Ester juntiquilʌch judía tsaʼ bʌ chumle yaʼ ti tejclum Persia i cʼabaʼ Susa. Cheʼ an to yom cabʌl jab miʼ yujtel iliyi, jiñi rey Nabucodonosor tsiʼ pʌybe majlel i familia yaʼ ti Jerusalén. Ester tsaʼ coli tiʼ primo i cʼabaʼ Mardoqueo, i yaj eʼtel jiñi rey Asuero yaʼ ti Persia.

Jiñi rey Asuero yom juntiquil tsijiʼ reina. Jin chaʼan jiñi xʼeʼtelob tsiʼ pʌybeyob majlel jiñi i tʼojol jax bʌ xʼixicob ti jiñi país, i tsiʼ pʌyʌyob majlel Ester jaʼel. Tsaʼ cʼoti cabʌl xʼixicob, pero jiñi rey tsiʼ yajca Ester chaʼan miʼ sujtel ti reina. Mardoqueo tiʼ sube Ester chaʼan maʼañic miʼ sub chaʼan chʼoyol ti Judá.

Juntiquil wiñic wen chan bʌ miʼ yubin i bʌ i cʼabaʼ Amán jiñʌch i yum i yalobilob jiñi reyob. Amán yom chaʼan miʼ luʼ lijchocoñob i bʌ tiʼ tojlel. Pero Mardoqueo maʼañic tsiʼ jacʼʌ. Amán tsaʼ wen michʼa i tsaʼ to i ñaʼta i tsʌnsan. Cheʼ bʌ Amán tsaʼ yubi chaʼan Mardoqueo chʼoyol ti Judá, an chuqui tsaʼ caji i ñaʼtan chaʼan miʼ luʼ tsʌnsʌntel jiñi judíojob ti jiñi país. Tiʼ sube jiñi rey: «Wen bʌqʼuentic jiñi judíojob. Yom mi lac luʼ tsʌnsañob». Asuero tsiʼ jacʼʌ: «Mele chuqui ñumen wen maʼ wubin». Tsaʼ yʌqʼue permiso chaʼan miʼ mel jumpʼejl mandar. Ili mandar miʼ yʌl chaʼan yom miʼ tsʌnsʌntel jiñi judíojob cheʼ ti 13 i chaʼan adar.

Ester mach yujilic chaʼan ili mandar. Jin chaʼan Mardoqueo tsiʼ chocbe majlel jumpʼejl i copiajlel jiñi mandar i tiʼ sube: «Yom maʼ pejcan jiñi rey». Ester tsiʼ jacʼʌ: «Majqui jach miʼ majlel i qʼuel jiñi rey cheʼ mach pʌybilic mi caj i tsʌnsʌntel. Añix 30 qʼuin maʼañic miʼ pʌyon jiñi rey. Pero mi caj c majlel. Mi tsiʼ tuchʼu i teʼ tic tojlel, maʼañic mi caj c chʌmel. Pero mi maʼañic tsiʼ tuchʼu, mi caj c chʌmel».

Ester tsaʼ majli yaʼ tiʼ pat i palacio jiñi rey. Cheʼ bʌ jiñi rey tsiʼ taja i qʼuel, tsiʼ tuchʼu i teʼ. Ester tsiʼ lʌcʼtesa i bʌ i jiñi rey tsiʼ cʼajtibe: «¿Chuqui a wom, Ester?». Tsiʼ jacʼʌ: «Com maʼ tilel a wicʼot Amán ti jumpʼejl qʼuiñijel muʼ  bʌ caj c chajpan». Cheʼ bʌ yaʼix añob ti jiñi qʼuiñijel, Ester tsiʼ pʌyʌyob ti yambʌ qʼuiñijel. Cheʼ bʌ tsaʼ majliyob tiʼ chaʼsujtelel jiñi qʼuiñijel, jiñi rey tsiʼ chaʼ cʼajtibe Ester: «¿Chuqui a wom?». Tsiʼ jacʼʌ: «An majqui yom i tsʌnsañon yicʼot añoʼ bʌ ti c tejclum. A wocolic, coltañon lojon». Jiñi rey tsiʼ cʼajti: «¿Majqui yom i tsʌnsañet?». Ester tsiʼ jacʼʌ: «Jiñʌch jiñi wen jontol bʌ wiñic, Amán». Asuero tsaʼ wen michʼa i ti ora jach tsiʼ xiqʼui ti tsʌnsʌntel Amán.

Pero maʼañic majqui miʼ mejlel i yʌp jiñi mandar tsaʼ bʌ i mele (pʌtʌ) Amán, mi jiñic to jiñi rey. Jin chaʼan jiñi rey tiʼ sujtesa Mardoqueo bajcheʼ i yum i yalobilob jiñi reyob i tsiʼ yʌqʼue permiso chaʼan miʼ mel tsijiʼ bʌ mandar. Jiñi mandar miʼ yʌl chaʼan miʼ mejlel i coltañob i bʌ jiñi judíojob cheʼ bʌ miʼ contrajintelob. Cheʼ ti 13 i chaʼan adar, jiñi judíojob tsiʼ jisayob i contra. Cʼʌlʌl ti jiñi bʌ qʼuin, jiñi judíojob jujumpʼejl jab tsaʼ caji i cʼajtesañob cheʼ bʌ tsiʼ jisayob i contra.