj a wenlel? Yicʼot, ¿chuqui mi caj i coltañet chaʼan maʼ mel chuqui yom Dios yicʼoton lojon? Jini muʼ bʌ i cʌntesañet chaʼan Biblia, wen mi caj i yubin cheʼ bʌ miʼ coltañet a sajcan i jacʼbal jini cʼajtiya tac am a cʼajtibe a bʌ, chaʼan jatet yicʼot a familia «[mi laʼ chʌn ajñel] tiʼ cʼuxbiya Dios [...] chaʼan mi laʼ taj laʼ cuxtʌlel mach bʌ anic miʼ jilel» (Judas 21).

Mic subeñet lojon chaʼan maʼ chʌn chaʼlen xʌmbal ti jiñi bij chaʼan bʌ isujmlel. Cheʼ maʼ pejcan jiñi libro «Chʌn ajñenla tiʼ cʼuxbiya Dios» mi caj i wen coltañet.