Yaʼ ti Cesarea an juntiquil i yum soldado chʼoyol bʌ ti Roma, i cʼabaʼ jiñʌch Cornelio. Anquese mach judíojic, pero tsaʼʌch qʼuejli ti ñuc tiʼ tojlel jiñi judíojob. Tsiʼ tʼoxo i chubʌʼan i tsiʼ colta jiñi pʼumpʼuñoʼ bʌ. Cornelio tsiʼ ñopo Jehová yicʼot tsiʼ pejca ti oración. Ti jumpʼejl bʌ qʼuin, tsiʼ pʌsbe i bʌ juntiquil ángel i tiʼ sube: «Dios tsiʼ ñʌchʼtʌbet a woración. Choco majlel a wiñicob ti Jope chaʼan miʼ pʌyob tilel Pedro». Ti ora jach tsiʼ choco majlel uxtiquil i wiñic yaʼ ti Jope, am bʌ i ñajtlel 50 kilómetro (30 millas) yaʼ ti sur.

Pero cheʼ yaʼ to an Pedro ti Jope tsiʼ chaʼle ñajal. Tsiʼ qʼuele añimal tac mach bʌ yomic miʼ cʼux jiñi Judíojob. Pero tsaʼ yubi jumpʼejl tʼan tsaʼ bʌ i sube chaʼan miʼ cʼux. Pedro mach yomic i cʼux i tsiʼ yʌlʌ: «Maʼañic baʼ j cʼuxu mach bʌ sʌquic». Tsaʼ subenti: «Mach a wʌl chaʼan mach sʌquic ili añimal tac, Dios miʼ yʌl chaʼan sʌcʌch». Tsaʼ subenti jaʼel: «Yaʼan uxtiquil wiñic ti a puerta, cucu qʼueleyob». Pedro tsaʼ majli i tsiʼ cʼajtibe jiñi wiñicob chuqui yomob. Tsiʼ jacʼʌyob: «Tsiʼ chocoyon lon tilel Cornelio, i yum soldadojob ti Roma. Yombi chaʼan maʼ majlel tiʼ yotot yaʼ ti Cesarea». Pedro tsiʼ sube jiñi wiñicob chaʼan miʼ cʼajob i yoj yaʼ tiʼ  yotot ti jiñi acʼʌlel. Tiʼ yijcʼʌlel, tsaʼ laja majliyob ti Cesarea. An hermanojob yaʼ ti Jope tsaʼ bʌ majliyob jaʼel.

Cornelio tsaʼ ñocle cheʼ bʌ tsiʼ qʼuele Pedro. Jiñi Pedro tiʼ sube: «Tejchen. Wiñicon jaʼel bajcheʼ jatet. Dios tiʼ subeyon chaʼan mic tilel ti a wotot, anquese maʼañic mi lon cochel tiʼ yotot gentilob come judíojon lojon. Subeñon chucoch tsaʼ pʌyʌyon».

Cornelio tiʼ sube Pedro: «Añix chʌmpʼejl qʼuin cheʼ bʌ woli c pejcan Dios, juntiquil ángel tiʼ subeyon chaʼan mic pʌyet. A wocolic, pʌsbeñon lojon chuqui miʼ yʌl Jehová». Pedro tsiʼ jacʼʌ: «Wʌle muqʼuix c chʼʌmben isujm chaʼan junlajal miʼ qʼuel Dios jiñi wiñicob, miʼ chʼʌm majqui jach yom i chʼujutesan». Pedro cabʌl chuqui tsiʼ cʌntesayob tiʼ chaʼan bʌ Jesús. Cheʼ jiñi, Cornelio yicʼot jiñi yaʼ bʌ añob tiʼ yotot tsaʼ aqʼuentiyob chʼujul bʌ espíritu i tsiʼ chʼʌmʌyob jaʼ.