Rebeca tsiʼ cʼuxbi Jehová. I ñoxiʼal, Isaac, tiʼ cʼuxbi Jehová jaʼel. Ti ili cʌntesʌntel mi caj laj qʼuel bajcheʼ tsiʼ cʌñʌyob i bʌ yicʼot mi caj laj cʌn chucoch tsiʼ wen ubi i tijicñʌyel Jehová tiʼ tojlel Rebeca.

I tat Isaac jiñʌch Abraham, i ñaʼ jiñʌch Sara. Abraham tsiʼ ñaʼta chaʼan jiñi yalobil yom miʼ ñujpuñel yicʼot juntiquil xʼixic muʼ bʌ i cʼuxbin Jehová. Pero jiñi yaʼ bʌ chumulob ti Canaán maʼañic miʼ chʼujutesañob Jehová. Jin chaʼan, tiʼ sube juntiquil i wiñic (tajol jiñi Eliezer) chaʼan miʼ majlel ti Harán. ¿Chucoch tsiʼ choco majlel yaʼi? Come yaʼ ti Harán yaʼʌch chumul i piʼʌlob Abraham, i jiñi Eliezer yaʼʌch baqui miʼ mejlel i sʌclʌben juntiquil wem bʌ chaʼan i yijñam Isaac.

Eliezer yicʼot yambʌ i wiñicob Abraham tsiʼ chaʼleyob ñajt bʌ xʌmbal. Tsiʼ pʌyʌyob majlel 10 camello cuchul bʌ i chaʼan bʌlñʌcʼʌl yicʼot majtañʌl tac. Pero ¿bajcheʼ mi caj i taj Eliezer juntiquil xʼixic chaʼan i yijñam Isaac? Eliezer yujil chaʼan jiñi xʼixicob yaʼ ti tejclum miʼ yajñelob ti luch jaʼ ti jumpʼejl pozo. Jin chaʼan, cheʼ bʌ tsaʼ cʼotiyob yaʼ ti Harán, tsaʼ majliyob ti jiñi pozo. Cheʼ jiñi tsiʼ pejca Jehová ti jumpʼejl oración, tsiʼ yʌlʌ: «Mi caj j cʼajtiben juntiquil xchʼoc chaʼan mi yʌqʼueñon jaʼ. Mi mucʼʌch i yʌqʼueñon jaʼ yicʼot mi yʌqʼuen jiñi j camello tac, yom yʌl chaʼan jiñʌch jiñi xchʼoc tsaʼ bʌ a yajca».

Ti jiñi jach bʌ ora tsaʼ cʼoti Rebeca yaʼ ti pozo. Jiñi Biblia mi yʌl chaʼan jiñi xchʼoc  wen i tʼojol jax. Eliezer tsiʼ cʼajtibe jaʼ i jiñi xchʼoc tsiʼ yʌlʌ: «Utsʼat, mi caj cʌqʼueñet jaʼ yicʼot jiñi a camello tac». Come jiñi camello tac on yujil i japol jaʼ, jin chaʼan Rebeca on tsiʼ locʼsa jaʼ. ¡Mach junsujtelic jach tsiʼ chaʼle luch jaʼ! Qʼuele jiñi dibujo am bʌ ti iyopol 6. ¿Chuqui woli (choncol) i mel jiñi Rebeca?... Cheʼ bʌ Eliezer tsiʼ wen qʼuele ti eʼtel Rebeca, maʼañix tsiʼ ñaʼta chuqui mi yʌl. ¡Jehová tsaʼʌch i jacʼbe i yoración!

Eliezer ti yʌqʼue i tʼojol jax bʌ majtañʌl tac jiñi Rebeca, cheʼ jiñi, Rebeca tsiʼ pʌyʌ majlel jiñi wiñicob ti yotot baqui chumul yicʼot i familia. Eliezer tiʼ tsictesa chucoch jiñi Abraham tsiʼ choco majlel yaʼ ti Harán. Yicʼot tsiʼ yʌlʌ bajcheʼ Jehová tsiʼ jacʼbe i yoración. Cheʼ bʌ tsiʼ yubiyob ili, jiñi i piʼʌlob Rebeca wen tijicña tsiʼ yubiyob. Tiʼ subeyob Eliezer: «Weñʌch mij cubin lojon cheʼ miʼ ñujpuñel yicʼot Isaac».

¿Yomʌch ba ñujpuñel Rebeca yicʼot Isaac maʼ wʌl?... Cheʼ bʌ i familia tsiʼ cʼajtibeyob, Rebeca tsiʼ yʌlʌ chaʼan yomʌch. ¿Chucoch? Come yujil chaʼan Jehová jiñʌch tsaʼ bʌ i choco cʼotel Eliezer. Jin chaʼan, tsaʼ majli yicʼot ti Canaán i cheʼ bʌ tsaʼ cʼotiyob yaʼi, Rebeca tsaʼ ñujpuñi yicʼot Isaac.

Rebeca tsiʼ jacʼbe i tʼan Jehová, jin chaʼan tsiʼ wen cʌnta. Mach cojic jach jiñi: Tiʼ pʼolbal Rebeca tsaʼ cʼoti i yilan pañimil Jesús. Jehová mi caj i cʌntañet jaʼel mi mucʼʌch a jacʼben i tʼan cheʼ bajcheʼ Rebeca. Yicʼot wen tijicña mi caj i yajñel yicʼotet.