Timoteo jiñʌch juntiquil xcolel yaʼ ti congregación am bʌ ti Listra. I tat chʼoyol ti Grecia, i ñaʼ chʼoyol ti Judá. I ñaʼ jiñʌch Eunice, i chuchuʼ (coʼ) jiñʌch Loida. Tsiʼ pʌsbeyob Timoteo i chaʼan bʌ Jehová cheʼ bʌ chut to.

Cheʼ bʌ Pablo tsiʼ julaʼta jiñi tejclum Listra cheʼ tiʼ chaʼyajlel i xʌmbal chaʼan subtʼan, tsiʼ qʼuele Timoteo chaʼan miʼ cʼuxbin jiñi hermanojob yicʼot chaʼan yom i coltañob. Jin chaʼan tiʼ sube Timoteo chaʼan miʼ majlel yicʼot ti subtʼan. Ti wiʼil, Pablo tsiʼ cʌntesa Timoteo chaʼan miʼ sujtel ti wen bʌ xcʌntesa yicʼot ti xsubtʼan.

Jiñi chʼujul bʌ espíritu tsiʼ colta Pablo yicʼot Timoteo yaʼ baqui tsaʼ majliyob. Ti jumpʼejl bʌ acʼʌlel, Pablo tsiʼ chaʼle ñajal. Tsiʼ qʼuele juntiquil wiñic tsaʼ bʌ i sube chaʼan miʼ majlel i chaʼlen coltaya ti Macedonia. Jin chaʼan Pablo, Timoteo, Silas yicʼot Lucas tsaʼ majliyob ti subtʼan yaʼi yicʼot i techob congregación tac.

Yaʼ ti tejclum Macedonia am bʌ ti Tesalónica, cabʌl wiñicob yicʼot xʼixicob tsaʼ sujtiyob ti xñoptʼan. Pero an judíojob tsaʼ bʌ caji i contrajiñob Pablo yicʼot i piʼʌlob. Tsiʼ tempayob jiñi mach bʌ weñobic i tsiʼ pʌyʌyob majlel jiñi hermanojob yaʼ baqui an jiñi yumʌlob. Cʼam tsiʼ chaʼleyob tʼan jiñi judíojob: «¡I contrajob i yum Roma ili wiñicob!». Tsaʼ ochiyob ti wocol Pablo yicʼot Timoteo, jin chaʼan ti acʼʌlel tsaʼ putsʼiyob majlel yaʼ ti Berea.

Yom i ñʌchʼtʌbeñob i tʼan Dios yaʼ ti Berea, i cabʌl griegojob yicʼot judíojob tsaʼ sujtiyob ti xñoptʼan. Pero an judíojob ti Tesalónica tsaʼ bʌ majli techob wocol yaʼ ti Berea. Jin chaʼan Pablo tsaʼ majli ti Atenas. Timoteo yicʼot Silas tsaʼ cʌyleyob ti Berea chaʼan miʼ pʼʌtʼesañob jiñi hermanojob. Ti wiʼil, Pablo tsiʼ chaʼ choco majlel Timoteo ti Tesalónica chaʼan miʼ coltan i lʌtʼob i tʌcʼlʌntel jiñi hermanojob. Cheʼ jiñi, Pablo tsiʼ  choco majlel Timoteo chaʼan miʼ julaʼtan yicʼot i coltan yambʌ congregación tac.

Pablo tiʼ sube Timoteo: «Mi caj i contrajintelob jiñi yom bʌ i melbeñob i yeʼtel Jehová». Timoteo tsaʼ yila wocol i tsaʼ ochi ti cárcel tiʼ caj i ñopoñel (chʼujbiya). Pero tsiʼ taja i tijicñʌyel come tiʼ pʌsʌ chaʼan xucʼulʌch ti Jehová.

Pablo tiʼ sube jiñi chumuloʼ bʌ ti Filipos: «Mi caj c chocbeñetla tilel Timoteo. Mi caj i pʌsbeñetla bajcheʼ yom miʼ laʼ chʌn ajñel ti jiñi toj bʌ bij yicʼot bajcheʼ yom mi laʼ chaʼlen subtʼan». Pablo tsiʼ ñopo chaʼan tojʌch mi caj i mel i yeʼtel (troñel) Timoteo. Cabʌl jab tsiʼ comol melbeyob i yeʼtel Dios yicʼot wen i yamigojoʼ i bʌ.