Cheʼ bʌ tsaʼix ñumi jiñi Pascua, Jesús yicʼot jiñi xcʌntʼañob tsaʼ chaʼ majliyob ti Galilea. Tsaʼ ñumiyob yaʼ ti Samaria i tsiʼ cʼajayob i yoj yaʼ tiʼ pozo Jacob, tiʼ tʼejl jiñi tejclum Sicar. Tsaʼ majliyob ti mʌn waj jiñi xcʌntʼañob yaʼ ti tejclum i Jesús tsaʼ cʌyle i cʼaj i yoj.

Cheʼ jiñi tsaʼ tili juntiquil xʼixic i luch jaʼ yaʼ ti pozo, Jesús tiʼ sube: «Aqʼueñon jaʼ chaʼan mic jap». Jiñi xʼixic tsiʼ yʌlʌ: «Joñon chʼoyolon ti Samaria, ¿chucoch maʼ pejcañon? Jiñi judíojob maʼañic miʼ pejcañob jiñi chʼoyoloʼ bʌ ti Samaria». Jesús tiʼ sube: «Cheʼ muqʼuic a ñaʼtan majquiyon, maʼ cʼajtibeñon chaʼan mi cʌqʼueñet jaʼ, i joñon mi caj cʌqʼueñet jiñi muʼ bʌ i yʌqʼueñet a cuxtʌlel». Jiñi xʼixic tsiʼ cʼajtibe: «¿Chuqui a wom a wʌl? Maʼañic chuqui miʼ mejlel a cʼʌn chaʼan maʼ locʼ jaʼ». Jesús tsiʼ jacʼʌ: «Majqui jach miʼ jap jiñi jaʼ muʼ bʌ cʌcʼ maʼañic miʼ caj i chʌn aqʼuen tiquin tiʼ». Jiñi xʼixic tsiʼ yʌlʌ: «C Yum, aqʼueñon jiñi jaʼ».

Jesús tiʼ sube: «Suben a ñoxiʼal chaʼan miʼ tilel». Jiñi xʼixic tsiʼ jacʼʌ: «Maʼañic ñoxiʼal». Jesús tsiʼ yʌlʌ: «Isujmʌch, come joʼsujtelix tsaʼ taja a ñoxiʼal, i wʌle chumul a wicʼot juntiquil wiñic pero maʼañic ñujpuñem a wicʼot». Jiñi xʼixic tsiʼ jacʼʌ: «Mij qʼuel chaʼan xʼaltʼañet. C tejclum miʼ ñop chaʼan miʼ mejlel lon c chʼujutesan Dios ti ili wits, pero jiñi judíojob miʼ yʌlob chaʼan cojach miʼ mejlel ti chʼujutesʌntel Dios ti Jerusalén. Joñon mic ñop chaʼan cheʼ bʌ miʼ julel jiñi Mesías, mi caj i pʌs bajcheʼ yom miʼ chʼujutesʌntel Dios». Cheʼ jiñi, Jesús tiʼ sube jiñi xʼixic maʼañic bʌ majqui subebil i chaʼan: «Joñoñʌch jiñi Mesías».

Ajñel tsaʼ majli jiñi xʼixic yaʼ tiʼ  tejclum i tiʼ sube jiñi samaritanojob: «Miʼ cʌl tsaʼix c taja jiñi Mesías. Luʼ yujil chuqui ujtem tic tojlel. Laʼ la chaʼan mi laʼ qʼuel». Tsaʼ majliyob yicʼot jiñi xʼixic yaʼ ti pozo chaʼan miʼ ñʌchʼtʌbeñob i cʌntesa Jesús.

Ti wiʼil, jiñi samaritanojob tiʼ subeyob Jesús chaʼan miʼ cʌytʌl yicʼotob. Chaʼpʼejl qʼuin tsaʼ ajñi yaʼ ti tejclum, cabʌl chuqui tsiʼ pʌsbeyob i an tsaʼ bʌ i yʌcʼʌyob i chʼujbiya tiʼ tojlel. Cheʼ jiñi, tiʼ subeyob jiñi xʼixic: «Cheʼ bʌ tsaʼ ujti lon c ñʌchʼtʌben i tʼan jiñi wiñic, mi lon c ñop chaʼan jiñʌch jiñi isujm bʌ xcoltaya i chaʼan wiñicob xʼixicob».