Cheʼ maxto cʼotem i yorajlel miʼ chʌmel Jesús, tsiʼ chaʼle tʼan yicʼot chʌntiquil xcʌntʼañob i chaʼan: Pedro, Jacobo, Juan yicʼot Andrés. Cheʼ bʌ tsaʼ cajiʼ yʌl chuqui mi caj ti ujtel cheʼ woliyix ti eʼtel bajcheʼ rey ti panchan ti cojix bʌ qʼuin, tsiʼ mele jumpʼejl cʼajtiya wen ñuc bʌ i cʼʌjñibal: «¿Majqui lajal bajcheʼ jini xucʼul bʌ xʼeʼtel am bʌ cabʌl i ñaʼtʌbal? Jini xʼeʼtel tsaʼ aqʼuenti i yeʼtel tiʼ yum chaʼan miʼ yʌqʼueñob i bʌl i ñʌcʼ jini añoʼ bʌ tiʼ yotot cheʼ tiʼ yorajlel» (Mateo 24:3, 45; Marcos 13:3, 4). Jesús tsiʼ sube jini xcʌntʼañob i chaʼan, chaʼan mi caj i yajcan muʼ bʌ caj i yʌcʼ jini cʌntesa lajal bʌ bajcheʼ bʌlñʌcʼʌl tiʼ pejtelel ora chaʼan muʼ bʌ i tsajcañob majlel tiʼ yorajlel cojix bʌ qʼuin. ¿Majqui tsaʼ ochi bajcheʼ jini xʼeʼtel?

Jiñʌch alʌ jun mojt bombiloʼ bʌ, muʼ bʌ i tsajcañob Jesús tiʼ sujmlel. Jini «xʼeʼtel» jiñʌch cʌmbiloʼ bʌ bajcheʼ Junmojt muʼ bʌ i pʌsob bij chaʼan i testigojob Jehová. Jiñʌch mi lac pijtan chaʼan jini xucʼul bʌ xʼeʼtel miʼ yʌqʼueñonla «i bʌl [lac] ñʌcʼ tiʼ yorajlel» (Lucas 12:42).

Miʼ melob jini eʼtel am bʌ ti yotot Dios (1 Timoteo 3:15). Jesús tsiʼ yʌqʼue jini xucʼul bʌ xʼeʼtel wen tsʌts bʌ i yeʼtel, chaʼan miʼ qʼuel jini xñoptʼañob i chaʼan wʌʼ ti Pañimil, ili yom yʌl cheʼ miʼ cʌntʌben i chubʌʼan wʌʼ ti Pañimil, miʼ chajpan bajcheʼ yom miʼ mejlel subtʼan yicʼot miʼ yʌqʼueñonla cʌntesʌntel yaʼ ti congregación tac. Jin chaʼan miʼ yʌqʼueñonla chuqui lac com cheʼ miʼ cʼʌjñibʌyel lac chaʼan, «jini xucʼul bʌ xʼeʼtel am bʌ cabʌl i ñaʼtʌbal» miʼ yʌcʼ jini cʌntesa lajal bʌ bajcheʼ bʌlñʌcʼʌl yaʼ ti jun tac loqʼuem bʌ ti Biblia, muʼ bʌ i cʼʌjñel ti subtʼan yicʼot jini chajpʌbil bʌ muʼ bʌ lac ñichʼtan yaʼ ti congregación.

Jini «xʼeʼtel» wen xucʼul chaʼan chuqui miʼ yʌl jini Biblia tiʼ sujmlel yicʼot woliʼ melob jini eʼtel chaʼan subtʼan aqʼuebiloʼ bʌ, cheʼ jaʼel wen an i ñaʼtʌbal cheʼ miʼ cʌntʌben tiʼ pejtelel i chubʌʼan Cristo wʌʼ ti Pañimil (Hechos 10:42). Woliʼ yocʼan majlel i testigojob Jehová yicʼot woliʼ ñumen pʼojlel jini cʌntesa lajal bʌ bajcheʼ bʌlñʌcʼʌl, come Jehová woliʼ yʌqʼuen bendición jini eʼtel woli bʌ i melob (Isaías 60:22; 65:13).

• ¿Majqui tsiʼ yajca Jesús chaʼan mi yʌqʼueñonla jini cʌntesa lajal bʌ bajcheʼ bʌlñʌcʼʌl?

• ¿Chucoch miʼ subentel bajcheʼ xucʼul bʌ «xʼeʼtel» am bʌ cabʌl i ñaʼtʌbal?