An jumpʼejl lum yaʼ tiʼ pasibal qʼuin am bʌ ti Israel baqui miʼ yʌlob chaʼan jiñi ecʼ miʼ pʌsbeñob jiñi bij. Ti jumpʼejl bʌ acʼʌlel, an wiñicob tilemoʼ bʌ tiʼ pasibal qʼuin tsaʼ bʌ i taja i qʼuelob wen tsʼʌyʌl bʌ ecʼ muʼ bʌ i ñijcan i bʌ, i tiʼ tsajcayob majlel. Jiñi «ecʼ» tsiʼ pʌyʌyob majlel ti Jerusalén. Jiñi wiñicob tsiʼ cʼajtibeyob jiñi tsaʼ bʌ tajob majlel yaʼ ti bij: «¿Baqui an jiñi alʌl muʼ bʌ caj i sujtel tiʼ rey judíojob? Com c lij chocon lon c bʌ tiʼ tojlel».

Herodes, rey bʌ ti Jerusalén, tsaʼ yubi chaʼan jiñi tsijiʼ bʌ rey. Tsiʼ wen pensali i tsiʼ cʼajtibe jiñi ñuc bʌ xmotomajob: «¿Baqui mi caj i yilan pañimil jiñi rey?». Tsiʼ jacʼʌyob: «Jiñi xʼaltʼañob tsaʼ yʌlʌyob chaʼan yaʼ ti Belén». Jin chaʼan Herodes tsiʼ pʌyʌyob tilel jiñi wiñicob chʼoyoloʼ bʌ tiʼ pasibal qʼuin i tiʼ subeyob: «Cucula ti Belén i sʌclanla jiñi alʌl. Cheʼ mi laʼ chaʼ tilel, yom mi laʼ subeñon baqui an come com c lij chocon c bʌ tiʼ tojlel jaʼel». Pero i lot jach.

Jiñi «ecʼ» tsiʼ chaʼ ñijca i bʌ, i jiñi wiñicob tiʼ tsajcayob majlel cʼʌlʌl ti Belén. Jiñi ecʼ tsaʼ waʼle tiʼ pam jumpʼejl otot, jiñi wiñicob tsaʼ ochiyob i tsiʼ tajayob Jesús yicʼot i ñaʼ. Tsiʼ lij chocoyob i bʌ tiʼ tojlel jiñi alʌl i tsaʼ yʌqʼueyob oro, xojocña bʌ pom yicʼot mirra. Pero ¿jiñʌch ba Jehová tsiʼ choco majlel ili wiñicob? Mach jiñiqui.

Ti jiñi bʌ acʼʌlel, Jehová tiʼ sube José tiʼ ñajal: «Herodes yom i tsʌnsan Jesús. Putsʼenla majlel ti laʼ wuxticlel ti Egipto. Cʌylenla yaʼi, jinto mi laʼ sujtel cheʼ bʌ mic subeñetla chaʼan maʼañix wocol». José yicʼot i familia tsaʼ majliyob ti Egipto.

Cheʼ jaʼel, Jehová tiʼ sube jiñi wiñicob chʼoyoloʼ bʌ tiʼ pasibal qʼuin chaʼan maʼañix miʼ chaʼ ñumelob yaʼ baqui an Herodes. Cheʼ bʌ Herodes tsaʼ yubi jiñi, tsaʼ wen michʼa. Herodes maʼañic tsiʼ taja Jesús, jin chaʼan tsaʼ yʌcʼʌ ti tsʌnsʌntel tiʼ pejtelel alobob yaʼ ti Belén cheʼ bʌ i jabilelob bajcheʼ Jesús. Pero maʼañic chuqui tsiʼ chaʼle come tsaʼix majli ti Egipto.

 Cabʌl jab tsaʼ ñumi, i jiñi Herodes tsaʼ chʌmi. Cheʼ jiñi Jehová tiʼ sube José: «Maʼañix wocol. Mux laʼ mejlel ti sujtel». José, María yicʼot Jesús tsaʼ chaʼ majliyob ti Israel i tsaʼ chumleyob yaʼ ti Nazaret.