Cheʼ bʌ tsaʼ ujti i pʌs i bʌ Jesús tiʼ tojlel jiñi apóstolob, Pedro tsaʼ majli ti chuc chʌy yaʼ ti mar am bʌ ti Galilea. Tomás, Santiago, Juan yicʼot yambʌ xcʌntʼañob tsaʼ majliyob jaʼel. Jumpʼejl acʼʌlel tsiʼ ñopo i chucob chʌy pero maʼañic tsaʼ mejliyob.

Tiʼ yijcʼʌlel cheʼ bʌ wen sʌcʼan to, tsiʼ taja i qʼuelob juntiquil wiñic yaʼ tiʼ tiʼ jiñi mar. Jiñi wiñic tsiʼ ñajti cʼajti: «¿Tsaʼ ba laʼ chucu chʌy?». Tsiʼ jacʼʌyob: «Maʼañic». Jiñi wiñic tsiʼ yʌlʌ: «Chocola ochel laʼ chimob chʌy yaʼ ti laʼ ñoj». Tsaʼ bujtʼi ti chʌy jiñi chim, i wen wocol tsiʼ letsayob yaʼ ti barco. Juan tsiʼ cʌñʌ chaʼan jiñʌch Jesús jiñi wiñic i tsiʼ yʌlʌ: «¡Jiñʌch lac Yum!». Pedro tsiʼ choco ochel i bʌ yaʼ ti jaʼ i tsiʼ chaʼle ñuxijel cʼʌlʌl tsaʼ cʼoti yaʼ tiʼ tiʼ jiñi mar. Jiñi yambʌ xcʌntʼañob tiʼ tsajcayob majlel Pedro ti barco.

Tsiʼ qʼueleyob cʼajc cheʼ bʌ tsaʼ cʼotiyob tiʼ tiʼ jiñi mar. Woli (yʌquel) ti ticʼan chʌy yicʼot caxlan waj. Jesús tsiʼ subeyob chaʼan miʼ chʼʌmob tilel  jiñi chʌy tsaʼ bʌ i chucuyob chaʼan miʼ pojpoñob jaʼel. Cheʼ jiñi tsiʼ yʌlʌ: «Laʼ la ti uchʼel».

Cheʼ bʌ tsaʼ ujtiyob ti uchʼel, Jesús tsiʼ cʼajtibe Pedro: «¿Muʼ ba a ñumen cʼuxbiñon cheʼ bajcheʼ ili chʌy tac?». Pedro tsiʼ jacʼʌ: «Mucʼʌch, c Yum, a wujil chaʼan mij cʼuxbiñet». Jesús tiʼ sube: «Cheʼ jiñi, aqʼuen i bucʼbal c tiñʌmeʼ». Jesús tsiʼ chaʼ cʼajtibe: «Pedro, ¿muʼ ba a cʼuxbiñon?». Pedro tsiʼ jacʼʌ: «C Yum, a wujil chaʼan mij cʼuxbiñet». Jesús tiʼ sube: «Cʌntan c tiñʌmeʼ». Jesús tsiʼ chaʼ cʼajtibe tiʼ yuxyajlel. Chʼijiyem tsaʼ yubi Pedro i tsiʼ sube: «C Yum, mi a laj ñaʼtan. A wujil chaʼan mij cʼuxbiñet». Jesús tsiʼ sube: «Aqʼuen i bucʼbal c tiñʌmeʼ». Cheʼ jiñi, tsiʼ chaʼ sube: «Chʌn tsajcañon».