Juan jiñʌch i yalobil Zacarías yicʼot Elisabet. Jehová tsiʼ waʼchoco bajcheʼ xʼaltʼan yicʼot tsiʼ cʼʌñʌ chaʼan miʼ sub chaʼan mach jalix mi caj i tilel jiñi Mesías. Tsiʼ chaʼle subtʼan ti tiquin bʌ lum i mach yaʼic ti tejclum tac o ti sinagoga tac. Cabʌl chʼoyoloʼ bʌ ti Jerusalén yicʼot tiʼ pejtelel Judea tsaʼ majli i ñʌchʼtʌbeñob i tʼan Juan. Tiʼ subeyob chaʼan yom miʼ cʌy i melob mach bʌ weñic chaʼan toj miʼ qʼuejlelob ti Dios, ili yom i yʌl chaʼan tijicña miʼ yajñel Dios yicʼotob. Jin chaʼan cabʌl tsiʼ cʌyʌyob i mul, i jiñi Juan tsiʼ yʌqʼueyob i chʼʌmjaʼ yaʼ ti Jordán jaʼ.

Juan maʼañic tiʼ sʌcla cabʌl chubʌʼañʌl. Tsiʼ lʌpʌ pisil melbil bʌ tiʼ pʌchʌlel camello, tsiʼ cʼuxu sajcʼ yicʼot tsiʼ japʌ chab. Yom i ñumen cʌñob majqui jiñi Juan. Tsaʼ to majli i qʼuelob jaʼel jiñi fariseojob yicʼot saduceojob wen chan bʌ miʼ yubiñob i bʌ. Juan tiʼ subeyob: «Cʌyʌ laʼ mul yicʼot qʼuextan laʼ melbal. Mi laʼ chanʼesan la bʌ come miʼ laʼ wʌl chaʼan i yalobiletla Abraham, pero jiñi mach yomic i yʌl chaʼan i yalobiletla Dios».

Cabʌl tsiʼ cʼajtibeyob Juan: «¿Chuqui yom mi lon c mel chaʼan wen mij qʼuejlel lojon ti Dios?». Tsiʼ jacʼbeyob: «Mi an chaʼpojch laʼ pislel, aqʼuenla jumpojch jiñi maʼañic bʌ i chaʼan». ¿ A wujil ba chucoch cheʼ tsiʼ subeyob bajcheʼ jiñi? Come Juan yom chaʼan jiñi xcʌntʼañob miʼ ñaʼtañob chaʼan yom miʼ cʼuxbiñob i piʼʌlob, mi yomob cheʼ utsʼat miʼ qʼuejlelob ti Dios.

Tiʼ sube jiñi xchʼʌm tojoñelob: «Mach laʼ chaʼlen xujchʼ i mach laʼ lotin laʼ piʼʌlob». Tiʼ sube jaʼel jiñi soldadojob: «Mach laʼ chaʼlen lot i mach laʼ chʼʌm yambʌ laʼ tojol».

 Jiñi motomajob yicʼot levitajob tsaʼ majli i qʼuelob jaʼel jiñi Juan, i tiʼ subeyob: «Luʼ yom i ñaʼtañob majquiyet». Juan tiʼ subeyob: «Joñoñʌch muʼ bʌ c chaʼlen tʼan ti tiquin bʌ lum muʼ bʌ i ñijcañob majlel wiñicob xʼixicob baʼan Jehová, cheʼ bajcheʼ tsiʼ yʌlʌ jiñi xʼaltʼan Isaías».

Miʼ wen mulan i ñʌchʼtʌbeñob i cʌntesa Juan, i yom i ñaʼtañob mi jiñʌch jiñi Mesías. Jin chaʼan Juan tiʼ subeyob: «Mach jalix mi caj i tilel ñumen pʼʌtʌl bʌ bajcheʼ joñon. Mach ñucoñic chaʼan mic jochben i warach. Joñon tsaʼ cʌqʼueyetla chʼʌmjaʼ, pero jiñi muʼto bʌ caj i tilel, mi caj i yʌqʼueñetla laʼ chʼʌm chʼujul bʌ espíritu».