Nabucodonosor tsiʼ pʌyʌyob majlel ti Babilonia i yalobilob jiñi rey añob bʌ ti Judá i tsiʼ waʼchoco Aspenaz chaʼan miʼ qʼuelob. Tiʼ sube Aspenaz chaʼan miʼ yajcan jiñi ñumen añoʼ bʌ cʼocʼlel yicʼot i ñaʼtʌbal. Ili xcolelob uxpʼejl jab miʼ cajelob ti cʌntesʌntel chaʼan miʼ sujtelob ti ñuc bʌ xʼeʼtelob yaʼ ti Babilonia. Yom miʼ pejcañob, i tsʼijbuñob yicʼot i cʌñob jiñi tʼan acadio come jiñʌch jiñi tʼan muʼ bʌ i cʼʌjñel yaʼ ti Babilonia. Cheʼ jaʼel, yom miʼ cʼuxob jiñi bʌlñʌcʼʌl muʼ bʌ i cʼuxtʌl yaʼ tiʼ palacio jiñi rey. Ti jiñi tsaʼ bʌ yajcʌntiyob, yaʼan Daniel, Ananías, Misael yicʼot Azarías. Pero Aspenaz tsiʼ yotsʌbeyob i cʼabaʼ bajcheʼ babiloniojob: Beltsasar, Sadrac, Mesac yicʼot Abednego. ¿Muʼ ba caj i ñajtʼesañob ti Jehová jiñi cʌntesʌntel muʼ bʌ caj i chʼʌmob?

 Ili chʌntiquil xcolelob yom i jacʼbeñob i tʼan Jehová. Yujilob chaʼan mach yomic miʼ cʼuxob jiñi bʌlñʌcʼʌl muʼ bʌ i cʼux jiñi rey come an bʌlñʌcʼʌl muʼ bʌ i yʌl i Mandar Jehová chaʼan mach yomic miʼ cʼuxtʌl. Jin chaʼan tiʼ subeyob Aspenaz: «A wocolic, mach a wʌqʼueñon lojon muʼ bʌ i cʼux jiñi rey». Aspenaz tsiʼ jacʼʌ: «Mi mach wen mi laʼ chaʼlen uchʼel i mi tsiʼ qʼuele jiñi rey chaʼan yajyajetla, mi caj i tsʌnsañon».

Daniel an chuqui tsiʼ ñaʼta. Tiʼ sube Aspenaz: «A wocolic, 10 qʼuin com maʼ wʌqʼueñon lojon muʼ bʌ i colel yaʼ ti pʌcʼʌbʌl yicʼot jaʼ. Cheʼ jiñi, lajayon lojon yicʼot jiñi xcolelob mucʼʌch bʌ caj i chaʼleñob uchʼel bajcheʼ jiñi rey». Ili soldado tsaʼʌch i jacʼʌ.

Cheʼ bʌ tsaʼ ñumi 10 qʼuin, Daniel yicʼot jiñi uxtiquil i yamigojob ñumen añob i cʼocʼlel bajcheʼ jiñi yambʌ xcolelob. Jehová tijicña tsaʼ yubi i bʌ tiʼ tojlelob come tsaʼʌch i jacʼbeyob i tʼan. Tsiʼ yʌqʼue i ñaʼtʌbal Daniel chaʼan miʼ chʼʌmben isujm jiñi ñajal tac.

Cheʼ bʌ tsaʼix ujti jiñi uxpʼejl jab i cʌntesʌntelob, Aspenaz tsiʼ pʌyʌyob majlel tiʼ tojlel Nabucodonosor. Jiñi rey tsiʼ pejcayob i tsiʼ qʼuele jiñi Daniel, Ananías, Misael yicʼot Azarías chaʼan wen añob i ñaʼtʌbal bajcheʼ jiñi yañoʼ bʌ. Jin chaʼan tsiʼ yajcayob chaʼan miʼ chaʼleñob eʼtel yaʼ tiʼ palacio. Jiñi rey mach junsujtel jach tsiʼ cʼajtibeyob ticʼojel chaʼan jiñi ñuc tac bʌ i cʼʌjñibal. Jehová tsiʼ ñumen aqʼueyob i ñaʼtʌbal bajcheʼ jiñi yañoʼ bʌ yicʼot jiñi muʼ bʌ i wʌn ñaʼtañob chuqui mi caj i yujtel.

Daniel, Ananías, Misael yicʼot Azarías maʼañobic tiʼ lumal, pero tsiʼ chʌn cʼajtesayob chaʼan añob tiʼ tejclum Jehová. ¿Ixcu jatet? Cheʼ mach yaʼic an a tat a ñaʼ, ¿muʼ ba caj a chʌn cʼajtesan Jehová?