¿A wujil ba chuqui jiñi tʼan mach bʌ tsictiyemic?... * Jiñi Biblia mi yʌl jumpʼejl «tʼan mach bʌ tsictiyemic» wen ñuc bʌ i cʼʌjñibal. Mach tsictiyemic come maxto yujilic yambʌ wiñicob xʼixicob (quixtañujob). Ili wen ñuc come tilem ti Dios. Ti ñaxan maʼañic majqui yujil. Jiñi ángelob tsiʼ mulaj i ñaʼtañob jaʼel. ¿A wom baʼ cʌn baqui bʌ jiñi tʼan mach bʌ tsictiyemic?...

Dios tsiʼ mele jiñi ñaxam bʌ wiñic yicʼot xʼixic. ¿Chuqui i cʼabaʼob?... Adán yicʼot Eva. Tsaʼ chumleyob ti pʌcʼʌbʌl i cʼabaʼ Edén. Dios tsiʼ chajpa wen i tʼojol jax bʌ ajñibʌl chaʼan miʼ chumtañob. Tsiʼ ñaʼta chaʼan Adán yicʼot i yalobilob miʼ sujtesañob ili Pañimil ti wen i tʼojol jax bʌ cheʼ bajcheʼ jiñi pʌcʼʌbʌl i cʼabaʼ Edén. Dios yom ti yʌlʌ chaʼan miʼ chumtʌlob tiʼ pejtelel ora ti jumpʼejl paraíso. Pero mach cheʼic tsaʼ ujti. ¿Chucoch?

Come Adán yicʼot Eva maʼañic tiʼ jacʼbeyob i tʼan Dios, jin chaʼan wʌle maʼañic chumulonla ti jumpʼejl paraíso. Pero Dios tsiʼ yʌcʼʌ i tʼan chaʼan mi caj i sujtesan ti jumpʼejl paraíso ili Pañimil. Wen tijicña miʼ cajelob ti chumtʌl jiñi quixtañujob yicʼot tiʼ pejtelel ora. ¿Bajcheʼ mi caj i tsʼʌctesan jiñi? Ti cabʌl ora maʼañic majqui tiʼ wis ñaʼta jiñi. ¡Jiñʌch jumpʼejl tʼan mach bʌ tsictiyemic!

Pero xucʼu xucʼul tsaʼ caji ti ñaʼtʌntel. Cheʼ bʌ tsajñi Jesús wʌʼ ti Pañimil, tsiʼ pʌsbe quixtañujob chuqui jiñi mach bʌ tsictiyemic. Tiʼ subeyob chaʼan jiñʌch jiñi i Yumʌntel Dios. Cheʼ mi lac pejcan Dios ti oración, mi laj cʼajtiben: «Laʼ tilic a yumʌntel». ¿Chucoch? Come jiñi Yumʌntel mi caj i sujtesan ili Pañimil ti jumpʼejl paraíso.

¿A wom ba chumtʌl ti jiñi paraíso?... Yom maʼ ñaʼtan chaʼan cojach jiñi muʼ bʌ i jacʼbeñob i tʼan Dios mi caj i chumtʌlob ti jiñi Paraíso. Jiñi Biblia miʼ taj ti tʼan wiñicob xʼixicob tsaʼ bʌ i jacʼbeyob i tʼan Jehová ti wajali. Ti ili folleto mi caj laj cʌn majquiyob jiñi yicʼot bajcheʼ miʼ mejlel lac lajiñob. ¿A wom baʼ cʌñob?...