María juntiquilʌch xcolel chumul bʌ ti Nazaret, yaʼ ti Galilea, i tilemʌch tiʼ familia Elisabet. María mi caj i ñujpuñel yicʼot jiñi xjucʼteʼ José. Cheʼ bʌ Elisabet añix 6 uw i cajel i cʌntan alʌl, jiñi ángel Gabriel tsiʼ pʌsbe i bʌ María i tiʼ sube: «¿Bajcheʼ a wilal María? Jehová woli i qʼuelet ti utsʼat». Maʼañic tsiʼ chʼʌmbe isujm tsaʼ bʌ i yʌlʌ jiñi ángel, jin chaʼan tiʼ tsictesʌbe: «Mi caj a cʌntan juntiquil alʌ chʼiton. Jesús mi caj a suben. Mi caj i sujtel ti rey, i mi caj i jalʼan i Yumʌntel tiʼ pejtelel ora».

María tiʼ sube: «Pero maʼañic majqui piʼlebil c chaʼan. ¿Bajcheʼ mi caj cʌcʼ calobil cheʼ jiñi?». Gabriel tsiʼ jacʼbe: «Maʼañic chuqui mach bʌ mejlic i mel Dios. Jiñi chʼujul bʌ espíritu miʼ caj i tilel ti a tojlel, i mi caj a wʌcʼ ti pañimil juntiquil alʌl. A piʼʌl Elisabet, cʌntʌbil i chaʼan juntiquil alʌl jaʼel». María tsiʼ jacʼʌ: «xʼEʼtelon i chaʼan Jehová. Laʼ ujtic bajcheʼ tsaʼ wʌlʌ».

 María tsaʼ majli i julaʼtan Elisabet, yaʼ ti tejclum am bʌ tiʼ pam wits. Tiʼ subu i bʌ cheʼ bʌ tsaʼ cʼoti, Elisabet tsaʼ yubi chaʼan jiñi alʌl tsiʼ ñijca i bʌ yaʼ tiʼ malil i ñʌcʼ. Tsaʼ bujtʼi ti chʼujul bʌ espíritu i tsaʼ yʌlʌ: «María, Jehová tsiʼ yʌqʼuet a bendición. Wen ñuc cheʼ miʼ tilel i julaʼtan cotot i ñaʼ jiñi c Yum». María tsiʼ jacʼʌ: «Mic ñuqʼuesan Jehová tiʼ pejtelel c pusicʼal». Uxpʼejl uw tsaʼ cʌyle tiʼ yotot Elisabet i cheʼ jiñi tsaʼ sujti majlel tiʼ yotot yaʼ ti Nazaret.

Cheʼ bʌ José tsiʼ yubi chaʼan cʌntʌbil i chaʼan alʌl María, maʼañix tsiʼ mulaj ñujpuñel yicʼot. Pero tsiʼ pʌsbe i bʌ juntiquil ángel tiʼ ñajal i tiʼ sube. «Mach a bʌcʼñan ñujpuñel a wicʼot María. Maʼañic melbil i chaʼan mach bʌ weñic». Jin chaʼan José tsaʼ ñujpuñi yicʼot María i tsiʼ pʌyʌ majlel tiʼ yotot.