Cheʼ miʼ yujtel jumpʼejl tsʌts bʌ wocol, ti orajach jini i testigojob Jehová miʼ chajpañob i bʌ chaʼan miʼ majlel i coltañob i yermanojob. Cheʼ miʼ melob jini, miʼ pʌsob chaʼan tiʼ sujm miʼ cʼuxbiñob i bʌ (Juan 13:34, 35; 1 Juan 3:17, 18). ¿Bajcheʼ mij coltan lojon c bʌ?

Mij cʌcʼ lojon taqʼuin. Cheʼ bʌ tsaʼ ujti tsʌts bʌ wiʼñal ti Judea, jini ñaxam bʌ xñoptʼañob ti Antioquía tsiʼ chocoyob majlel taqʼuin chaʼan miʼ coltañob i yermañojob (Hechos 11:27-30). Lʌcʼʌl lajal jaʼel cheʼ bʌ joñonla mi lac ñaʼtan chaʼan lac quermañojob woliʼ ñusañob wocol ti yan tac bʌ tejclum, mi cʌcʼ lojon taqʼuin yaʼ ti congregación baqui mic tempan lojon c bʌ, chaʼan miʼ cʼʌñob laj quermañojob añoʼ bʌ ti wocol (2 Corintios 8:13-15).

An i cʼʌjñibal jini coltaya muʼ bʌ cʌcʼ lojon. Jini ancianojob miʼ majlelob yaʼ baqui tsaʼ ujti jini wocol, chaʼan miʼ sajcan i yermañojob yicʼot chaʼan miʼ ñaʼtañob maʼanic chuqui tsiʼ chaʼleyob. Jini comité de socorro jiñʌch muʼ bʌ i qʼuel bajcheʼ mi caj i pujquel jini bʌlñʌcʼʌl, jini jaʼ chaʼan bʌ japol, jini pisil tsaʼ bʌ ajqʼui, bajcheʼ mi caj yʌqʼuentelob tsʼac yicʼot baqui mi caj i yajñelob. Cabʌl testigojob miʼ melob eʼtel yujiloʼ bʌ melol, anquese maʼanic miʼ tojtʌlob, chaʼan miʼ tojʼesañob i yotot hermanojob yicʼot Yotlel Tempa bʌ tsaʼ bʌ jejmi. Come temel añon lojon tiʼ tejclum Jehová yicʼot cabʌlix eʼtel an c mele lojon bajcheʼ jini, mic tempan lojon c bʌ ti ora jach chaʼan miʼ mejlel jini eʼtel cheʼ bʌ miʼ yujtel tsʌts bʌ wocol. Anquese mij coltan lojon «jini muʼ bʌ i tem ñopob Dios quicʼot [lojon]», cheʼ jaʼel mij coltan lojon yañoʼ bʌ anquese mach lajalic c ñopbal lojon (Gálatas 6:10, CUXUL BɅ TʼAN).

Mij cʌcʼ lojon coltaya chaʼan tijicña mi yajñelob yicʼot tiʼ chaʼan bʌ Jehová. Jini añoʼ bʌ ti tsʌts bʌ wocol, yom mi lac subeñob wen tac bʌ tʼan chaʼan mi lac tijicñesʌbeñob i pusicʼal. Ti yorajlel wocol mic pʼʌtʼesan lojon c bʌ ti Jehová, jini Dios «muʼ bʌ i ñuqʼuesan lac pusicʼal ti pejtelel wocol» (2 Corintios 1:3, 4). Wen tijicña mic suben lojon jini chʼijiyemoʼ bʌ chaʼan muʼ bʌ yʌl jini Biblia muʼ bʌ i cajel ti ujtel ti tal to bʌ ora yicʼot chaʼan mach jalix jini i Yumʌntel Dios mi caj i jisan tiʼ pejtelel jini wocol muʼ bʌ yʌcʼ cʼuxyajiyel yicʼot ilaya wocol (Apocalipsis 21:4).

• ¿Chucoch i testigojob Jehová ora jach miʼ majlelob ti coltaya cheʼ añob ti wen tsʌts bʌ wocol i yermañojob?

• ¿Chuqui bʌ tʼan tilem bʌ ti Dios miʼ mejlel lac subeñob jini maʼanic bʌ chuqui tsiʼ chaʼleyob ti tsʌts bʌ wocol?