Qʼuele jiñi alʌ chʼiton yaʼ ti dibujo. I bajñel jach yicʼot an i bʌqʼuen yilal, ¿ñomach? ¿Am baʼ chaʼle bʌqʼuen jatet?... Ti lac pejtelel an lac chaʼle bʌqʼuen. Yaʼ ti Biblia mi yʌl chaʼan jiñi i wiñicob Dios anquese tiʼ cʼuxbiyob Jehová, tsiʼ chaʼleyob bʌqʼuen yicʼot i bajñel tsiʼ yubiyob i bʌ jaʼel. Elías jiñʌch junticlel jiñi. Laʼ laj qʼuel chuqui tsiʼ chaʼle.

Elías tsaʼ chumle ti Israel ti wajali cheʼ bʌ maxto yila pañimil (chʼocʼa) Jesús. Ti jiñi bʌ ora, jiñi rey ti Israel yicʼot yijñam maʼañic tsiʼ cʼuxbiyob Jehová, jiñi isujm bʌ Dios. I cʼabaʼob jiñʌch Acab yicʼot Jezabel, tiʼ chʼujutesayob jiñi mach bʌ isujmic bʌ dios Baal. Jin chaʼan, cabʌl israelob tsiʼ chʼujutesayob jaʼel jiñi Baal. Jiñi yumʌl bʌ Jezabel wen jontol yicʼot tsiʼ mulaj i tsʌnsan pejtel muʼ bʌ i jacʼbeñob i tʼan Jehová. Come Elías miʼ melben chuqui yom Jehová, jin chaʼan tsiʼ mulaj i tsʌnsan jaʼel. ¿Chuqui mejl i mel Elías? ¿Chuqui tsaʼ mele jatetiqui?...

¡Wen ñajt baqui tsaʼ majli! Tsaʼ putsʼi majlel tiʼ tiquiñal pañimil (mulawil) yicʼot tsiʼ mujcuj i bʌ  ti jumpʼejl chʼen. ¿Chucoch tiʼ mujcuj i bʌ?... Come tiʼ chaʼle bʌqʼuen. Pero i wentʌlel maʼañic chucoch tsiʼ chaʼle bʌqʼuen. ¿Chucoch? Come yujil chaʼan Dios mejlʌch i coltan. Coltʌbilix i chaʼan ti yambʌ ora. Jumpʼejl ejemplo, cheʼ bʌ Elías tiʼ mele jumpʼejl oración, Jehová tsiʼ jacʼbe cheʼ bʌ tiʼ choco jubel cʼajc. Jehová wen añʌch i pʼʌtʌlel, ¿ñomach? ¡Elías mejlʌch i ñop chaʼan Jehová mi caj i chaʼ coltan!

Cheʼ bʌ Elías yaʼan ti chʼen, Jehová tsiʼ cʼajtibe: «¿Chuqui woli a mel wʌʼi?». Elías tiʼ jacʼʌ: «Wajali cabʌlob to tsaʼ bʌ i jacʼʌyob a tʼan, wʌle c bajñel jach. Mic bʌcʼñan tsʌnsʌntel bajcheʼ yambʌlob». Tsiʼ ñaʼta chaʼan pejtelel i wiñicob Dios tsaʼ tsʌnsʌntiyob. Pero Jehová tiʼ sube: «Maʼañic, mach a bajñelic jach cʌylemet. Anto cʌlem 7,000 muʼ bʌ i chʼujutesañoñob. Mach a chaʼlen bʌqʼuen come an jumpʼejl eʼtel chaʼan jatet». Cheʼ bʌ Dios tiʼ sube jiñi, ¿bajcheʼ yubil ti yubi i bʌ Elías?... ¡Ti isujm, wen tijicña ti yubi i bʌ!

¿Chuqui miʼ mejlel a cʌn tiʼ tojlel Elías?... Chaʼan an tajol miʼ mejlel a wubin chaʼan a bajñel jach o miʼ mejlel a chaʼlen bʌqʼuen. Cheʼ maʼ wubin a bʌ bajcheʼ jiñi, ¿a wujil ba chuqui yom maʼ ñaʼtan? Chaʼan mach a bajñelic jach come an a wamigojob muʼ bʌ i cʼuxbiñob Jehová yicʼot miʼ cʼuxbiñetob jaʼel. Mach ñajʌyic a chaʼan: Jehová wen an i pʼʌtʌlel yicʼot mi caj i coltañet tiʼ pejtelel ora. ¿Mach ba tijicñayic cheʼ la cujilix jiñi?...