¿Muʼ baʼ mulan a sʌclan jumpʼejl temaj am bʌ ti Biblia, a wom bʌ a ñumen chʼʌmben isujm? ¿Am ba jumpʼejl texto a wom bʌ a ñumen chʼʌmben isujm, baqui mi yʌjlel winicob xʼixicob yaʼ ti Biblia, chaʼan jini tejclum tac yicʼot yan tac muʼ bʌ yʌjlel yaʼi? ¿Am baʼ cʼajtibe a bʌ mi jini i Tʼan Dios miʼ mejlel i coltañet chaʼan chuqui woli a cʼojoʼtan? Cheʼ jini, cʼʌñʌ jini biblioteca am bʌ tiʼ Yotlel Tempa bʌ.

Yaʼ mi lac taj jun tac muʼ bʌ i coltañonla. Tajol maʼanic a chaʼan tiʼ pejtelel yan tac bʌ jun loqʼuem bʌ ti Biblia muʼ bʌ i melob i testigojob Jehová am bʌ ti a tʼan. Pero miʼ mejlel a taj libro tac maxto bʌ jali loqʼui yaʼ ti biblioteca am bʌ tiʼ Yotlel Tempa bʌ. Cheʼ an a chaʼan cabʌl libro tac, miʼ mejlel i coltañet, cheʼ bajcheʼ wem bʌ diccionario o yan tac bʌ jun, chaʼan maʼ chʼʌmben isujm woli bʌ a sajcan. Miʼ mejlel a cʼʌn jini biblioteca cheʼ muʼ to caj i tejchel jini tempa bʌ o cheʼ tsaʼix ujti. Mi an jumpʼejl computadora yaʼ ti Yotlel Tempa bʌ, tajol tsaʼ otsʌbenti jini programa i cʼabaʼ Watchtower Library. Iliyi jiñʌch jumpʼejl programa baqui miʼ mejlel a taj yan tac bʌ jun loqʼuem bʌ ti Biblia, chaʼan miʼ mejlel a sʌclan jumpʼejl temaj, tʼan tac o jumpʼejl texto a wom bʌ a chʼʌmben isujm.

Miʼ wen cʼʌjñibʌyel i chaʼan tsʼijbubiloʼ bʌ yaʼ ti tempa bʌ Subtʼan yicʼot Melbalʌl. Mi caj i coltañet jini biblioteca chaʼan maʼ chajpan a parte muʼ bʌ caj a ñusan. Jiñi muʼ bʌ i qʼuel jiñi biblioteca jiñʌch jiñi am bʌ tiʼ wenta jiñi tempa bʌ Subtʼan yicʼot Melbalʌl. Cheʼ jaʼel, miʼ qʼuel mi ochemix jini yan tac bʌ jun loqʼuem bʌ ti Biblia tsaʼ jax to bʌ loqʼui yicʼot miʼ qʼuel mi yaʼʌch an tiʼ yajñib. Jini woli bʌ i cʌntesañet chaʼan Biblia o jini am bʌ tiʼ wenta biblioteca, miʼ mejlel i cʌntesañet bajcheʼ miʼ mejlel a sajcan jini jun tac. Mach yom maʼ chʼʌm majlel ti a wotot jini libro tac yaʼ bʌ an ti biblioteca. Cheʼ jaʼel, yom mi laj cʌntan jini yan tac bʌ jun loqʼuem bʌ ti Biblia yicʼot mach yomic mi lac tsʼijbun.

Jini Biblia miʼ tsictesan, mi com laj «cʌn Dios» yom mi lac chaʼlen wersa lac sajcan «cheʼ bajcheʼ chubʌʼañʌl letsem bʌ i tojol» (Proverbios 2:1-5). Jini biblioteca am bʌ tiʼ Yotlel Tempa bʌ, miʼ mejlel i coltañet a sajcan jini a wom bʌ a ñumen cʌn.

• ¿Bajcheʼ miʼ mejlel i coltañonla jini jun tac am bʌ yaʼ ti biblioteca am bʌ tiʼ Yotlel Tempa bʌ?

• ¿Majqui miʼ mejlel i coltañet a cʼʌn ti wen jini jun tac yaʼ bʌ an ti biblioteca?