Ti jumpʼejl acʼʌlel, jiñi rey Nabucodonosor tsiʼ chaʼle leco bʌ ñajal. Tsiʼ wen pensali i maʼañic tsaʼ wʌyi. Tsiʼ pʌyʌ jiñi muʼ bʌ i ñaʼtañob chuqui mi caj ti ujtel i tiʼ subeyob: «Tsictesʌbeñonla i sujmlel c ñajal». Tsiʼ jacʼbeyob: «C rey, subeñon lojon chuqui tsaʼ ñajle». Pero Nabucodonosor tsiʼ jacʼʌ: «¡Maʼañic! Subeñonla chuqui tsaʼ c ñajle. Mi maʼañic mi laʼ wʌl, mi caj c tsʌnsañetla». Tsiʼ chaʼ jacʼbeyob: «Pero subeñon lojon chuqui tsaʼ ñajle, cheʼ jiñi mi caj c subeñet lojon i sujmlel». Jiñi rey tsiʼ jacʼʌ: «Woli laʼ lotiñon. ¡Subeñonla chuqui tsaʼ c ñajle!». Tsiʼ jacʼbeyob: «Maʼañic majqui miʼ mejlel i ñaʼtan. Mach mejlic ti ñaʼtʌntel».

Nabucodonosor tsaʼ wen michʼa i tsaʼ yʌlʌ chaʼan miʼ tsʌnsʌntel jiñi añob bʌ i ñaʼtʌbal ti jiñi país. Mi caj i tsʌnsʌntel jaʼel Daniel, Sadrac, Mesac yicʼot Abednego. Pero Daniel tiʼ sube jiñi rey chaʼan miʼ tsʼitaʼ pijtan. Cheʼ jiñi, Daniel yicʼot i yamigojob tsiʼ pejcayob Jehová chaʼan miʼ coltañob. ¿Bajcheʼ tsiʼ jacʼʌ Jehová?

Jehová tsiʼ pʌsbe Daniel i ñajal Nabucodonosor i tiʼ sube chuqui i sujmlel. Cheʼ tiʼ yijcʼʌlel, Daniel tsaʼ majli i pejcan i yaj eʼtel jiñi rey i tiʼ sube: «Mach laʼ tsʌnsan jiñi añoʼ bʌ i ñaʼtʌbal. Miʼ mejlel c tsictesan i sujmlel i ñajal jiñi rey». Jiñi xʼeʼtel tsiʼ pʌyʌ majlel Daniel yaʼ baqui an Nabucodonosor. Daniel tiʼ sube jiñi rey: «Dios tsiʼ pʌsbeyet chuqui miʼ caj ti ujtel ti wiʼil. Ili jiñʌch tsaʼ bʌ a ñajle: Tsaʼ qʼuele wiñic melbil bʌ i jol ti oro, i tajn yicʼot i cʼʌb melbil ti plata, i ñʌcʼ yicʼot i yaʼ melbil ti cobre, i yaʼ cʼʌlʌl tiʼ yoc melbil ti hierro yicʼot ti ocʼol. Ti wiʼil, tsaʼ loqʼui colem xajlel ti jumpʼejl wits i tsiʼ jatsʼbe i yoc jiñi wiñic. Tsaʼ tojpʼi, tsaʼ sujti ti tsʼubejn i tsiʼ pʌyʌ majlel jiñi icʼ. Jiñi xajlel tsaʼ sujti ti colem bʌ wits i tsiʼ mʌcta jiñi pañimil».

 Daniel tsiʼ bej sube jiñi rey: «A ñajal yom i yʌl iliyi: A yumʌntel jiñʌch jiñi jolʌl melbil bʌ ti oro. Jiñi melbil bʌ ti plata jiñʌch jumpʼejl yumʌntel muʼ bʌ caj i yochel ti a qʼuexol. Jiñi cobre yom i yʌl yambʌ yumʌntel muʼ bʌ caj i tilel ti wiʼil yicʼot muʼ bʌ caj i yuman ili pañimil. Jiñi yambʌ yumʌntel wen pʼʌtʌl miʼ cajel cheʼ bajcheʼ jiñi hierro. Tiʼ yujtibal, miʼ cajel jumpʼejl yumʌntel muʼ bʌ caj i tʼoxtʌl, junchajp pʼʌtʌl miʼ cajel bajcheʼ hierro i jiñi yambʌ cʼun miʼ cajel bajcheʼ ocʼol. Jiñi xajlel muʼ bʌ i sujtel ti jumpʼejl wits jiñʌch i Yumʌntel Dios, mi caj i luʼ jisan jiñi yumʌntel i mi caj i yajñel tiʼ pejtelel ora».

Nabucodonosor tsaʼ ñocle tiʼ tojlel Daniel i tsiʼ juʼsa i jol i tsiʼ yʌlʌ: «A Dios tsiʼ subet i sujmlel c ñajal. Maʼañic yambʌ dios bajcheʼ jiñi». Nabucodonosor maʼañic tiʼ tsʌnsa Daniel, tsiʼ yʌqʼue wen ñuc bʌ i yeʼtel tiʼ tojlel jiñi wen añoʼ bʌ i ñaʼtʌbal i tsiʼ waʼchoco ti gobernador ti jumpʼejl tejclum yaʼ ti Babilonia. ¿Tsaʼ ba a qʼuele bajcheʼ Jehová tsiʼ jacʼbe i yoración Daniel?