Jiñi fariseojob tiʼ tsʼaʼleyob Jesús yicʼot tiʼ sʌclayob bajcheʼ miʼ mejlel i cʌchob. Tsiʼ yʌlʌyob chaʼan Jesús mach yomic miʼ tsʼʌcan xcʼamʌjelob cheʼ ti sábado come i yorajlel cʼaj o. Jesús tsiʼ qʼuele juntiquil wiñic ti sábado muʼ bʌ i cʼajtin taqʼuin yaʼ ti calle. Jin chaʼan tiʼ subeyob jiñi xcʌntʼañob i chaʼan: «Qʼuelela bajcheʼ miʼ caj i coltan ili wiñic i pʼʌtʌlel Dios». Jesús tsiʼ xʌcʼʌ i tujb yicʼot lum chaʼan miʼ mel (pʌt) ocʼol. Cheʼ jiñi, tsiʼ bombe tiʼ wut jiñi wiñic i tiʼ sube: «Cucu poco a wut ti tsʼʌmibʌl am bʌ ti Siloé». Jiñi wiñic tsiʼ jacʼʌ i tsaʼ cʼoti i wut ti jimbʌ ora.

Toj sajtelob i pusicʼal jiñi wiñicob xʼixicob (quixtañujob), i tsiʼ yʌlʌyob: «¿Mach ba jiñic ili muʼ bʌ i buchtʌl i cʼajtin taqʼuin? ¿O yambʌ wiñic lajal jach bʌ yicʼot?». Jiñi wiñic tsiʼ jacʼʌ: «Joñoñʌch jiñi xpotsʼ bʌ tsaʼ quila pañimil». Jiñi quixtañujob tsiʼ cʼajtibeyob: «¿Chucoch muqʼuix i cʼotel a wut?». Tsiʼ yʌlʌ chuqui tsaʼ bʌ ujti. Cheʼ jiñi, tsiʼ pʌyʌyob majlel yaʼ baʼan jiñi fariseojob chaʼan miʼ pejcañob.

Jiñi wiñic tiʼ sube jiñi fariseojob: «Jesús tsiʼ bombeyon c wut ti ocʼol i tiʼ subeyon chaʼan mic poc. Tsaʼ c mele i wʌle muqʼuix i cʼotel c wut». Jiñi fariseojob tsiʼ yʌlʌyob: «Mi Jesús miʼ chaʼlen tsʼʌcaya ti sábado, mach tilemic ti Dios i pʼʌtʌlel ». Pero an tsaʼ bʌ i yʌlʌyob: «Mi mach tilemic ti Dios i pʼʌtʌlel, ¿bajcheʼ miʼ mejlel i tsʼʌcan jiñi cʼamoʼ bʌ?».

Jiñi fariseojob tsiʼ chocoyob ti pʌyol i tat i ñaʼ jiñi wiñic i tsiʼ cʼajtibeyob: «¿Bajcheʼ an  cheʼ muqʼuix i cʼotel i wut a walobil?». Tsiʼ chaʼleyob bʌqʼuen jiñi tatʌlob come jiñi fariseojob albilix i chaʼañob chaʼan mi caj i chocob loqʼuel yaʼ ti sinagoga jiñi muʼ bʌ i ñopob Jesús. Jiñi tatʌlob tsiʼ jacʼʌyob: «Mach lon cujilic. Jatetla yom mi laʼ cʼajtiben». Jiñi fariseojob tsiʼ bej cʼajtibeyob jiñi wiñic, i tsiʼ jacʼʌ: «Tsaʼix cʌlʌ jiñi tsaʼ bʌ ujti. ¿Chucoch muʼto a bej cʼajtibeñonla?». Tsaʼ michʼayob jiñi fariseojob i tsiʼ chocoyob loqʼuel jiñi wiñic.

Ti wiʼil, Jesús tsaʼ majli i qʼuel jiñi wiñic i tsiʼ cʼajtibe: «¿Am baʼ ñopoñel ti jiñi Mesías?». Jiñi wiñic tsiʼ jacʼʌ: «Cheʼ cujilic majqui jiñi Mesías, mi cʌcʼ c ñopoñel tiʼ tojlel». Jesús tiʼ sube: «Joñoñʌch jiñi Mesías». ¿Maʼan ba tsiʼ pʌsʌ i yutslel Jesús tiʼ tojlel ili wiñic? Tiʼ tsʼʌca i tsiʼ colta chaʼan miʼ taj i ñopoñel ti Dios.