Cheʼ bʌ tsaʼ chʌmi Jesús, juntiquil wiñic wen chumul bʌ i cʼabaʼ José tiʼ sube Pilato chaʼan miʼ caj i juʼsan Jesús yaʼ ti teʼ. José tsiʼ bʌcʼʌ Jesús ti lino bʌ pisil yicʼot tsiʼ boño ti xojocña bʌ tsʼac, cheʼ jiñi tsaʼ majli i yotsan ti jumpʼejl tsijiʼ bʌ mucoñibʌl. Ti wiʼil, tsaʼ yʌcʼʌ ti selcʼuntel majlel colem xajlel chaʼan miʼ mʌcbeñob i tiʼ. Jiñi motomajob tiʼ subeyob Pilato: «Mi j cʼojoʼtan lojon chaʼan jiñi xcʌntʼañob miʼ xujchʼibeñob loqʼuel i bʌcʼtal Jesús yicʼot chaʼan miʼ yʌlob chaʼan tsaʼix chaʼ chʼojyi». Jin chaʼan Pilato tiʼ subeyob: «Wen mʌcbenla i tiʼ jiñi mucoñibʌl yicʼot chocola majlel xcʌntayajob».

Cheʼ ñumeñix uxpʼejl qʼuin, an xʼixicob tsaʼ bʌ majliyob yaʼ ti mucoñibʌl cheʼ ti sʌcʼan. Tsiʼ qʼueleyob chaʼan tsaʼ ñijcʌnti jiñi xajlel come jajmeñix jiñi mucoñibʌl. Yaʼ tiʼ malil an juntiquil ángel tsaʼ bʌ i yʌlʌ: «Mach laʼ chaʼlen bʌqʼuen. Jesús tsaʼix chʼojyi. Subenla jiñi xcʌntʼañob chaʼan miʼ majlel i qʼuelob yaʼ ti Galilea».

María Magdalena ora tsaʼ majli i sʌclan Pedro yicʼot Juan. Tiʼ subeyob: «An majqui tsiʼ chʼʌmbe i bʌcʼtal Jesús». Pedro yicʼot Juan ajñel tsaʼ majliyob yaʼ ti mucoñibʌl. Cheʼ bʌ tsiʼ qʼueleyob chaʼan jocholix, tsaʼ chaʼ sujtiyob tiʼ yotot.

Ti wiʼil, María tsaʼ chaʼ majli yaʼ ti mucoñibʌl. Tsiʼ qʼuele chaʼtiquil ángelob yaʼ tiʼ malil jiñi mucoñibʌl i tiʼ subeyob: «Mach cujilic baqui tsiʼ chʼʌmʌyob majlel jiñi c Yum». Cheʼ jiñi, tsiʼ qʼuele juntiquil wiñic i tsiʼ ñaʼta chaʼan jiñʌch jiñi xcʌnta pʌcʼʌbʌl. Tsiʼ cʼajtibe: «C yum, a wocolic, subeñon baqui tsaʼ wʌcʼʌ». Cheʼ bʌ jiñi wiñic tsiʼ yʌlʌ: «¡María!», tsiʼ ñaʼta chaʼan jiñʌch Jesús. María tsiʼ yʌlʌ: «¡Maestro!», i tsiʼ chucu. Jesús tiʼ sube: «Suben jiñi quermañojob chaʼan tsaʼ qʼueleyon». Ti jimbʌ ora, María ajñel tsaʼ majli i suben jiñi xcʌntʼañob chaʼan tsiʼ qʼuele Jesús.

Cheʼ ti ochʼajel qʼuin, chaʼtiquil xcʌntʼañob tsaʼ loqʼuiyob ti Jerusalén chaʼan miʼ majlelob ti Emaús. Juntiquil wiñic tsaʼ caji ti xʌmbal majlel yicʼotob i tsiʼ cʼajti chuqui woli (choncol) i yʌlob. Tsiʼ jacʼʌyob: «¿Maxto ba a wujilic? Añix uxpʼejl qʼuin tiʼ tsʌnsayob Jesús jiñi motomajob. Pero wʌle an xʼixicob muʼ bʌ i yʌlob chaʼan tsaʼix chaʼ chʼojyi». Jiñi wiñic tsiʼ  yʌlʌ: «¿Maʼañic ba mi laʼ ñop tsaʼ bʌ yʌlʌ jiñi xʼaltʼañob? Tsiʼ yʌlʌyob chaʼan wersa mi caj i chʌmel Cristo yicʼot chaʼan mi caj i chaʼ chʼojyel». Jesús tsaʼ caji i ñumen tsictesʌbeñob jiñi Tsʼijbujel. Cheʼ bʌ tsaʼ cʼotiyob ti Emaús, jiñi xcʌntʼañob tiʼ subeyob chaʼan miʼ cʌytʌl yicʼotob. Cheʼ bʌ woliyob ti uchʼel, jiñi wiñic tsiʼ mele jumpʼejl oración chaʼan jiñi caxlan waj i jiñi xcʌntʼañob tsiʼ ñaʼtayob chaʼan jiñʌch Jesús. Cheʼ jiñi tsaʼ sʌc majli.

Ili chaʼtiquil xcʌntʼañob tsaʼ majliyob ti Jerusalén. Tsaʼ cʼotiyob yaʼ baqui an jiñi apóstolob i tiʼ subeyob tsaʼ bʌ ujti. Cheʼ bʌ yaʼañob ti malil jiñi otot, Jesús tsiʼ pʌsʌ i bʌ. Ti ñaxan, jiñi apóstolob maʼañic tsiʼ ñopoyob mi jiñʌch Jesús. Pero tsiʼ yʌlʌ. «Qʼuelela j cʼʌb, tʌlʌyonla. Tsʼijbubilix chaʼan mi caj i chaʼ chʼojyel Cristo yaʼ baqui an chʌmeñoʼ bʌ».