Cheʼ lʌcʼʌlix jiñi Pascua cheʼ ti jabil 32, jiñi apóstolob wen lujbeñob come tsajñiyob ti subtʼan. Jesús tsiʼ pʌyʌyob majlel ti Betsaida chaʼan miʼ cʼajob i yoj. Pero cheʼ bʌ muqʼuix caj i cʼotelob yaʼ ti mar Jesús tsiʼ qʼuele yonlel wiñicob xʼixicob (quixtañujob) tsaʼ bʌ i tsajcayob tilel. Cojach yom ajñel yicʼot i apóstolob, pero tsiʼ pejca ti utsʼat bʌ tʼan jiñi quixtañujob. Tiʼ tsʼʌca jiñi cʼamoʼ bʌ yicʼot cabʌl chuqui tsaʼ caji i pʌsbeñob. Ti jumpʼejl qʼuin tiʼ subeyob chaʼan i Yumʌntel Dios. Cheʼ ochix qʼuin, jiñi apóstolob tiʼ subeyob Jesús: «Añobix i wiʼñal. Subeñob chaʼan miʼ majlel i mʌñob i bʌl i ñʌcʼ».

Pero Jesús tsiʼ yʌlʌ: «Mach wersajic miʼ majlelob. Aqʼuenla chuqui miʼ cʼuxob». Jiñi apóstolob tsiʼ cʼajtibeyob Jesús: «¿A wom ba mic majlel c mʌn lojon tilel?». Felipe, apóstol bʌ jaʼel, tsiʼ yʌlʌ: «Anquese an cabʌl lac taqʼuin mach mejlic lac mʌn cabʌl bʌlñʌcʼʌl chaʼan ili quixtañujob».

Jesús tsiʼ cʼajti: «¿Bajcheʼ cʼamel an i bʌ lac ñʌcʼ?». Andrés tsiʼ jacʼʌ: «An joʼqʼuejl caxlan waj yicʼot chaʼcojt chʌy. Pero mach jasʌlic jiñi». Jesús tsiʼ yʌlʌ: «Chʼʌmʌla tilel». Cheʼ jiñi, tiʼ sube jiñi quixtañujob chaʼan miʼ buchtʌlob ti jujunmojt, ti 50 yicʼot ti 100. Tsiʼ chʼʌmʌ jiñi caxlan waj yicʼot jiñi chʌy, tsiʼ qʼuele ti panchan i tsiʼ chaʼle oración. Cheʼ jiñi, tsiʼ yʌqʼue jiñi apóstolob chaʼan miʼ pucob. Tsiʼ cʼuxuyob i waj jiñi 5 mil wiñicob yicʼot jiñi xʼixicob yicʼot xbiʼtalob jaʼel, i tsaʼ laj ñajʼayob. Ti wiʼil, jiñi apóstolob tsiʼ  lotoyob i colobal chaʼan maʼañic miʼ yʌsiyel. ¡Tsaʼ tempʌyi 12 chiquib! ¿Mach ba ñuc bʌ milagro jiñi?

Tsiʼ mulayob tsaʼ bʌ i mele Jesús, jin chaʼan yom i yotsañob bajcheʼ rey. Pero Jehová mach yomic chaʼan miʼ yochel ti rey i Yalobil come maxto i yorajlel, i Jesús yujilʌch. Jin chaʼan tsiʼ chocoyob sujtel i tiʼ sube jiñi apóstolob chaʼan miʼ cʼaxelob tiʼ junwejlel jiñi mar am bʌ ti Galilea. Tsaʼ cʼʌjquiyob ti barco i tsaʼ majliyob, pero Jesús tsaʼ majli ti wits. ¿Chucoch? Come yom i pejcan i Tat. Anquese cabʌl i yeʼtel (troñel) Jesús, tsiʼ locʼsʌbe i yorajlel chaʼan miʼ mel oración.