Ti jumpʼejl acʼʌlel, Nabucodonosor tsiʼ chaʼle yambʌ ñajal i tsiʼ wen bʌcʼña. Tsiʼ pʌyʌ tilel jiñi añoʼ bʌ i ñaʼtʌbal chaʼan miʼ tsictesʌbeñob i sujmlel, pero maʼañic tsaʼ mejliyob. Ti wiʼil, jiñi rey tsiʼ pejca Daniel.

Nabucodonosor tiʼ sube Daniel: «Tsaʼ c ñajle juntejc teʼ tsaʼ bʌ caji ti colel cʼʌlʌl tsaʼ cʼoti ti panchan. Miʼ mejlel ti qʼuelol tiʼ petol pañimil. Wen utsʼatax i yopol yicʼot am cabʌl i wut. Jiñi añimal tac miʼ cʼajob i yoj tiʼ yʌxñʌlel i yebal i jiñi xmateʼmut miʼ melob i cʼuʼ tiʼ xʌcʼ tac. Ti wiʼil, tsaʼ jubi juntiquil ángel i cʼam tsiʼ yʌlʌ: ‹¡Seqʼuela jiñi teʼ i tsepbenla i cʼʌb! Pero cʌybenla i xujcʼunteʼlel yicʼot i wiʼ. Cʌchʌla ti cadena melbil bʌ ti hierro yicʼot ti cobre. Mi caj i qʼuextʌyel i pusicʼal jiñi teʼ. Mach cheʼix miʼ cajel bajcheʼ i pusicʼal wiñic, cheʼix miʼ cajel bajcheʼ i chaʼan juncojt añimal i mi caj i ñumel 7 jab. Mi caj i luʼ cʌñob chaʼan Dios jiñʌch Yumʌl yicʼot chaʼan miʼ mejlel i yʌqʼuen i yumʌntel majqui jach yom›».

Jehová tiʼ sube Daniel i sujmlel i ñajal jiñi rey. Daniel tsiʼ bʌcʼña cheʼ bʌ tsiʼ chʼʌmbe isujm jiñi ñajal. Tiʼ sube: «C rey, yom to tsaʼ cheʼ tiʼ tojlelic a contrajob mi caj i yujtel tsaʼ bʌ a ñajle, pero ti a tojlel mi caj i yujtel. Jatetʌch jiñi colem teʼ tsaʼ bʌ i seqʼueyob. Mi caj a sʌt a yumʌntel i mi caj a cʼux jam cheʼ bajcheʼ jontol bʌ añimal. Pero jiñi ángel tsiʼ yʌlʌ chaʼan mi caj i cʌybeñob i xujcʼunteʼlel yicʼot i wiʼ. Jiñi yom i yʌl chaʼan mi caj a chaʼ sujtel ti rey».

Cheʼ bʌ tsaʼ ñumi jumpʼejl jab, Nabucodonosor tsiʼ chaʼle xʌmbal tiʼ pam i palacio i tsaʼ caji i wen qʼuel jiñi Babilonia. Tsiʼ yʌlʌ: «¡Wen utsʼatax bʌ tejclum tsaʼ c mele! ¡Wen ñucon!». Cheʼ bʌ woli (choncol) i yʌl jiñi, tsaʼ yubi tʼan ti panchan tsaʼ bʌ i yʌlʌ: «¡Nabucodonosor! Tsaʼix a sʌtʌ a yumʌntel».

Ti jimbʌ ora, Nabucodonosor tsaʼ sojqui i tsaʼ sujti bajcheʼ jontol bʌ añimal. Tsiʼ locʼsayob yaʼ ti palacio i tsaʼ ajñi yicʼot añimal tac yaʼ ti jamil. Tsaʼ tamʼa i jol bajcheʼ i cʼucʼmal xiyeʼ i yejcʼach tsaʼ tamʼa bajcheʼ i chaʼan xmateʼmut.

 Cheʼ tsaʼix ñumi 7 jab, Nabucodonosor tsaʼ tojʼa i Jehová tsiʼ chaʼ otsa ti rey yaʼ ti Babilonia. Cheʼ jiñi tsiʼ yʌlʌ: «Mic ñuqʼuesan Jehová, i Rey panchan. Miʼ yʌcʼ ti quisin jiñi chan bʌ miʼ yubin i bʌ. Cujilix chaʼan Jehová jiñʌch jiñi Yumʌl i miʼ mejlel i yʌqʼuen i yumʌntel majqui jach yom».