Ti jujumpʼejl jab jiñi judíojob tsiʼ meleyob (chaʼleyob) jiñi Pascua cheʼ ti 14 i chaʼan nisán. Ili miʼ cʼajtesʌbeñob chaʼan Jehová tsiʼ coltayob loqʼuel ti mozojintel yaʼ ti Egipto yicʼot chaʼan tsaʼ pʌjyiyob majlel yaʼ ti Lum tsaʼ bʌ wʌn Subentiyob. Ti jabil 33, Jesús yicʼot i apóstolob tsiʼ meleyob jiñi Pascua ti jumpʼejl cuarto am bʌ tiʼ chaʼlajmlel jumpʼejl otot ti Jerusalén. Cheʼ tsaʼ ujti i melob jiñi cena, Jesús tsiʼ yʌlʌ: «An juntiquil muʼ bʌ caj i choñon». Toj sajtelob i pusicʼal jiñi apóstolob i tsiʼ cʼajtibeyob: «¿Majqui?». Jesús tsiʼ jacʼʌ: «Jiñʌch woli bʌ cʌqʼuen i xujtʼil ili caxlan waj». Cheʼ jiñi, tiʼ xutʼ aqʼue Judas Iscariote. Judas tsaʼ loqʼui majlel.

Ti wiʼil, Jesús tsiʼ mele jumpʼejl oración, tsiʼ xetʼe jiñi caxlan waj i tsiʼ yʌqʼue jiñi apóstolob. Tiʼ subeyob: «Cʼuxula ili caxlan waj. Ili miʼ lajintel bajcheʼ c bʌcʼtal muʼ bʌ caj cʌcʼ ti laʼ tojlel». Ti wiʼil, tsiʼ chaʼle oración chaʼan jiñi vino, tsiʼ yʌqʼue jiñi apóstolob i tiʼ subeyob: «Japʌla ili vino. Ili miʼ lajintel bajcheʼ c chʼichʼel muʼ bʌ caj cʌcʼ chaʼan i tojol mulil. Mi cʌqʼueñetla lac tʼan chaʼan mi caj laʼ wochel bajcheʼ rey quicʼotetla yaʼ ti panchan. Melela ti jujumpʼejl jab chaʼan j cʼajtesʌntel». Jiñi xcʌntʼañob i chaʼan Jesús miʼ tempañob i bʌ cheʼ ti icʼajel ti jujumpʼejl jab chaʼan miʼ cʼajtesañob. Ili tempa bʌ cʌmbil bajcheʼ i Cena lac Yum.

 Cheʼ bʌ tsaʼ ujti i melob jiñi cena, jiñi apóstolob tsaʼ caji i yʌlob majqui ñumen ñuc bʌ. Pero Jesús tsiʼ yʌlʌ: «Jiñi ñumen ñuc bʌ ti laʼ tojlel, laʼ i mel i bʌ bajcheʼ alobob o bajcheʼ mach bʌ ñuquic».

Jesús tsiʼ yʌlʌ jaʼel: «Camigojetla. Jin chaʼan mic subeñetla muʼ bʌ i subeñon c Tat. Mach jalix mi caj c chaʼ majlel ti panchan, yaʼ baqui an c Tat. Pero jatetla mi caj laʼ cʌytʌl wʌʼi, jiñi quixtañujob mi caj i ñaʼtañob chaʼan xcʌntʼañetla c chaʼan cheʼ mi laʼ cʼuxbin laʼ bʌ, cheʼ bajcheʼ tsaʼ cʼuxbiyetla».

Tiʼ yujtibal, Jesús tsiʼ pejca Jehová i tsiʼ cʼajti chaʼan miʼ cʌntan xcʌntʼañob yicʼot chaʼan miʼ chaʼleñob eʼtel (troñel) tiʼ ñʌchʼtʌlelob. Cheʼ jaʼel tsiʼ cʼajti chaʼan miʼ sʌqʼuesʌbentel i cʼabaʼ Jehová. Ti wiʼil, Jesús yicʼot jiñi apóstolob tsiʼ cʼʌyiyob Jehová i tsaʼ loqʼuiyob majlel. Mach jalix yom chaʼan miʼ chucob Jesús.