Muʼ bʌ i cʌntesʌntel yaʼ ti Yotlel Tempa bʌ, jiñʌch chaʼan chuqui miʼ yʌl jini Biblia chaʼan i yeʼtel Dios, jini temaj jiñʌch tsaʼ bʌ i cʼʌñʌ Jesús jaʼel cheʼ bʌ tsiʼ chaʼle subtʼan (Lucas 8:1).

Jiñʌch baqui miʼ mejlel jini isujm bʌ chʼujutesaya. Jini i testigojob Jehová yaʼ miʼ tempañob i bʌ chaʼan miʼ loqʼuelob ti subtʼan (Mateo 24:14). Jini Yotlel Tempa bʌ mach lajalic i ñuclel, mach lajalic bajcheʼ melbil tac, maʼanic ñumen ti pʼis bajcheʼ chʼʌlbil yicʼot an i tajol cabʌl congregación tac miʼ lajal cʼʌñob. Maxto cabʌl jabil ñumen, an c mele lojon ñumen ti 10,000 Yotlel Tempa bʌ, (miʼ mejlel cheʼ bʌ joʼpʼejl ti jujumpʼejl qʼuin) chaʼan an baqui miʼ tempañob i bʌ yañoʼ bʌ. ¿Bajcheʼ woli ti mejlel jini? (Mateo 19:26.)

Jiñʌch miʼ cʼʌjñel jini taqʼuin tempʌbil bʌ chaʼan jini. Ili taqʼuin yom miʼ chojquel majlel ti Betel, chaʼan miʼ mejlel i cʼʌn lac quermañojob yom bʌ i melob i Yotlel Tempa bʌ yaʼ ti congregación.

Jiñʌch miʼ melob lac quermañojob maʼanic bʌ tojbilob yicʼot tilemob ti yan tac bʌ tejclum. Ti yonlel país tac mach junmojt jach an jini Muʼ bʌ i mel Yotlel Tempa bʌ wen chajpʌbiloʼ bʌ. Jini waʼchocobil bʌ chaʼan Betel yicʼot muʼ bʌ i chaʼlen coltaya tiʼ melol Yotlel Tempa bʌ, miʼ majlelob ti eʼtel yaʼ baqui miʼ mejlel jumpʼejl congregación, miʼ coltañob tiʼ melol jumpʼejl Yotlel Tempa bʌ. Ti yan tac bʌ tejclum, an yajcʌbil testigojob chaʼan miʼ melob jaʼel jini eʼtel. Ti yan tac bʌ tejclum, tsaʼ yajcʌnti lac quermañojob chaʼan miʼ qʼuelob yicʼot miʼ tojʼesañob Yotlel Tempa bʌ yaʼʌch baqui miʼ chojquelob majlel. Anquese an hermanojob mu’ bʌ i chaʼleñob coltaya, wen yujiloʼ bʌ i melol jini eʼtel, pero ti jumpʼejl tejclum baqui miʼ mejlel ili eʼtel, an lac quermañojob lʌcʼʌl bʌ i congregación, miʼ chaʼleñob coltaya anquese maʼanic tojbilob. Wocolix i yʌlʌ i yespíritu Jehová yicʼot i coltaya muʼ bʌ i melob i yaj eʼtelob tiʼ pejtelel i pusicʼal, jiñʌch chaʼan woliʼ mejlel ili eʼtel tac (Salmo 127:1; Colosences 3:23).

• ¿Bajcheʼ miʼ mejlel Yotlel Tempa bʌ tiʼ pejtelel pañimil?