Juan añix ora cajel i sub ili tʼan: «Mux mi caj i tilel ñumen pʼʌtʌl bʌ bajcheʼ joñon». Cheʼ bʌ Jesús añix 30 i jabilel, tsaʼ loqʼui ti Galilea i tsaʼ majli yaʼ ti Jordán jaʼ. Yaʼi, Juan woli (choncol) i yʌcʼ chʼʌmjaʼ. Jesús yom jaʼel chaʼan Juan miʼ yʌqʼuen chʼʌmjaʼ, pero Juan tsiʼ yʌlʌ: «Mach joñoñic yom mi cʌqʼueñet chʼʌmjaʼ. Jatet yom maʼ wʌqʼueñon». Jesús tsiʼ jacʼʌ: «Jehová yom chaʼan jatet maʼ wʌqʼueñon chʼʌmjaʼ». Jin chaʼan tsaʼ ochiyob yaʼ ti Jordán jaʼ, i Juan tiʼ supʼu Jesús yaʼ ti jaʼ.

Cheʼ bʌ tsaʼ loqʼui Jesús yaʼ ti jaʼ, tsiʼ pejca Jehová. Ti jiñi bʌ ora, tsaʼ jajmi jiñi panchan, i tsaʼ jubi tilel i yespíritu Dios tiʼ tojlel cheʼ bajcheʼ juncojt xʼujcuts. Cheʼ jiñi, Jehová tsiʼ chaʼle tʼan yaʼ ti panchan: «Calobilet, mij cʼuxbiñet, wen utsʼat mij qʼuelet».

Cheʼ bajcheʼ jiñi, Jesús tsaʼ aqʼuenti i yespíritu Jehová, i ti jiñi bʌ ora tsaʼ sujti ti Cristo o Mesías. Mux i mejlel i tech jiñi eʼtel tsaʼ bʌ i sube Jehová chaʼan miʼ mel wʌʼ ti lum.

Cheʼ bʌ tsaʼ ujti i chʼʌmjaʼ, Jesús tsaʼ majli 40 qʼuin yaʼ ti tiquin bʌ lum. Cheʼ bʌ tsaʼ sujti tilel, tsaʼ majli i julaʼtan Juan. Tsiʼ qʼuele chaʼan yaʼ tilel Jesús i tsiʼ yʌlʌ: «Ili jiñʌch i Tiñʌmeʼ Dios muʼ bʌ caj i jisʌben i mul ili pañimil». Tsiʼ yʌlʌ iliyi chaʼan miʼ ñaʼtan jiñi quixtañujob chaʼan Jesús jiñʌch jiñi Mesías. ¿A wujil ba chuqui tsiʼ chaʼle Jesús cheʼ bʌ yaʼan ti tiquin bʌ lum? Laʼ laj qʼuel.