¿A wujil ba majqui jiñi alʌ xchʼoc yaʼ bʌ an ti dibujo?... Jiñi Biblia maʼañic mi yʌlben i cʼabaʼ pero i papá jiñʌch Jefté. Wen tijicña ti yubi Jehová yicʼot Jefté chaʼan wen chuqui tsiʼ mele jiñi xchʼoc. ¿A wom baʼ ñumen cʌn chaʼan Jefté yicʼot yixicʼal (yixicpʼeñal)?

Jefté juntiquilʌch wiñic wen uts bʌ. Tsiʼ yʌqʼue i yorajlel chaʼan miʼ cʌntesan i yixicʼal tiʼ chaʼan bʌ Jehová. Yicʼot jiñʌch pʼʌtʌl bʌ wiñic tsaʼ bʌ i ñaʼta bajcheʼ miʼ coltan jiñi tejclum. Jin chaʼan, jiñi israelob tiʼ subeyob: «¿A wom ba ochel tic yum lojon chaʼan jiñi guerra?».

Jefté tsiʼ cʼajtibe Jehová chaʼ an miʼ coltan i mʌlob (jotob) jiñi guerra. Tiʼ sube chaʼan mi mucʼʌch i mʌl, jiñi ñaxam bʌ miʼ loqʼuel tilel i taj cheʼ bʌ sujtelix mucʼ ti yotot, mi caj i yʌqʼuen Jehová. ¿Chuqui yom yʌl jiñi?  Chaʼan tiʼ pejtelel ora miʼ caj ti chumtʌl yicʼot ti eʼtel (troñel) yaʼ tiʼ Tabernáculo Dios. Jiñi Tabernáculo jiñʌch jumpʼejl ajñibʌl baqui miʼ chʼujutesʌntel Jehová. ¿Tsaʼ ba i mʌlʌ Jefté jiñi guerra? Tsaʼʌch. I cheʼ bʌ tsaʼ cʼoti ti yotot, ¿a wujil ba majqui tsaʼ ñaxan loqʼui i taj?...

¡Jiñʌch jiñi cojach bʌ yixicpʼeñal! Wʌle, Jefté yom miʼ choc majlel ti chumtʌl yaʼ ti Tabernáculo. Jiñi tsiʼ wen aqʼue i chʼijiyemlel pero Jefté tsaʼix yʌqʼue i tʼan Jehová, ¿cʼajal baʼ chaʼan? Jin chaʼan, jiñi xchʼoc tiʼ sube: «Papá, tsaʼix a wʌcʼʌ a tʼan tiʼ tojlel Jehová i yom maʼ tsʼʌctesan».

Ti ñaxan tsaʼʌch yubi i chʼijiyemlel jiñi xchʼoc. ¿Chucoch? Come cheʼ bʌ yaʼix chumul ti Tabernáculo, mach mejlix ti ñujpuñel yicʼot i yʌcʼ yalobil. Pero jiñi xchʼoc yomʌch i tsʼʌctesan jiñi tʼan tsaʼ bʌ yʌcʼʌ i papá. Yicʼot yom chaʼan Jehová tijicña mi yajñel yicʼot. Jiñʌch ñumen ñuc bʌ i cʼʌjñibal i chaʼan i mach jiñic ñujpuñel yicʼot i yʌcʼ yalobil. Jin chaʼan, tsaʼ majli ti Tabernáculo i yaʼ tsaʼ chumle tiʼ pejtelel ora.

¿Tijicña ba ti yubi Jehová yicʼot Jefté chaʼan jiñi xchʼoc maʼ wʌl?... ¡Cheʼʌchi! Jatet maʼ mejlel a lajin i yixicpʼeñal Jefté. Mi mucʼʌch a jacʼben i tʼan Jehová i maʼ wen cʼuxbin, wen tijicña mi caj yajñel yicʼotet. Yicʼot wen tijicña mi caj yubiñob a papá yicʼot a mamá.