Qʼuele jiñi wiñicob yaʼ bʌ añob ti dibujo. Jiñobʌch Mateo, Marcos, Lucas, Juan, Pedro, Santiago, Judas yicʼot Pablo. Tsaʼ chumleyob cheʼ ti yorajlel Jesús yicʼot tiʼ tsʼijbuyob chaʼan i cuxtʌlel. Pejtelel tsaʼ bʌ i tsʼijbuyob chaʼan Jesús yaʼan ti Biblia. ¿A wom baʼ ñumen cʌn ili wiñicob?...

Uxtiquil wen yamigojob i bʌ yicʼot Jesús i temel tsiʼ chaʼleyob subtʼan. Jiñobʌch Mateo, Juan yicʼot Pedro. ¿Muʼ ba mejlel a pʌs majquiyob yaʼ ti dibujo?... Mateo yicʼot Juan tsiʼ tsʼijbuyob chaʼan i cuxtʌlel Jesús. Jiñi Apóstol Juan tiʼ  tsʼijbu jiñi libro chaʼan Apocalipsis (o Revelación) yicʼot uxpʼejl carta, muʼ bʌ i subentel bajcheʼ Ñaxam bʌ, i Chaʼpʼejlel yicʼot i Yuxpʼejlel carta i chaʼan Juan. Jiñi apóstol Pedro tiʼ tsʼijbu chaʼpʼejl carta: Ñaxam bʌ yicʼot i Chaʼpʼejlel i chaʼan Pedro. Yaʼ tiʼ chaʼpʼejlel carta, Pedro tsiʼ yʌlʌ cʼax ñuc bʌ tʼan. Tsiʼ yubi cheʼ bʌ Jehová tiʼ yʌlʌ chaʼan tiʼ tojlel Jesús: «Ili jiñʌch calobil. Mic wen cʼuxbin yicʼot wen tijicña mi cubin c bʌ tiʼ tojlel».

Jiñi yambʌ añoʼ bʌ yaʼ ti dibujo tiʼ tsʼijbuyob jaʼel chaʼan Jesús. Juntiquil jiñʌch Marcos. Tajol tiʼ qʼuele tsaʼ bʌ ujti cheʼ tsaʼ chujqui Jesús. Yambʌ jiñʌch Lucas. Juntiquil doctor, tajol jinto tsaʼ sujti ti xñoptʼan cheʼ bʌ tsaʼ chʌmi Jesús.

Chaʼtiquil yijtsʼiñob Jesús tiʼ tsʼijbuyob jaʼel chaʼan tiʼ tojlel. ¿A wujil ba majquiyob?... Yaʼañob ti jiñi dibujo, jiñobʌch Santiago yicʼot Judas. Ti ñaxan maʼañic tsiʼ ñopbeyob i cʌntesa Jesús. ¡Tsiʼ ñaʼtayob chaʼan tsaʼix sojqui! Pero ti wiʼil tiʼ ñopoyob i tsaʼ sujtiyob ti xcʌntʼan.

Wʌle laʼ laj cʌl chaʼan Pablo. ¿Muʼ baʼ taj a qʼuel yaʼ ti dibujo? Cheʼ bʌ maxto xñoptʼañic, i cʼabaʼ jiñʌch Saulo. Tiʼ tsʼaʼle yicʼot tsiʼ ticʼla jiñi xñoptʼañob. ¿A wom baʼ ñaʼtan bajcheʼ tsaʼ sujti ti xcʌntʼan i chaʼan Jesús?... Jumpʼejl bʌ qʼuin cheʼ bʌ woli (choncol) ti xʌmbal majlel ti bij, mach yʌxʌlic yoj ti yubi jumpʼejl tʼan ti panchan. ¿Majqui jiñi? ¡Jiñʌch Jesús! Tiʼ melbe ili cʼajtiya: «¿Chucoch maʼ wen ticʼlan jiñi muʼ bʌ i ñopoñob?». Pablo tsiʼ qʼuele chaʼan yom miʼ qʼuextan i melbal, jin chaʼan tsaʼ sujti ti xñoptʼan. Ti wiʼil tiʼ tsʼijbu 14 libro i chaʼan jiñi Biblia, miʼ tejchel ti carta chaʼan Romanos cʼʌlʌl ti carta chaʼan Hebreos.

¿Ñomach chaʼan mi lac mulan lac pejcan jiñi Biblia ti jujumpʼejl qʼuin?... Yaʼi an cabʌl chuqui mi ca laj cʌn chaʼan Jesús. ¿A wom baʼ ñumen cʌn chaʼan Jesús?...