Añix 70 jab i chaʼ cajelob ti chumtʌl jiñi israelob yaʼ ti Jerusalén, pero anto yaʼ bʌ chumulob tiʼ joytʌlel jiñi Persia. Juntiquil Israel maxto bʌ yaʼ chumul ti Jerusalén jiñʌch Esdras, juntiquil xmotomaj muʼ bʌ i tsictesʌben i mandar Jehová. Esdras tsaʼ yubi chaʼan maʼañic woli (yʌquel) i jacʼbeñob i mandar Dios yaʼ ti Jerusalén, jin chaʼan tsiʼ ñaʼta majlel i coltañob. Artajerjes, i rey jiñi Persia, tiʼ sube: «Dios tsiʼ yʌqʼuet a ñaʼtʌbal chaʼan maʼ tsictesʌben i Mandar. Jin chaʼan pʌyʌ majlel majqui jach yom majlel a wicʼot». Esdras tsiʼ laj tempa jiñi yomoʼ bʌ chaʼ majlel ti Jerusalén. Tsiʼ cʼajtibeyob Jehová chaʼan miʼ cʌntañob yaʼ ti bij i tsiʼ techeyob xʌmbal.

Chʌmpʼejl uw tsiʼ chaʼleyob xʌmbal chaʼan miʼ cʼotelob ti Jerusalén. I yalobilob rey tiʼ subeyob Esdras: «Jiñi israelob woliʼ ñusʌbeñob i tʼan Jehová i tsaʼix ñujpuñiyob yicʼot xʼixicob muʼ bʌ i chʼujutesañob mach bʌ isujmic dios». ¿Chuqui tsiʼ mele (chaʼle) Esdras? Tsaʼ ñocle tiʼ cantʌlelob i wut i tsiʼ chaʼle oración: «Jehová, cabʌl chuqui utsʼat melbil a chaʼan ti lon c tojlel, pero tsaʼ c chaʼle lojon mulil ti a tojlel». Tsiʼ cʌyʌyob i mul, pero tsaʼ caji i chʌn melob mach bʌ weñic. Jin chaʼan, Esdras tsiʼ waʼchoco ancianojob yicʼot juezob chaʼan miʼ ñaʼtañob chucoch woli ti ujtel jiñi. Uxpʼejl uw tsiʼ chocoyob loqʼuel jiñi maʼañic bʌ tsiʼ jacʼʌ i chʼujutesañob Jehová.

Tsaʼ ñumi 12 jab. I murojlel Jerusalén tsaʼ chaʼ ujti ti tojʼesʌntel. Esdras tsiʼ tempayob yaʼ tiʼ yojlil (xiñil) Jerusalén chaʼan miʼ pejcʌbeñob i Mandar Dios. Cheʼ bʌ tsiʼ jamʌ i juñilel jiñi Mandar, tsaʼ luʼ waʼleyob. Esdras tsiʼ ñuqʼuesa Jehová, i jiñi israelob tsiʼ letsayob i cʼʌb chaʼan miʼ pʌsob chaʼan mucʼʌch i yʌcʼob ti ñuc jiñi tʼan. Ti wiʼil, Esdras tsiʼ pejca jiñi Mandar i tiʼ tsictesa. Tsiʼ wen ñʌchʼtayob. Tsaʼ cajiyob ti uqʼuel come tsiʼ ñaʼtayob chaʼan tsaʼʌch i ñajtʼesayob i bʌ ti Jehová. Tiʼ yijcʼʌlel, Esdras tsaʼ bej caji i pejcan jiñi Mandar. Jiñi israelob tsiʼ ñaʼtayob chaʼan yom miʼ tech i melob jiñi qʼuiñijel chaʼan Lejchempat. Ti ora jach tsaʼ caji i chajpañob i bʌ chaʼan jiñi qʼuiñijel.

 Tsaʼ jalʼa 7 qʼuin jiñi qʼuiñijel i wen tijicña tsiʼ ñusa jiñi israelob. Tsiʼ yʌqʼueyob wocolix i yʌlʌ Jehová chaʼan wen tsaʼ loqʼui jiñi tsaʼ bʌ i pʌcʼʌyob. Maʼañix baʼ i meleyob jiñi qʼuiñijel chaʼan Lejchempat, cojachix tsiʼ meleyob cheʼ bʌ cuxul to Josué. Cheʼ bʌ tsaʼ ujti jiñi qʼuiñijel, tsiʼ tempayob i bʌ i tsiʼ pejcayob Dios: «Jehová, tsaʼ coltayon lojon loqʼuel ti mozo. Tsaʼ wʌqʼueyon lojon i bʌl lon c ñʌcʼ yaʼ ti tiquin bʌ lum yicʼot ili utsʼatax bʌ lum. Pero wen ñusʌbil lon c chaʼan a tʼan. Anquese tsaʼ choco tilel xʼaltʼañob chaʼan miʼ ticʼon lojon, maʼañic tsaʼ lon c jacʼʌ. Pero mach orajic tsaʼ michʼayet. Maʼañic tsaʼ ñajʌyi a chaʼan jiñi tʼan tsaʼ bʌ a wʌqʼue Abraham. Wʌle, mi cʌcʼ lojon c tʼan chaʼan mi caj c chʼujbin lojon a tʼan». Tiʼ tsʼijbuyob jiñi i tʼan tsaʼ bʌ i yʌcʼʌyob, i jiñi i yalobilob rey, levitajob yicʼot motomajob tsiʼ chaʼleyob ti firmar.