Cʼʌlʌl ti wajali, yom bʌ Jehová jiñʌch cheʼ temel miʼ yajñel jini familia chaʼan miʼ ñumen pʼʌtʼesañob i chʼujutesayajob (Deuteronomio 6:​6, 7). Jin chaʼan, jini i testigojob Jehová miʼ sajcʌbeñob i yorajlel ti jujumpʼejl semana chaʼan miʼ melob jini chʼujutesaya ti familia, miʼ chajpañob jini wocol bʌ ti chʼʌmbentel isujm, mach lajalic miʼ mejlel bajcheʼ ti jumpʼejl tempa bʌ. Anquese a bajñel jach chumulet, miʼ mejlel a sajcʌben i yorajlel chaʼan maʼ chʼujutesan Dios yicʼot miʼ mejlel a sajcan jumpʼejl temaj ti Biblia muʼ bʌ a wen mulan.

Chaʼan mi lac ñumen lʌcʼtesan lac bʌ ti Dios. «Lʌcʼtesan laʼ bʌ baʼan Dios. Cheʼ jini mi caj i lʌcʼtesan i bʌ baʼ añetla.» (Santiago 4:8.) Miʼ cʼotel lac ñumen cʌn Jehová cheʼ bʌ mi lac ñop bajcheʼ yilal yicʼot chaʼan chuqui tac tsiʼ mele yaʼ bʌ tsʼijbubil tiʼ Tʼan, jini Biblia. Junchajp bajcheʼ yom maʼ tech a mel jini a chʼujutesaya ti familia, jiñʌch cheʼ maʼ sajcʌben i yorajlel chaʼan mi laʼ pejcan ti temel jini Biblia, tajol miʼ mejlel a cʼʌn jini programa muʼ bʌ i cʼʌjñel ti jujumpʼejl semana yaʼ ti tempa bʌ Subtʼan yicʼot Melbalʌl. Yom mi laʼ chajpan chaʼan jujuntiquil miʼ pejcan jini chajpʌbil bʌ, cheʼ jini mi laʼ wʌl chuqui tsijiʼ to bʌ ti laʼ cʌñʌ.

Chaʼan mi lac ñumen lʌcʼtesan lac bʌ ti lac familia. Jini ñujpuñemoʼ bʌ, bajcheʼ jini tatʌlob, ñaʼʌlob yicʼot i yalobilob, miʼ ñumen lʌcʼtesañob i bʌ ti jujuntiquil cheʼ temel miʼ pejcañob jini Biblia. Wen tijicña yom miʼ mejlel jini chʼujutesaya ti familia, cheʼ jini, jujumpʼejl semana mi caj i chʌn pijtañob cheʼ miʼ cʼotel i yorajlel chaʼan miʼ melob. Jini tatʌlob miʼ mejlel i yajcañob ti jini Lac Tsictesʌbentel yicʼot ¡Despertad! o yaʼ ti www.pr418.com/ctu chuqui mi caj i qʼuelob ti chʼujutesaya ti familia, jiñʌch bajcheʼ i jabilel i yalobilob. Miʼ mejlel i chaʼle­ñob tʼan yicʼot i yalobilob chaʼan miʼ ñaʼtañob mi añob i wocol yaʼ ti escuela yicʼot bajcheʼ miʼ mejlel i tojʼesañob. Miʼ mejlel laʼ qʼuel am bʌ ti JW Broadcasting (tv.pr418.com) i alʌla chuqui tsaʼ laʼ cʌñʌ. Miʼ mejlel laʼ ñop laʼ cʼʌyin cántico tac yicʼot mi cheʼʌch laʼ wom, miʼ mejlel laʼ mel chuqui mi laʼ cʼux cheʼ tsaʼix ujti jini chʼujutesaya ti familia.

Jini ora muʼ bʌ laʼ cʼʌn chaʼan mi laʼ chʼujutesan Dios, mi caj i coltan a familia chaʼan tijicña miʼ pejcʌbeñob i Tʼan Dios, cheʼ jini, Jehová mi caj i yʌqʼueñetla cabʌl chuqui wen (Salmo 1:​1-3).

• ¿Chucoch mic sajcʌben lojon i yorajlel jini chʼujutesaya ti familia?

• ¿Chuqui yom miʼ melob jini tatʌlob chaʼan tiʼ pejtelelob mi yubiñob i tijicñʌyel cheʼ miʼ melob chʼujutesaya ti familia?