Jiñi apóstolob tsiʼ jacʼbeyob i mandar Jesús chaʼan i subol jiñi wen tʼan tiʼ petol pañimil. Cheʼ ti jabil 47, jiñi hermanojob ti Antioquía tsiʼ chocoyob majlel Pablo yicʼot Bernabé ti yan tac bʌ lum chaʼan miʼ subob jiñi wen tʼan. Tsiʼ chaʼleyob subtʼan yicʼot i chʼejlelob cheʼ bʌ woli (choncol) i ñumelob majlel ti Derbe, ti Listra yicʼot ti Iconio, ili yaʼʌch ti Asia Menor.

Pablo yicʼot Bernabé tiʼ subeyob i tʼan Dios jiñi añoʼ bʌ i taqʼuin, jiñi pʼumpʼuñoʼ bʌ, jiñi xcolelob yicʼot jiñi ñoxobix bʌ. Cabʌl tsiʼ chʼʌmʌyob ti ñuc i sujmlel i tʼan Cristo. Pablo yicʼot Bernabé tsiʼ subeyob i tʼan Dios jaʼel jiñi yumʌl bʌ yaʼ ti Chipre, i cʼabaʼ Sergio Paulo, pero juntiquil am bʌ i xibʌjlel tsiʼ ñopo i mʌctañob. Pablo tiʼ sube jiñi am bʌ i xibʌjlel: «Añet tiʼ contra Jehová». Ti jiñi bʌ ora, maʼañix tsaʼ caji ti chʌn cʼotel i wut. Cheʼ bʌ jiñi yumʌl Sergio Paulo tsiʼ qʼuele jiñi, tsaʼ sujti ti xñoptʼan.

Pablo yicʼot Bernabé tsiʼ chaʼleyob subtʼan ti otot tac, ti choñoñibʌl, ti bij yicʼot ti sinagoga tac. Ti jumpʼejl bʌ qʼuin cheʼ bʌ yaʼañob ti Listra, tiʼ tsʼʌcayob juntiquil mach bʌ mejlic ti xʌmbal. Jiñi tsaʼ bʌ i qʼueleyob ili milagro, tsiʼ ñaʼtayob chaʼan diosob jiñi Pablo yicʼot Bernabé i tsiʼ ñopo i chʼujutesañob. Pero maʼañic tsaʼ yʌcʼʌyob i bʌ i tiʼ subeyob: «¡Cojach Dios yom miʼ chʼujutesʌntel! Mach Dioson lojon». Cheʼ jiñi tsaʼ cʼoti judíojob i subeñob jiñi quixtañujob chaʼan miʼ contrajiñob Pablo. Tsiʼ juluyob ti xajlel i yomix chʌmel tsiʼ tujcʼayob loqʼuel yaʼ ti tejclum. ¡Pero maʼañic tsaʼ chʌmi! Ti ora jach tsaʼ tili i coltañob jiñi hermanojob i tsiʼ chaʼ pʌyʌyob majlel yaʼ ti tejclum. Cheʼ jiñi tsaʼ chaʼ majli ti Antioquía.

Cheʼ ti jabil 49, Pablo tsaʼ chaʼ loqʼui majlel ti subtʼan. Tsaʼ majli i qʼuel jiñi hermanojob yaʼ ti Asia Menor i cheʼ jiñi tsaʼ majli i sub jiñi wen  tʼan cʼʌlʌl ti Europa. Tsajñi ti Atenas, ti Éfeso, ti Filipos, ti Tesalónica yicʼot ti yan tac bʌ tejclum. Ti jiñi bʌ ora, tsaʼ majli yicʼot Silas, Lucas yicʼot jiñi xcolel Timoteo. Tsiʼ comol chaʼleyob eʼtel chaʼan miʼ techob tsijiʼ bʌ congregación tac yicʼot chaʼan miʼ pʼʌtʼesañob. Pablo tsaʼ cʌyle jumpʼejl jab yicʼot ojlil yaʼ ti Corinto chaʼan miʼ pʼʌtʼesan jiñi hermanojob. Tsiʼ chaʼle subtʼan yicʼot cʌntesa, i tiʼ tsʼijbube carta tac jiñi congregación. I yeʼtel jiñʌch i melol (pʌtol) pisil bʌ otot tac. Tiʼ wiʼil, Pablo tsaʼ chaʼ majli ti Antioquía.

Cheʼ ti jabil 52, Pablo tsaʼ chaʼ loqʼui majlel, i tsiʼ techeʼ i xʌmbal yaʼ ti Asia Menor. Tsaʼ majli yaʼ ti norte i tsaʼ cʼoti yaʼ ti Filipos, i cheʼ jiñi tsaʼ jubi majlel yaʼ ti Corinto. Cabʌl jab tsiʼ chaʼle cʌntesa yaʼ ti Éfeso, tsiʼ chaʼle tsʼʌcaya yicʼot tsiʼ colta jiñi congregación. Cheʼ jaʼel, tsiʼ bele ñusa discurso tac ti jumpʼejl escuela. Cabʌl tsiʼ jacʼbeyob i tʼan yicʼot tsiʼ qʼuextayob i melbal. Cheʼ bʌ tsaʼix i subu jiñi wen tʼan ti yan tac bʌ lum, Pablo tsaʼ majli ti Jerusalén.