José yicʼot María chumulob ti Nazaret yicʼot Jesús yicʼot yambʌ i yalobilob. José tsiʼ chaʼle eʼtel bajcheʼ xjucʼteʼ chaʼan miʼ mʌcʼlan i familia. Cheʼ jaʼel, tsiʼ pʌsbeyob i chaʼan bʌ Jehová yicʼot i Mandar. Ñʌmʌlob ti majlel yaʼ ti sinagoga chaʼan miʼ chʼujutesañob Dios yicʼot ti jujumpʼejl jab miʼ majlelob ti Jerusalén chaʼan miʼ melob jiñi qʼuiñijel chaʼan Pascua.

Cheʼ bʌ Jesús an jaxto 12 i jabilel, i familia tsaʼ majliyob ti Jerusalén, cheʼ bajcheʼ ñʌmʌlob. Wen butʼul Jerusalén come cabʌl tsaʼ majliyob ti jiñi qʼuiñijel chaʼan Pascua. Cheʼ bʌ tsaʼ ujti jiñi qʼuiñijel, José yicʼot María tsaʼ cajiyob ti sujtel i tsiʼ ñaʼtayob chaʼan yaʼʌch tilel Jesús yicʼot i familiajob. Pero cheʼ bʌ tsaʼ caji i sʌclañob, maʼañic tsiʼ tajayob.

Jin chaʼan tsaʼ chaʼ majliyob ti Jerusalén i uxpʼejl qʼuin tiʼ sʌclayob. Cheʼ jiñi, tsiʼ tajayob yaʼ ti templo. Jesús buchul yicʼot jiñi xcʌntesajob, woli (yʌquel) i ñʌchʼtañob yicʼot i melbeñob cʼajtiya tac. Toj sajtelob i pusicʼal jiñi xcʌntesajob chaʼan i tʼan Jesús i jiñix tsaʼ caji i melbeñob  cʼajtiya tac. Maʼañix chuqui tsaʼ mejli i yʌlob chaʼan bajcheʼ woli i jacʼ Jesús jiñi cʼajtiya tac. Tsiʼ ñaʼtayob chaʼan miʼ wen chʼʌmben isujm i Mandar Jehová.

José yicʼot María wen woliyob ti pensar. María tiʼ sube: «Calobil, tsaʼix c wen sʌclayet lojon. ¿Baqui añet?». Jesús tsiʼ jacʼʌ: «¿Mach ba laʼ wujilic chaʼan yom mi cajñel tiʼ yotot c Tat?».

Jesús tsaʼ sujti yicʼot i tat i ñaʼ yaʼ ti Nazaret. José tsiʼ cʌntesa Jesús ti jucʼteʼ. ¿Bajcheʼ yilal Jesús maʼ wʌl cheʼ bʌ xcolel to? Jesús tsaʼ caji ti colel yicʼot ti pʼojlel i ñaʼtʌbal. Jin chaʼan Dios yicʼot jiñi wiñicob xʼixicob (quixtañujob) tsaʼ caji i ñumen cʼuxbiñob.