Jesús tsaʼ caji ti subtʼan cheʼ bʌ tsaʼix i chʼʌmʌjaʼ: «I Yumʌntel Dios muqʼuix caj i tilel». Tiʼ tsajcayob ñumel jiñi xcʌntʼañob tiʼ pejtelel Galilea yicʼot Judea. Cheʼ bʌ Jesús tsaʼ chaʼ majli ti Nazaret, tsiʼ julaʼta jiñi sinagoga, tsiʼ jamʌ jiñi bʌlʌl bʌ jun tsaʼ bʌ i tsʼijbu Isaías i cʼam tsiʼ pejca: «Jehová tsaʼ yʌqʼueyon chʼujul bʌ espíritu chaʼan mic sub jiñi wen tʼan». ¿Chuqui i sujmlel jiñi? Jiñi wiñicob xʼixicob (quixtañujob) yom i qʼuelbeñob i milagro tac Jesús. Pero mach cojach tsaʼ aqʼuenti chʼujul bʌ espíritu chaʼan miʼ mel milagro. Ñumen ñuc bʌ i cʼʌjñibal jiñʌch cheʼ miʼ sub jiñi wen tʼan chaʼan bʌ i Yumʌntel Dios. Tiʼ yujtibal, tiʼ sube jiñi woli (yʌquel) bʌ i ñʌchʼtañob: «Wʌle, woliʼ tsʼʌctiyel ili profecía».

Ti wiʼil, Jesús tsaʼ majli yaʼ ti mar am bʌ ti Galilea. Yaʼi tsiʼ taja chʌntiquil xchuc chʌyob i tiʼ subeyob: «Tsajcañonla tilel i mi caj c sujtesañetla ti xchuc wiñicob». I cʼabaʼob jiñʌch Pedro, Andrés, Santiago yicʼot Juan. Ora jach tsiʼ cʌyʌyob i yeʼtel (troñel) i tiʼ tsajcayob Jesús. Tiʼ subuyob i Yumʌntel Jehová tiʼ pejtelel Galilea. Tiʼ subuyob ti sinagoga, ti mercado yicʼot ti calle tac. Tsaʼ wen tsajcʌntiyob ñumel. Tsaʼ caji ti ubintel jiñi woli bʌ i mel Jesús cʼʌlʌl yaʼ ti wen ñajt bʌ lum i cʼabaʼ Siria.

Cheʼ tsaʼ caji ti ñumel qʼuin tac, Jesús tsaʼ yʌqʼue i pʼʌtʌlel chaʼtiquil uxtiquil xcʌntʼañob chaʼan miʼ tsʼʌcan jiñi cʼamoʼ bʌ yicʼot chaʼan miʼ locʼsan xibajob. Jiñi yambʌ xcʌntʼañob tsaʼ majli yicʼotob Jesús yaʼ ti tejclum tac chaʼan miʼ subob jiñi wen tʼan. Tsiʼ piʼleyob ñumel jaʼel junmojt xucʼul bʌ xʼixicob tsaʼ bʌ i coltayob Jesús yicʼot jiñi xcʌntʼañob i chaʼan. I cʼabaʼob jiñʌch María Magdalena, Juana, Susana yicʼot yambʌlob.

Cheʼ bʌ tsaʼix i cʌntesa jiñi xcʌntʼañob, Jesús tsiʼ chocoyob majlel ti subtʼan. Cheʼ bʌ woli i ñumelob majlel ti Galilea, cabʌl to tsaʼ bej sujtiyob ti xcʌntʼan i chaʼan Jesús i tsiʼ chaʼleyob chʼʌmjaʼ. An cabʌl wen yom bʌ i tsajcañob ñumel Jesús, jin chaʼan tsiʼ lajayob bajcheʼ jiñi cholel yomix bʌ cʼajol. Tiʼ subeyob: «Pejcanla Jehová chaʼan miʼ ñumen choc tilel xʼeʼtelob chaʼan jiñi cʼajbal». Ti wiʼil, tsiʼ yajca 70 xcʌntʼañob i  chaʼan i tsiʼ chocoyob majlel ti chaʼchaʼtiquil chaʼan miʼ chaʼleñob subtʼan tiʼ pejtelel Judea. Tiʼ subeyob majqui jach bʌ quixtañujob chaʼan jiñi i Yumʌntel Dios. Cheʼ bʌ tsaʼ sujtiyob majlel yaʼ baqui an Jesús, tsiʼ wen mulaj i subeñob bajcheʼ yilal tsiʼ ñusayob. Jiñi Diablo maʼañic chuqui tsaʼ mejli i mel chaʼan miʼ waʼchocon jiñi subtʼan.

Jesús tsiʼ chajpa jiñi xcʌntʼañob chaʼan miʼ bej melob ili ñuc bʌ eʼtel cheʼ bʌ miʼ chaʼ majlel ti panchan. Tiʼ subeyob: «Subula jiñi wen tʼan chaʼan bʌ i Yumʌntel Dios tiʼ petol pañimil. Pʌsbenla i tʼan Dios jiñi wiñicob xʼixicob yicʼot aqʼuenla chʼʌmjaʼ».