I yuxyajlel i xʌmbal Pablo chaʼan subtʼan tsaʼ ujti ti Jerusalén i yaʼʌch tsiʼ chucuyob. Ti jumpʼejl bʌ acʼʌlel, cheʼ bʌ yaʼan ti cárcel, Jesús tiʼ sube tiʼ ñajal: «Mi caj a majlel ti Roma i mi caj a chaʼlen subtʼan yaʼi». Cheʼ jiñi, tsiʼ locʼsayob Pablo ti Jerusalén chaʼan miʼ majlel ti Cesarea. Yaʼi, chaʼpʼejl jab tsaʼ ajñi ti cárcel. Ti jumpʼejl bʌ qʼuin, cheʼ bʌ yaʼan ti melobʌjʌl yaʼ baqui an jiñi gobernador Festo, Pablo tsiʼ cʼajti: «Com miʼ melon jiñi César yaʼ ti Roma». Festo tsiʼ yʌlʌ: «Mi a wom miʼ melet jiñi César, mi caj a majlel yaʼi». Tsiʼ letsayob Pablo ti jiñi barco muʼ bʌ i majlel ti Roma. Tsaʼ majli jaʼel Lucas yicʼot Aristarco.

Cheʼ bʌ yaʼañob ti mar, tsaʼ cʌyle jiñi barco yaʼ baqui an wen tsʌts bʌ icʼ jaʼal i cabʌl qʼuin tsaʼ jalʼa. Tsiʼ ñaʼtayob chaʼan mi caj i chʌmelob. Pablo tsiʼ yʌlʌ: «Wiñicob, tiʼ subeyon juntiquil ángel tic ñajal: ‹Mach a chaʼlen bʌqʼuen. Mi caj a cʼotel ti Roma i maʼañic mi caj i chʌmel jiñi yaʼ bʌ añob ti barco›. Jin chaʼan, ¡mach laʼ chaʼlen bʌqʼuen! Maʼañic mi caj lac chʌmel».

14 qʼuin tsiʼ ñusayob jiñi tsʌts bʌ icʼ jaʼal, i cheʼ jiñi tsaʼ cʼotiyob yaʼ ti isla am bʌ ti Malta. Tsaʼ jejmi jiñi barco, pero maʼañic tsaʼ chʌmi jiñi 276 wiñicob. Tsiʼ chaʼleyob ñuxijel yicʼot tsiʼ cʼʌñʌyob i xujtʼil jiñi barco chaʼan miʼ loqʼuelob. Jiñi xchumtʌlob ti Malta tsiʼ cʌntayob jiñi wiñicob i tsiʼ ñutsuyob cʼajc chaʼan miʼ qʼuixñesañob i bʌ.

Tsaʼ ñumi uxpʼejl uw i jiñi soldadojob tsiʼ letsayob Pablo ti yambʌ barco chaʼan miʼ majlel ti Roma. Jiñi hermanojob tsaʼ majli qʼuelob cheʼ bʌ tsaʼ cʼoti ti Roma. Cheʼ bʌ Pablo tsiʼ qʼueleyob, tsiʼ yʌqʼue wocolix i yʌlʌ Dios i tsiʼ taja i tijicñʌyel. Pablo juntiquilʌch ajcʌchol, pero tsaʼ aqʼuenti permiso chaʼan miʼ toj jumpʼejl i chumlib cʌntʌbil bʌ ti soldado. Chaʼpʼejl jab tsaʼ ajñi yaʼi. Cheʼ bʌ miʼ cʼotel i julaʼtañob, Pablo miʼ subeñob jiñi wen tʼan chaʼan bʌ i Yumʌntel Dios yicʼot tiʼ tojlel Jesús. Tiʼ tsʼijbube carta tac jiñi congregación yaʼ ti Asia Menor yicʼot ti Judea. Jehová tsiʼ cʼʌñʌ Pablo chaʼan miʼ sub jiñi wen tʼan ti yan tac bʌ lum.