Saulo jiñʌch juntiquil romano tsaʼ bʌ i yila pañimil ti Tarso. Juntiquilʌch fariseo wen i cʌñʌ bʌ i mandar judíojob i tsiʼ wen tsʼaʼle jiñi xñoptʼañob. Tsiʼ locʼsayob tiʼ yotot jiñi wiñicob xʼixicob, i tsiʼ yotsayob ti cárcel. Tsaʼ jach i qʼuele cheʼ bʌ tiʼ tsʌnsayob ti xajlel jiñi xcʌntʼan Esteban.

Pero Saulo maʼañic tsiʼ yubi i tijicñʌyel cheʼ bʌ cojach tsiʼ cʌchʌ jiñi xcʌntʼañob tiʼ Jerusalén. Jin chaʼan, tsiʼ sube jiñi ñuc bʌ motomaj chaʼan miʼ choc majlel yaʼ ti Damasco chaʼan miʼ ticʼlan jaʼel jiñi xñoptʼañob yaʼi. Cheʼ bʌ lʌcʼʌlix chaʼan miʼ cʼotel yaʼ ti tejclum, tsaʼ tili i sʌclel cʼajc tiʼ joytilel, i Saulo tsaʼ yajli ti lum. Cheʼ jiñi, tsaʼ yubi jumpʼejl tʼan: «Saulo, ¿chucoch maʼ ticʼlañon?». Saulo tsiʼ cʼajti: «¿Majquiyet?». Tsaʼ jacʼbenti: «Joñon Jesús. Cucu ti Damasco, yaʼ mi caj a subentel chuqui mi caj a mel». Ti jimbʌ ora, Saulo tsaʼ sujti ti xpotsʼ i tsiʼ chucuyob majlel tiʼ cʼʌb yaʼ tiʼ tejclum.

Yaʼ ti Damasco yaʼan juntiquil xucʼul bʌ xñoptʼan i cʼabaʼ Ananías. Jesús tiʼ sube ti jumpʼejl ñajal: «Cucu tiʼ yotot Judas, yaʼ ti calle i cʼabaʼ Recta i sʌclan jiñi Saulo». Ananías tsiʼ jacʼʌ: «C Yum, cabʌl tsaʼ cubi tʼan chaʼan jiñi wiñic. Woliʼ yotsañob ti cárcel jiñi xcʌntʼañob a chaʼan». Pero Jesús tiʼ sube: «Cucu sʌclan come tsaʼ c yajca chaʼan miʼ sub jiñi wen tʼan i chaʼan bʌ Dios ti tejclum tac».

Jin chaʼan, Ananías tsaʼ majli yaʼ baqui an Saulo i tiʼ sube: «Saulo, quermaño, tsiʼ chocoyon tilel Jesús chaʼan miʼ chaʼ cʼotel a wut». Ti jiñi jach bʌ ora, Saulo tsaʼ chaʼ cʼoti i wut. Tsiʼ cʌñʌ i chaʼan bʌ Jesús i tsaʼ sujti ti xcʌntʼan i chaʼan. Tsiʼ chʼʌmʌjaʼ i tsaʼ caji ti subtʼan yaʼ ti sinagoga tac yicʼot yambʌ xcʌntʼañob. ¿Mach ba toj sajtelob i pusicʼal jiñi judíojob cheʼ bʌ tsiʼ qʼueleyob jiñi Saulo? Tsiʼ  qʼueleyob chaʼan Saulo tsaʼ caji i suben jiñi quixtañujob i chaʼan bʌ Jesús. Jiñi judíojob tsiʼ cʼajtibeyob i bʌ: «¿Mach ba jiñic muʼ bʌ i ticʼlan jiñi xcʌntʼañob i chaʼan Jesús?

Saulo uxpʼejl jab tsiʼ chaʼle subtʼan ti Damasco. Jiñi judíojob tsiʼ wen tsʼaʼleyob yicʼot tsiʼ ñaʼta i tsʌnsañob. Pero jiñi hermanojob tsaʼ yubiyob jiñi woli (yʌquel) bʌ i ñaʼtan i melob i tsiʼ coltayob chaʼan miʼ mejlel ti putsʼel. Tsiʼ juʼsayob ti jumpʼejl chiquib yaʼ baʼ tocol i murojlel jiñi tejclum.

Cheʼ bʌ Saulo tsaʼ majli ti Jerusalén, tsiʼ jopʼo i julaʼtan jiñi hermanojob. Pero miʼ wen bʌcʼñañob. Cheʼ jiñi, juntiquil xcʌntʼan i cʼabaʼ Bernabé tsiʼ pʌyʌ majlel Saulo yaʼ baʼan jiñi apóstolob i tiʼ subeyob chaʼan tsaʼix qʼuextʌyi. Tsiʼ tempa i bʌ yaʼ ti congregación am bʌ ti Jerusalén i tsaʼ caji ti subtʼan yicʼot i tijicñʌyel. Ti wiʼil, tsiʼ yotsʌbeyob i cʼabaʼ ti Pablo.