Jesús miʼ mejlel i lajmesan xcʼamʌjelob yicʼot miʼ tech chʌmeñoʼ bʌ. Cheʼ jaʼel miʼ ticʼ jiñi icʼ yicʼot jaʼal. Cheʼ bʌ Jesús tsaʼ ujti ti oración yaʼ ti wits, tsiʼ qʼuele chaʼan woli (choncol) wen tsʌts bʌ icʼ jaʼal yaʼ ti mar am bʌ ti Galilea. Wocol choncol i ñijcañob majlel barco jiñi apóstolob come wen tsʌts jiñi icʼ. Jesús tsaʼ jubi yaʼ ti wits i tsaʼ caji ti xʌmbal yaʼ ti jaʼ chaʼan miʼ cʼotel yaʼ ti barco. Cheʼ bʌ tsiʼ qʼueleyob jiñi apóstolob, tsaʼ wen bʌcʼñayob. Pero Jesús tsiʼ yʌlʌ: «Joñoñʌch. Mach laʼ chaʼlen bʌqʼuen».

Pedro tsiʼ yʌlʌ: «C Yum, mi jatetʌch, subeñon chaʼan mic tilel yaʼ baʼañet». Jesús tiʼ sube: «¡Laʼ!». Pedro tsaʼ loqʼui yaʼ ti barco i tsaʼ caji ti xʌmbal tiʼ pam jaʼ anquese an icʼ yicʼot jaʼal. Cheʼ bʌ lʌcʼʌlix yaʼ baqui an Jesús, tsiʼ qʼuele jiñi tsʌts bʌ icʼ yicʼot jaʼal, i tsaʼ caji ti bʌqʼuen. Tsaʼ yubi chaʼan wolix ti sujpʼel i tsaʼ yʌlʌ: «¡C Yum, coltañon!». Jesús tsiʼ chucbe i cʼʌb i tiʼ sube: «¿Chucoch tsaʼ cajiyet ti bʌqʼuen? ¿Maʼañic baʼ ñopoñel?».

Jesús yicʼot Pedro tsaʼ letsiyob ti barco, i tsaʼ lajmi jiñi icʼ yicʼot jaʼal. ¿Muʼ baʼ ñaʼtan bajcheʼ yubil tsaʼ yubi jiñi apóstolob? Tsiʼ yʌlʌyob: «Tiʼ sujm, i Yalobiletʌch Dios».

Jesús mach cojach junyajl tsiʼ tiqʼui jiñi icʼ yicʼot jaʼal. Ti yambʌ ora, cheʼ bʌ woliʼ cʼaxel yicʼot jiñi apóstolob tiʼ junwejlel jiñi mar, Jesús tsaʼ wʌyi yaʼ ti barco. Cheʼ jiñi, tsaʼ caji tsʌts bʌ icʼ yicʼot jaʼal. Tsaʼ caji i jatsʼ jiñi barco i tsaʼ caji ti ochel jaʼ. Jiñi apóstolob tsiʼ yotayob Jesús chaʼan miʼ tejchel: «¡Maestro, mi caj lac chʌmel! ¡Coltañon lojon!». Jesús tsaʼ chʼojyi i tiʼ sube jiñi mar: «¡Ñʌjchʼen! ¡Lajmen!». Ti ora jach tsaʼ ñʌjchʼi jiñi icʼ yicʼot mar. Jesús tsiʼ cʼajtibe jiñi apóstolob: «¿Maʼañic ba laʼ chʼujbiya?». Cheʼ jiñi, tsaʼ caji i subeñob i bʌ: «¡Jinto jiñi icʼ yicʼot mar miʼ jacʼben i tʼan!». Jiñi apóstolob tsiʼ ñaʼtayob chaʼan mi mucʼʌch i ñopob Jesús ti tsʼʌcʌl, maʼañic chuqui yom miʼ bʌcʼñañob.