Ti wiʼil, Belsasar tsaʼ sujti ti rey yaʼ ti Babilonia. Ti jumpʼejl bʌ acʼʌlel, tsiʼ chajpa jumpʼejl qʼuiñijel i tsiʼ pʌyʌ mil wiñicob xʼixicob (quixtañujob). Jiñʌch ñumen ñucoʼ bʌ i yeʼtel yaʼ ti país. Tiʼ sube i wiñicob chaʼan miʼ chʼʌmob tilel jiñi vaso tac melbil (pʌtbil) bʌ ti oro tsaʼ bʌ i xujchʼi Nabucodonosor yaʼ tiʼ templo Jehová. Belsasar yicʼot jiñi tsaʼ bʌ i pʌyʌyob tsiʼ cʼʌñʌyob jiñi vaso tac chaʼan miʼ japob vino i tsiʼ ñuqʼuesa i diosob. Cheʼ jiñi, tiʼ sʌc pʌsʌ i bʌ jumpʼejl cʼʌbʌl tsaʼ bʌ caji tsʼijbun tʼan tac yaʼ tiʼ ñʌcʼ jiñi otot baʼ woli (yʌquel) i yujtel jiñi qʼuiñijel.

Belsasar tsiʼ wen bʌcʼña. Tsiʼ pʌyʌ jiñi yujiloʼ bʌ i ñaʼtʌntel chuqui miʼ caj ti ujtel i tiʼ subeyob: «Jiñi muʼ bʌ i tsictesʌbeñon i sujmlel ili tʼan tac, mi caj c sujtesan tiʼ yuxticlel wiñic ñumen ñuc bʌ ti Babilonia». Tsiʼ jopʼo i tsictesʌbeñob pero maʼañic tsaʼ mejliyob. Cheʼ jiñi tsaʼ cʼoti jiñi yumʌl bʌ xʼixic i tiʼ sube: «Juntiquil wiñic i cʼabaʼ Daniel tiʼ tsictesʌbe ti wajali i ñajal tac Nabucodonosor yicʼot wocol tac bʌ ti ñaʼtʌntel. Jin miʼ mejlel i tsictesʌbeñet i sujmlel ili tʼan tac».

Daniel tsaʼ majli i qʼuel jiñi rey. Cheʼ bʌ tsaʼ cʼoti, Belsasar tsiʼ sube: «Mi mucʼʌch i mejlel a pejcan yicʼot a tsictesan i sujmlel ili tʼan tac, mi caj cʌqʼueñet ujʌl melbil bʌ ti oro i mi caj c sujtesañet tiʼ yuxticlel wiñic ñumen ñuc bʌ ti Babilonia». Daniel tsiʼ jacʼbe: «Mach comic majtañʌl. Pero mucʼʌch caj c subeñet i sujmlel jiñi tʼan tac. A tat, Nabucodonosor, tsiʼ wen chanʼesa i bʌ i Jehová tsiʼ pʌsbe bajcheʼ miʼ mejlel i peqʼuesan i bʌ. A wujilix chuqui tsiʼ chaʼle a tat, pero maʼañic tsaʼ qʼuele ti ñuc Jehová. Tsaʼ cʼʌñʌ ti jap vino jiñi vaso tac melbil bʌ ti oro am bʌ yaʼ tiʼ templo. Jin chaʼan Dios tiʼ tsʼijbu ili tʼan: MENÉ, MENÉ, TEKEL yicʼot UPARSÍN. Ili yom i yʌl chaʼan jiñi medojob yicʼot jiñi persiajob mi caj i jisañob Babilonia, i mach chʌn reyix maʼ cajel».

Mach mejlic ti jisʌntel Babilonia yilal come wen chan i murojlel yicʼot joyol ti jaʼ. Pero ti jiñi bʌ acʼʌlel, jiñi  medojob yicʼot jiñi persiajob tsaʼ ochiyob ti Babilonia. Ciro, jiñi rey bʌ ti Persia, tsiʼ yʌmbe i bijlel jiñi jaʼ chaʼan jiñi soldadojob miʼ cʼotelob yaʼ tiʼ puertajlel jiñi tejclum. Cheʼ bʌ tsaʼ cʼaxiyob yaʼ ti jaʼ, ¡jamʌl tsiʼ tajayob jiñi puerta! Tsiʼ jisayob ti ora jiñi tejclum i tiʼ tsʌnsayob jiñi rey. Ciro tsaʼ caji i yuman Babilonia.

Ti jiñi ñaxam bʌ jab i yumʌntel, Ciro tsiʼ yʌlʌ: «Jehová tiʼ subeyon chaʼan mic chaʼ tojʼesʌben i templo yaʼ ti Jerusalén. Mi an judío yom bʌ i chaʼlen coltaya, miʼ mejlel ti majlel». Jin chaʼan, cabʌl tsaʼ chaʼ sujtiyob majlel yaʼ baqui añob i lum cheʼ bʌ añix 70 jab i jisʌntel Jerusalén. Tsaʼ tsʼʌctiyi tsaʼ bʌ i yʌlʌ Jehová. Ciro tsiʼ chaʼ acʼʌ jiñi vaso tac melbil bʌ ti oro yicʼot ti plata yicʼot yan tac bʌ tsaʼ bʌ i xujchʼi Nabucodonosor yaʼ ti templo. ¿Tsaʼ ba a qʼuel bajcheʼ Jehová tsiʼ cʼʌñʌ Ciro chaʼan miʼ coltan i tejclum?